ខេត្តព្រះវិហារ ៖ សម្តេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ បានមានប្រសាសន៍នៅព្រឹកថ្ងៃទី២៧ ខែមិថុនា ឆ្នាំ២០២៥ក្នុងឱកាសអញ្ជើញជាអធិបតីភាព នៅក្នុងពិធីជួបសំណេះសំណាលជាមួយសមាជិកក្រុមប្រឹក្សាខេត្ត…
ខេត្តព្រះវិហារ ៖ សម្តេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ បានមានប្រសាសន៍នៅព្រឹកថ្ងៃទី២៧ ខែមិថុនា ឆ្នាំ២០២៥ក្នុងឱកាសអញ្ជើញជាអធិបតីភាព នៅក្នុងពិធីជួបសំណេះសំណាលជាមួយសមាជិកក្រុមប្រឹក្សាខេត្ត ក្រុង-ស្រុក ឃុំ-សង្កាត់ ក្នុងខេត្តព្រះវិហារថា កម្ពុជាគ្រាន់តែជាប្រទេសរងគ្រោះដោយសារថៃប៉ុណ្ណោះ ព្រោះថៃជាប្រទេសមានជើងហោះហើរត្រង់តភ្ជាប់ទៅប្រទេសនានា ហើយនាំជនឆបោកទាំងនោះចូលប្រទេសរបស់ខ្លួន ។
អាស្រ័យដូចនេះ សម្ដេចតេជោបានអំពាវនាវទៅថៃវិញថា «សូមឈប់ព្រួសឈាមដាក់គេលើបញ្ហាឧក្រិដ្ឋកម្មអនឡាញនេះទៅកាន់ប្រទេសជិតខាង ជាពិសេសប្រទេសកម្ពុជា ។សម្ដេចតេជោ ហ៊ុន សែន មានប្រសាសន៍បញ្ជាក់ថា «កម្ពុជាបានអត់ធ្មត់ដើម្បីពង្រីកកិច្ចសហប្រតិបត្តិការបង្ក្រាបទាំងអស់គ្នា ប៉ុន្តែលោកជំទាវ(ផែថងថាន)យករួចខ្លួន ហើយមកដាក់កំហុសឱ្យកម្ពុជា កម្ពុជាទទួលយកមិនបានទេលោកជំទាវ លោកជំទាវធ្វើកំហុសធ្ងន់ណាស់បញ្ហាហ្នឹង ។ លោកជំទាវព្រួសឈាមដាក់គេ ប៉ុន្តែលោកជំទាវភ្លេចថា ឈាមនោះវាចេញពីខ្លួនរបស់លោកជំទាវ» ។សម្ដេចតេជោបានចោទជាសំណួរថា «អ្នកណាចិញ្ចឹមក្រុមឧក្រិដ្ឋជននៅតាមព្រំដែន ជាមួយភូមា មីយ៉ាន់ម៉ា ?
អ្នកណាចិញ្ចឹមឧក្រិដ្ឋជននៅតាមព្រំដែនឡាវ ? សម្រាប់កម្ពុជា កម្ពុជាចេះធ្វើហើយ ! លោកជំទាវថាផ្គត់ផ្គង់អ៊ីនធឺណិត អ៊ីនធឺណិត កម្ពុជាបានកាត់ផ្ដាច់តាំងពីមុនថ្ងៃទី២៤ លោកជំទាវ ! ហើយលោកជំទាវ បានសូមទោសខ្ញុំ ! លោកជំទាវថា កម្ពុជាទទួលបានព័ត៌មានខុស ប៉ុន្តែនៅពេលមានការពន្យល់លោកជំទាវបានសូមទោសខ្ញុំមែនទេ ? លោកជំទាវមិនបានដឹងថា ក្រសួងការបរទេសលោកជំទាវ បានព្រមានកម្ពុជាដើម្បីកាត់ភ្លើង កាត់អ៊ីនធឺណិត កម្ពុជាមិនចាំបាច់ឱ្យលោកជំទាវកាត់ទេ យើងកាត់មុន» ។
ទន្ទឹមនឹងនេះ សម្ដេចតេជោ ហ៊ុន សែន ក៏បានផ្ដាំទៅកាន់ប្រជាពលរដ្ឋថៃផងដែរ ឱ្យមើលឱ្យច្បាស់ពីល្បិចរបស់មេដឹកនាំថៃ ថាយ៉ាងម៉េច ? សម្ដេចមិនបានបន្ទោសបក្សភឿថៃនោះទេ ប៉ុន្តែសម្ដេចបន្ទោទៅលើតួអង្គអ្នកដឹកនាំ ដែលខ្វះការទទួលខុសត្រូវ មិនស្មោះត្រង់ជាមួយប្រជាជនខ្លួនឯង ហើយមិនស្មោះត្រង់ជាមួយដៃគូសន្ទនាទៀត ។
បើពលរដ្ឋខ្លួនឯងមិនស្មោះត្រង់ជាមួយផង តើយើងជឿទុកចិត្តយ៉ាងម៉េចបាន ? កម្ពុជាបានត្រៀមខ្លួនរួចរាល់ សម្រាប់ធ្វើកិច្ចសហប្រតិបត្តិការទៅលើការប្រយុទ្ធប្រឆាំងឧក្រិដ្ឋកម្មគ្រប់ប្រភេទ មិនមែនតែអនឡាញនោះទេ ជួញដូរមនុស្ស លាងលុយកខ្វក់ គ្រឿងញៀនជាដើម ។ ខ្ញុំអត់បានយកប្រទេសថៃធ្វើជាសត្រូវ មិនបានយកប្រជាជនថៃធ្វើជាសត្រូវ ប៉ុន្តែខ្ញុំក៏ត្រូវតែប្រឈមនឹងនាយករដ្ឋមន្ត្រីថៃ ដែលចាត់ទុកខ្ញុំជាសត្រូវ ហើយខ្ញុំក៏ចាត់ទុកអ្នកជាសត្រូវវិញដែរ ។ប្រជាជនថៃភាគច្រើនចង់បានសន្តិភាព ភាគច្រើនចង់មានមិត្តភាពជាមួយកម្ពុជា ក៏ប៉ុន្តែក៏មានក្រុមជ្រុលនិយមមួយក្រុម រាប់ទាំងមេដឹកនាំនយោបាយ ។ ខ្ញុំបាត់បង់ការអត់ធ្មត់សម្រាប់លោកជំទាវហើយ ។ បន្ទាប់ពីលោកជំទាវចេញវ៉ៃខ្ញុំម្ដងហើយម្ដងទៀត វ៉ៃកម្ពុជាម្ដងហើយម្ដងទៀត ។
ថ្ងៃនេះខ្ញុំនឹងបញ្ជាក់ ត្រកូលស៊ីណាវ៉ាត់ ដើម្បីឲ្យលោកជំទាវឲ្យប្រជាជនថៃបានដឹងថា អ្វីខ្លះទៅរឿងរ៉ាវ ។ ការបែកធ្លាយពីការសន្ទនាតាមទូរស័ព្ទ មិនមែនជាចេតនារបស់ខ្ញុំទេ។ក្រោយពីខ្ញុំភ្ញាក់ពីដំណេក មានគេប្រាប់ខ្ញុំថា មានទូរស័ព្ទមកពីបាងកក ។ ពេលដែលខ្ញុំឃើញដូច្នេះ ខ្ញុំនឹកឃើញថា ខ្ញុំត្រូវគេបោកប្រាស់ ។ដូច្នេះខ្ញុំត្រូវថតសំឡេង ការសន្ទនាជាមួយលោកជំទាវថៃ ពីព្រោះដោយសារសម្ដេចគេបោកម្ដងរួចទៅហើយ ។ បានជាសម្ដេចថតសំឡេងទុក សម្ដេចតេជោបានលើកឡើងថា យើងបានស្រុះស្រួលគ្នាធ្វើការកែសម្រួលកម្លាំងនៅមុំបី ពេលនោះមានទាំងលោកថាក់ស៊ីន មានទាំងនាយករដ្ឋមន្ត្រី មានទាំងយីងឡាក់ ក៏បានអរគុណខ្ញុំ ។
ផ្ទុយទៅវិញ បែរជានៅទីក្រុងបាងកកគេបានប្រើប្រាស់ភាសាថា «កម្ពុជាដកកងទ័ព» ។ ករណីនេះខ្ញុំបានថា មិនមែនជាការដកកងទ័ពទេ គឺជាការកែសម្រួលកងទ័ព ។
សម្ដេចតេជោមានប្រសាសន៍បន្តថា ខ្ញុំត្រូវគេបោក ត្រូវគេកុហក ។ ដូច្នេះខ្ញុំត្រូវមានតម្លាភាពជាមួយពលរដ្ឋរបស់ខ្ញុំវិញ ត្រូវតែមានគណនេយ្យភាពជាមេដឹកនាំរបស់ខ្ញុំ ។សម្តេចតេជោ ហ៊ុន សែន បានមានប្រសាសន៍ទៀតថា ប្រទេសថៃកំពុងពោរពេញទៅដោយឧក្រិដ្ឋកម្មអនឡាញ និងជាមជ្ឈមណ្ឌលចែកចាយឧក្រិដ្ឋកម្ម ។ ប៉ុន្តែលោកជំទាវនាយករដ្ឋមន្ត្រី បែរជាថាមកខាងកម្ពុជា ដែលជាអ្នករងគ្រោះទៅវិញ ។
លោកជំទាវកុំភ្លេចណា អនឡាញនៅព្រំដែនជាមួយមីយ៉ាន់ម៉ា អ៊ីនធឺណិតគឺចេញពីថៃទៅៗ អនឡាញនៅឡាវ ក៏អ៊ីនធឺណិតទៅពីថៃទៅដែរ ។សម្ដេចតេជោ ហ៊ុន សែន បានផ្ដាំទៅប្រជាជនថៃ មើលឲ្យច្បាស់ចំពោះល្បិចកលដឹកនាំរបស់លោកជំទាវនាយករដ្ឋមន្ត្រីថៃបច្ចុប្បន្ន ដែលគ្មានភាពស្មោះត្រង់ ។ ពេលនេះ នាយករដ្ឋមន្ត្រីថៃ គេក្បត់សម្តេចមុន ហើយកុំនិយាយ រឿងគុណធម៌ទៀត ។ បើអ្នកចាត់ទុកខ្ញុំជាសត្រូវហើយ ខ្ញុំក៏ចាត់ទុកអ្នកជាសត្រូវដូចគ្នា ។ ខ្ញុំគ្មានជម្រើសទេ ។
សម្ដេចតេជោ បានផ្ដាំទៅលោកជំទាវនាយករដ្ឋមន្ត្រីថា កុំនិយាយបញ្ហាគុណធម៌ជាមួយខ្ញុំ ក្នុងពេលដែលលោកជំទាវជាក្មេងម្នាក់ប្រមាថមនុស្សចាស់ ។ លោកជំទាវជានាយករដ្ឋមន្ត្រី ប៉ុន្តែខ្ញុំក៏ជាមេដឹកនាំ ដែលមានតួនាទីធំលំដាប់ទី២ នៅក្នុងប្រទេស បន្ទាប់ពីព្រះមហាក្សត្រដូចគ្នា ។ លោកជំទាវនាយករដ្ឋមន្ត្រីថៃ ជាមនុស្សក្បត់ជាតិសាសន៍ខ្លួនឯង និងក្បត់ដៃគូសន្ទនា ។ដើម្បីតម្រូវចិត្ត ហ៊ុន សែន លោកជំទាវសុខចិត្តប្រមាថមេទាហានខ្លួនឯង ។ តើនេះនៅប្រទេសថៃចាត់ទុកដូចម្ដេច ? ប៉ុន្តែបើនៅកម្ពុជា សម្ដេចតេជោចាត់ទុកថាក្បត់ជាតិតែម្ដង ។ ឃុបឃិតជាមួយបរទេស ជេរមេទាហានខ្លួនឯង ។សម្ដេចតេជោមានប្រសាសន៍ថា ខ្ញុំមិនបាននិយាយអំពីមេទាហាន បញ្ជាការភូមិភាគទេ សូម្បីតែមកដល់ថ្ងៃនេះ ខ្ញុំអត់ដែលនិយាយ និងនិយាយពាក្យមេបញ្ជាការភូមិភាគទេ ខ្ញុំអត់ដែលនិយាយប៉ះពាល់ដល់គាត់ទេ ។
ខ្ញុំយល់អំពីភារកិច្ចរបស់មេទ័ពមិនថាមេទ័ពយើងឬមេទ័ពគេទេ ។ ត្រូវតែមានចរិតដូច្នេះ ។ ប៉ុន្តែហេតុអ្វីលោកជំទាវនាយករដ្ឋមន្ត្រីឯងប្រមាថមេទ័ពដើម្បីតម្រូវចិត្តខ្ញុំ ។ ខ្ញុំអត់ចង់ដឹងរឿងទេ ។ លោកជំទាវចង់បោកប្រាស់ខ្ញុំ លោកជំទាវចាត់ទុកថាយុទ្ធសាស្ត្រចរចា ឬយុទ្ធវិធីចរចា ឬតាក់ទិចចរចា ។លោកជំទាវស្គាល់ ហ៊ុន សែន តិចពេកហើយ បើពលរដ្ឋខ្លួនឯងមិនស្មោះត្រង់ជាមួយពលរដ្ឋខ្លួនឯងផង ។យើងចង់ស្វែងរកកិច្ចសហប្រតិបត្តិការ ។ ដើម្បីឲ្យភ្លឺភ្នែកទាំងអស់គ្នា ឥឡូវអនឡាញឮទៅដល់ប្រទេសធំៗ ។
ដូច្នេះសូមឲ្យប្រជាជាតិទាំងអស់គ្នាសហប្រតិបត្តិការគ្នា អប់រំពលរដ្ឋកុំឱ្យលេងល្បែង ។កម្ពុជានឹងត្រៀមខ្លួនធ្វើប្រក្រតីភាពឡើងវិញជាមួយនឹងថៃ ប៉ុន្តែប្រហែលជាមិនអាចធ្វើនៅក្នុងកាលៈទេសៈនាយករដ្ឋមន្ត្រីបច្ចុប្បន្ននេះទេ។ខ្ញុំឮថា ថ្ងៃណាមួយក្រុមប្រឹក្សាធម្មនុញ្ញថៃ នឹងធ្វើការពិនិត្យទៅលើការព្យួរតំណែងនាយករដ្ឋមន្ត្រីបច្ចុប្បន្ន ។សូមបងប្អូនត្រឡប់មកស្រុកវិញ កុំឲ្យគេមើលងាយ នៅស្រុកយើងពេលនេះ ខ្វះកម្លាំងពលកម្មជិត៣០ម៉ឺននាក់ ជាមួយនឹងការត្រៀមទទួលពលករទាំងនោះ ដើម្បីដោះស្រាយការងារធ្វើ និងសម្រួលនូវបញ្ហាដូចជា ការជំពាក់ធនាគារជាដើម ។ សមាគមធនាគារ និងសមាគមហិរញ្ញវត្ថុ បានឆ្លើយតបជាមួយនឹងនាយករដ្ឋមន្ដ្រី ហ៊ុន ម៉ាណែត រួចស្រេចទៅហើយ ដើម្បីត្រៀមជួយសម្រួល ឧទាហរណ៍ដូចជា ពន្យារការយកការប្រាក់ ឬក៏ពន្យារការសងជាដើម ទៅតាមករណីនីមួយៗ ។
សម្តេចតេជោ ហ៊ុន សែន បានលើកឡើងថា ពីមុនកម្ពុជាខ្វះការងារធ្វើមែន ប៉ុន្ដែឥឡូវការងារនៅក្នុងស្រុកច្រើនណាស់ ច្រើនរហូតខ្វះកម្មករទៅហើយ គ្រាន់តែរោងចក្រកាត់ដេរខ្វះកម្មករមិនតិចនាក់នោះទេ ហើយប្រជាពលរដ្ឋ ទៅប្រទេសថៃខ្លះធ្វើចម្ការ ខណៈចម្ការនៅកម្ពុជាមានច្រើនណាស់ដែលខ្វះកម្មករ ។លើសពីនេះទៀត សម្តេចតេជោ ហ៊ុន សែនបានប្រាប់ទៅភាគីថៃថា បើអ្នកខ្លាំង អ្នកដេញកម្មករខ្មែរឲ្យត្រឡប់មកកម្ពុជាវិញមក ព្រោះថា ពេលដេញកម្មករខ្មែរមក គឺក្រឡាក់ចាក់សេដ្ឋកិច្ចរបស់អ្នកឯងទេ គឺរោងចក្រ និងកសិដ្ឋានមួយចំនួននឹងត្រូវបិទ ។ បើអ្នកឯងខ្លាំងសាក-លមើលទៅ ៕
ចែករំលែកព័តមាននេះ