ផ្លូវជាតិលេខ៧ ពង្រីកជា៤គន្លង ត្រៀមសម្ពោធ ដាក់ឱ្យប្រើប្រាស់ជាផ្លូវការ ក្នុងពេលឆាប់ៗខាងមុខនេះ
- កំពង់ចាម
ខេត្តកំពង់ចាម ៖ កំណត់ផ្លូវជាតិលេខ៧ ពីចំណុចស្គន់មកដល់ក្រុងកំពង់ចាមប្រវែងសរុបជាង៤៥គីឡូម៉ែត្រ ដោយឆ្លងកាត់ស្រុកចំនួន៣ក្នុងនោះមានជើងព្រៃ ព្រៃឈរ កំពង់សៀម ដែលត្រូវបានពង្រីកជាបួនគន្លងមានលក្ខណៈធំទូលាយដើម្បីបញ្ជៀសនៅគ្រោះថ្នាក់ចរាចរណ៍បានមួយកម្រិតធំដែលត្រៀមនិងសម្ពោធហើយប្រើប្រាស់ជាផ្លូវការក្នុងពេលដ៏ឆាប់ខាងមុខ។
លោកធីម វេ អនុប្រធានមន្ទីរសាធារណការខេត្តកំពង់ចាមបានឱ្យដឹងនារសៀលថ្ងៃទី៥កក្កដា ឆ្នាំ២០២៦ថា:
ផ្លូវនេះកាលពីមុនមានលក្ខណៈរាងចង្អៀតហើយនៅតាមដងផ្លូវគេសង្កេតឃើញមានគ្រោះថ្នាក់ចរាចរណ៍បានកើតឡើងស្ទើរតែរាល់ថ្ងៃបណ្ដាលឱ្យមនុស្សស្លាប់របួសឬពិការភាព។ដោយមើលឃើញបែបនេះក្រោមការដឹកនាំរបស់ឯកឧត្តមអ៊ុន ចាន់ដា អភិបាលខេត្តព្រមទាំងថ្នាក់ដឹកនាំក្រសួងសាធារណការនិងដឹកជញ្ជូនបានឯកភាពក្នុងការជួសជុលពង្រីកទៅជាបួនកន្លងដែនមកដល់ពេលនេះត្រូវបានស្ថាបនារួចរាល់មុនផែនការកំណត់។
លោកអនុប្រធានមន្ទីរសាធារណការរូបនេះបានបន្តឲ្យដឹងទៀតថា ផ្លូវដែលត្រូវបានពង្រីកធំនេះមានលក្ខណៈស្រស់ស្អាតដោយនៅកណ្ដាលទ្រូងផ្លូវមានសួនច្បារនិងបង្គោលភ្លើងបំភ្លឺផ្លូវសូឡាត្រូវដាក់ពង្រាយចាប់ពីរង្វង់មូលស្គន់មកដល់ត្រង់ចំណុចនាគព័ន្ធ ក្រុងកំពង់ចាម សម្រាប់បំភ្លឺនៅពេលរាត្រីងាយស្រួលដល់អ្នកបើកយានយន្តគ្រប់ប្រភេទតូចធំដែលធ្វើដំណើរឆ្លងកាត់ទៅវិញទៅមក។ ជាក់ស្ដែងនៅព្រឹកថ្ងៃទី ៥កក្កដា ឆ្នាំ២០២៦ ថ្នាក់ដឹកនាំខេត្តនិងក្រសួងសាធារណការបានអញ្ជើញចុះត្រួតពិនិត្យមើលតាមដងផ្លូវព្រមទាំងកន្លែងដែលត្រូវរៀបចំដាក់សម្ពោធឲ្យប្រើប្រាស់ជាផ្លូវការពីសំណាក់ប្រមុខរាជរដ្ឋាភិបាលកម្ពុជាក្នុងពេលដ៏ឆាប់នេះ។
ជាមួយនោះក្រសួងសាធារណការក៏បានរៀបចំស្ថានីយ៍ថ្លឹងរថយន្តពីរកន្លែងក្នុងនោះមាននៅស្រុកព្រៃឈរនិងស្រុកកំពង់សៀម ដើម្បីថ្លឹងរថយន្តដែលដឹកលើសទម្ងន់ ចាប់តាំងពីពេលដែលដាក់ជញ្ជីងមកឃើញថារថយន្តដឹកទំនិញគ្រប់ប្រភេទមិនមានដឹកលើសទម្ងន់ទៀតនោះឡើយ។ ដើម្បីធានាបានផ្លូវប្រើប្រាស់យូរអង្វែងក្នុងនាមស្ថាប័នជំនាញសូមអំពាវនាវដល់ម្ចាស់អាជីវកម្មយានយន្តប្រភេទធំៗក្នុងនោះមានប្រភេទភ្លៅ ២.៣ ៤ ៥និង៦ ធ្វើយ៉ាងណាយកយានយន្តមកឆៀកលក្ខណៈបច្ចេកទេសដើម្បីធានាបានពេលដែលបើកបរតាមដងផ្លូវធានាបានសុវត្ថិភាពខ្លួនឯងនិងអ្នកដទៃ ព្រមទាំងគោរពច្បាប់ធ្វើយ៉ាងណាកុំឱ្យដឹកលើសទម្ងន់៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ