ប្តីប្រពន្ធ២នាក់ជិះម៉ូតូឌុបគ្នា ត្រូវម៉ូតូមិនស្គាល់ម៉ាកជិះមកបុ.កនិងកៀរ ធ្លាក់ប្រពន្ធ បោ.កក្បាលស្លា.ប់
- ភ្នំពេញ
រាជធានីភ្នំពេញ ៖ ប្តីប្រពន្ធមួយគូរខណៈជិះម៉ូតូឌុបគ្នាចេញពីលេងផ្ទះបងប្អូនត្រឡប់ទៅកន្លែងស្នាក់នៅវិញ ក៍ត្រូវម៉ូតូមិនស្គាល់ម៉ាកជិះបុកពីក្រោយ បណ្តាលឲ្យធ្លាក់ស្ត្រីជាប្រពន្ធអង្គុយខាងក្រោយបែកក្បាលស្លាប់យ៉ាងអាណោចអាធ័ម នៅវេលាម៉ោង ៨និង៣០នាទីយប់ ថ្ងៃទី៥ ខែកក្កដា ឆ្នាំ២០២៦ ជិតមន្ទីរពេទ្យ ឯកជនមួយកន្លែង តាមបណ្ដោយផ្លូវ ដួងងៀប (ហៅសេះស)ភូមិទ្រា៣ សង្កាត់ស្ទឹងមានជ័យទី៣ ខណ្ឌមានជ័យ ។
សពជនរងគ្រោះ មានឈ្មោះ ព្រឿង ផេង ភេទស្រី អាយុ ៣៦ឆ្នាំ មុខរបរកម្មកររោងចក្រ ស្នាក់នៅកន្លែងធ្វើការ ម្តុំផ្សារដីហុយ មានស្រុកកំណើត ភូមិថ្មី ឃុំស្វាយជ្រំ ស្រុកមេសាង ខេត្តព្រៃវែង ។
ប្រភពព័ត៌មានបានអោយដឹងថា មុនពេលកើតហេតុ គេបានឃើញប្តីប្រពន្ធ២នាក់បានជិះម៉ូតូម៉ាក ហុងដាវ៉េវ ពណ៌ខ្មៅ ពាក់ស្លាកលេខ ព្រៃវែង 1P3775 ដោយបុរសជាប្តីជាអ្នកឌុប ធ្វើដំណើរតាមបណ្ដោយផ្លូវដួងងៀប ទិសដៅពីជើងទៅត្បូង លុះមកដល់ចំនុចកើតហេតុ ក៍ស្រាប់តែម៉ូតូមិនស្គាល់ម៉ាក ជិះវ៉ាជែងក៍ជ្រុលទៅបុកកៀរនិងម៉ូតូរបស់ជនរងគ្រោះពីក្រោយ ដែលធ្វើឲ្យស្ត្រីជាប្រពន្ធអង្គុយខាងក្រោយធ្លាក់ពីលើម៉ូតូបោកក្បាលហូរឈាមស្លាប់យ៉ាងអាណោចអាធ័មនៅកន្លែងកើតហេតុ ចំនែកបុរសជាប្តី ទៅមុខជិត១០០ម៉ែត្រទើបដឹងថាប្រពន្ធធ្លាក់ពីលើម៉ូតូ ។
តាមប្រភពពីបុរសជាប្តីបានឲ្យដឹងថា គាត់ទើបតែឌុបស្ត្រីជាប្រពន្ធ មកពីលេងផ្ទះបងប្អូននៅម្តុំ កាណាឌីយ៉ាស៊ីធី ត្រឡប់ទៅកន្លែងស្នាក់នៅវិញ ក៍ត្រូវម៉ូតូមិនស្គាល់ម៉ាកមកបុកពីក្រោយបណ្តាលឲ្យធ្លាក់ស្ត្រីជាប្រពន្ធស្លាប់តែម្ដង ។ ដោយឡែកខាងម៉ូតូ ដែលបានជិះបុកពីក្រោយ បានជិះរត់គេចបាត់ ។
ក្រោយកើតហេតុមានសមត្ថកិច្ចមូលដ្ឋាននិងជំនាញចរាចរណ៍បានចុះទៅកន្លែងកើតហេតុ និងបានធ្វើលិខិតប្រគល់សពអោយសាច់ញាតិយកទៅធ្វើបុណ្យតាមប្រពៃណីនៅស្រុកកំណើត ។ រីឯម៉ូតូសមត្ថកិច្ចយកទៅរក្សាទុកជូននៅអធិការដ្ឋាននគរបាលខណ្ឌមានជ័យ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ