សាឡង់ដឹកខ្សាច់១គ្រឿងបានលិច បន្ទាប់ពីជួបគ្រោះថ្នាក់បើកបុកសរសរស្ពានជ្រោយចង្វារ
- ភ្នំពេញ
រាជធានីភ្នំពេញ ៖ សាឡង់ដឹកខ្សាច់១គ្រឿងបានលិច បន្ទាប់ពីជួបគ្រោះថ្នាក់ ជ្រុលទៅបុកបង្គោលសរសរស្ពានជ្រោយចង្វារ សំណាងគ្មានមនុស្សរងរបួស ។
ហេតុការណ៍នេះបានកើតឡើងកាលពីល្ងាច ថ្ងៃទី១១ ខែមិថុនា ឆ្នាំ២០២៦ទីតាំងកើតហេតុស្ថិតនៅក្រោមស្ពានជ្រោយចង្វារ ស្ថិតក្នុងមូលដ្ឋានសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
យោងតាមប្រភពព័ត៌មានពីពលរដ្ឋដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញសាឡង់ដឹកខ្សាច់១គ្រឿង បានបើកបរលើផ្ទៃទន្លេ ចាប់ពីមុខព្រះបរមរាជវាំង ឆ្ពោះទៅកាន់ស្ពានជ្រោយចង្វារ ដោយធ្វើដំណើរពីត្បូងទៅជើង ។
លុះមកដល់ចំណុចក្រោមស្ពានជ្រោយចង្វារ ដោយមិនដឹងមូលហេតុ គេស្រាប់តែឃើញសាឡង់នោះបុកគល់ស្ពាន បណ្តាលឲ្យលិចទឹកម្តងបន្តិចៗ ។ ហើយភ្លាមៗនោះ គេស្រាប់តែឃើញមានសាឡង់ផ្សេង មកសាងយកសម្ផារដែលមាននៅក្នុងសាឡ់ង និងយកមនុស្សដែលជាប់នៅទីនោះ ឡើងមកសាឡង់១ទៀត ព្រមទាំងអូសយកសាឡង់ដែលកំពុងលិចនោះ ទៅច្រាំងទន្លេម្ខាងទៀតដោយជោគជ័យ ។
គួរបញ្ជាក់ថា ករណីគ្រោះថ្នាក់១នេះ មិនបានបង្កអោយមានមនុស្សរងរបួសនោះទេ ហើយហេតុការណ៍នេះ ក៏ពុំមាននរណាអាចបញ្ចាក់បានថា អាចមកពីបញ្ហាអ្វីអោយប្រាកដនោះដែរ ព្រោះស្ថិតនៅកណ្តាលទន្លេ ៕
ចែករំលែកព័តមាននេះ