រាជធានីភ្នំពេញ ៖ គណបក្សប្រជាជនកម្ពុជា (CPP) ប្រកាសលទ្ធផលតួនាទីគណបក្សនយោបាយ នៅអាស៊ីអាគ្នេយ៍ ក្នុងការកសាងសហគមន៍អាស៊ាន និងការចូលរួមវេទិកាអនាគតអាស៊ាន លើកទី៣ ។
តបតាមការអញ្ជើញរបស់បក្សកុម្មុយនីស្តវៀតណាម គណៈប្រតិភូគណបក្សប្រជាជនកម្ពុជា ដឹកនាំដោយឯកឧត្តម សួស យ៉ារ៉ា អនុប្រធានទី១ គណៈទាក់ទងការបរទេស នៃគណៈកម្មាធិការកណ្តាល បានអញ្ជើញចូលរួមកិច្ចប្រជុំតុមូលរៀបចំដោយវិទ្យាស្ថានការទូតវៀតណាម (DAV) ក្រោមប្រធានបទស្តីពី «តួនាទីគណបក្សនយោបាយនៅអាស៊ីអាគ្នេយ៍ ក្នុងការកសាងសហគមន៍អាស៊ាន» នៅក្នុងឱកាស ដែលសាធារណរដ្ឋសង្គមនិយមវៀតណាម ធ្វើជាម្ចាស់ផ្ទះ នៃវេទិកាអនាគតអាស៊ានលើកទី៣ ចាប់ពីថ្ងៃទី៨ ដល់ថ្ងៃទី១០ ខែមិថុនា ឆ្នាំ២០២៦ នៅរដ្ឋធានីហាណូយ ដោយទទួលបានបដិសណ្ឋារកិច្ចស្វាគមន៍យ៉ាងកក់ក្តៅ ពីឯកឧត្តម ឡេ ហាយជុង រដ្ឋមន្ត្រីការបរទេសវៀតណាម និងជាលេខាធិការគណៈកម្មាធិការបក្សក្រសួងការបរទេស ។
ថ្លែងនៅក្នុងកិច្ចពិភាក្សាតុមូល ឯកឧត្តម សួស យ៉ារ៉ា បានលើកឡើងអំពីសារៈសំខាន់ នៃតួនាទីគណបក្សនយោបាយ ក្នុងការតភ្ជាប់រវាងប្រជាជន ទៅកាន់សភា និងរដ្ឋាភិបាល ។
កិច្ចសន្ទនា នៃគណបក្សនយោបាយនៅក្នុងតំបន់អាស៊ីអាគ្នេយ៍ គឺជាយន្តការបំពេញបន្ថែមដល់យន្តការផ្លូវការអាស៊ាន ដើម្បីកសាងទំនុកចិត្តនយោបាយ និងឯកភាពក្នុងដំណើរឆ្ពោះទៅការកសាងសហគមន៍អាស៊ាន ឆ្នាំ២០៤៥ ។
ឆ្លើយតប ទៅនឹងបញ្ហាប្រឈមសកល និងតំបន់រួមមាន សេរីភាពនាវាចរណ៍ សន្តិសុខស្បៀង និងថាមពល ការអភិវឌ្ឍ ដោយចីរភាព និងបញ្ហាប្រឈមឆ្លងដែន ឯកឧត្តម បានគូសបញ្ជាក់អំពីភាពចាំបាច់ នៃកិច្ចសហប្រតិបត្តិការ នយោបាយ និងទំនួលខុសត្រូវរួម ដែលតួនាទីគណបក្សនយោបាយអាចគាំទ្រការសន្ទនា ភាពអត់ធ្មត់ និងការគោរពច្បាប់អន្តរជាតិយ៉ាងពេញលេញ ។
ជាក់ស្តែង យន្តការគណបក្សនយោបាយរួមមានសន្និសីទអន្តរជាតិ នៃបណ្តាគណបក្សនយោបាយនៅអាស៊ី (ICAPP) និងយន្តការកិច្ចប្រជុំកំពូលទ្វេភាគី និងត្រីភាគីរវាងគណបក្សប្រជាជនកម្ពុជា បក្សកុម្មុយនីស្តវៀតណាម និងគណបក្សប្រជាជនបដិវត្តន៍ឡាវ គឺជាគំរូមួយ នៃកិច្ចសន្ទនានយោបាយនៅក្នុងតំបន់។ កម្ពុជា នៅតែប្តេជ្ញាចិត្តចំពោះកិច្ចសន្ទនាការទូត ការដោះស្រាយជម្លោះដោយសន្តិវិធី ផ្អែកលើច្បាប់អន្តរជាតិ ដើម្បីកសាងខ្សែបន្ទាត់ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ និងចូលរួមថែរក្សាសន្តិភាព និងស្ថិរភាព ដើម្បីការអភិវឌ្ឍ និងវិបុលភាពរួមក្នុងតំបន់ ។
កិច្ចពិភាក្សាតុមូល នៃគណបក្សនយោបាយមកពីអាស៊ីអាគ្នេយ៍នេះ ត្រូវបានរៀបចំឡើងជាលើកទី១ នៅក្នុងវេទិកាអនាគតអាស៊ាន លើកទី៣ ដោយមានការចូលរួមពីគណបក្សនយោបាយចំនួន១១ មកពី ៨ប្រទេស រួមមាន ៖ កម្ពុជា ឡាវ ម៉ាឡេស៊ី ហ្វីលីពីន ឥណ្ឌូនេស៊ី ទីម័រឡេស្តេរ ថៃ និងវៀតណាម ។ កិច្ចពិភាក្សាតុមូល បានពិភាក្សាលើប្រធានបទ ចំនួន៣ ដើម្បីសម្រេចចក្ខុវិស័យអាស៊ាន ២០៤៥ ប្រកបដោយភាពធន់ នវានុវត្តន៍ ថាមវន្ត និងប្រជាជនជាស្នូល រួមមាន៖ ១) ការកសាងជំនឿទុកចិត្តក្នុង ចំណោមគណបក្សនយោបាយ ដើម្បីអាស៊ានរឹងមាំ និងមានភាពធន់ ២) បទពិសោធន៍ក្នុងអភិបាលកិច្ច និងការពង្រីកសហប្រតិបត្តិការ ក្នុងចំណោមគណបក្សនយោបាយនៅក្នុងដំណើការកសាងសហគមន៍ អាស៊ាន និង ៣) លើកកម្ពស់តួនាទីគណបក្សនយោបាយ ក្នុងការលើកកម្ពស់សហប្រតិបត្តិការអាស៊ាន និងសម្រេចនូវចក្ខុវិស័យសហគមន៍អាស៊ានឆ្នាំ២០៤៥។
កិច្ចប្រជុំបានឯកភាពថា កិច្ចសន្ទនាគណបក្ស នយោបាយគឺជាយន្តការការទូតផ្លូវក្រោយ (Track 2) ដើម្បីស្វែងរកដំណោះស្រាយនយោបាយសម្រាប់ តំបន់អាស៊ាន បន្ថែមលើយន្តការកិច្ចសហប្រតិបត្តិការរដ្ឋអាស៊ាន (ASEAN) និងកិច្ចសហប្រតិបត្តិ ការសភាអាយប៉ា (AIPA) ហើយនឹងបន្តរៀបចំដោយវិទ្យាស្ថានវិជ្ជាជីវៈការទូតវៀតណាម (DAV) ជា រៀងរាល់ឆ្នាំនៅក្នុងវេទិកាអនាគតអាស៊ាន។
គណៈប្រតិភូគណបក្សនយោបាយមកពីតំបន់អាស៊ីអាគ្នេយ៍ ក៏បានចូលរួមក្នុងពិធីបើកវេទិកាអនាគត អាស៊ានលើកទី៣ នៅព្រឹកថ្ងៃទី៨ ខែមិថុនា ឆ្នាំ២០២៦ ដែលមានការចូលរួមពីនាយករដ្ឋមន្ត្រីមកពីកម្ពុជា ឡាវ ទីម័រឡេស្តេ ថៃ និងវៀតណាម។ ឯកឧត្តម គ្រិន គឹមទូ សមាជិកការិយាល័យនយោបាយ និងជា សមាជិកប្រចាំការគណៈលេខាមជ្ឈិមបក្សកុម្មុយនីស្តវៀតណាម ក៏បានអនុញ្ញាតឱ្យគណៈប្រតិភូគណបក្ស នយោបាយមកពីតំបន់អាស៊ីអេគ្នេយ៍ចូលជួបសម្តែងការគួរសម ដែលក្នុងឱកាសនោះ ឯកឧត្តម សួស យ៉ារ៉ា ក៏បានរំលឹកអំពីដំណើរទស្សនកិច្ចរបស់ ឯកឧត្តម គ្រិន កឹមទូ មកកម្ពុជាជាលើកទី១ កាលពីខែមេសា ឆ្នាំ២០២៦ កន្លងទៅ។
នៅថ្ងៃទី៩ ខែមិថុនា ឆ្នាំ២០២៦ គណៈប្រតិ ភូកម្ពុជាក៏បានចូលរួមអមក្នុងជំនួបសម្តែងការគួរសម រវាង ឯកឧត្តម តូ ឡឺម អគ្គលេខាធិការបក្សនិងជាប្រធានរដ្ឋ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាអនុប្រធានគណបក្សប្រជាជនកម្ពុជា ក្នុងឱកាសបំពេញទស្សនកិច្ចផ្លូវការទៅកាន់ប្រទេស វៀតណាម ដើម្បីរឹតចំណងមិត្តភាពនិងសហប្រតិបត្តិការរវាងបក្ស រដ្ឋ និងប្រជាជន នៃប្រទេសទាំងពីរ ៕
ចែករំលែកព័តមាននេះ