ទីក្រុងវ៉ាស៊ីនតោន៖ កាលពីយប់មិញ លោកដូណាល់ត្រាំបានចូលរួមពិធីរំលឹកខួប២៥០ឆ្នាំនៃទិវាឯករាជ្យជាតិ៤ កក្កដា ១៧៧៦ ដល់៤ កក្កដា ២០២៦ដោយលោកបានប្រើប្រាស់វោហារសាស្ត្រដូចកាលពីជំនាន់ឃោសនាបោះឆ្នោតប្រធានាធិបតីដូច្នោះដែរ។ លោកព្រមានធ្ងន់ៗថាពួកកុម្មុយនិស្តអាចដណ្ដើមទីតាំងឈរជើងនៅលើទឹកដីអាមេរិក។ បន្ទាប់ពីពន្យារពេល២ម៉ោងដោយសារមានខ្យល់កន្ត្រាក់ លោកត្រាំបង្ហាញខ្លួននៅលើវេទិកាដែលរៀបចំឡើងនៅទីក្រុងវ៉ាស៊ីនតោនដើម្បីថ្លែងសុន្ទរកថា។ លោកច្របល់ចូលគ្នារវាងការបញ្ជ្រាបគំនិតស្នេហាជាតិមាតុភូមិ ជាមួយនឹងការវាយប្រហារអ្វីដែលលោកចាត់ទុកជាការគំរាមកំហែងផ្នែកមនោគមន៍វិជ្ជានៅក្នុងប្រទេសអាមេរិកផង និងនៅបរទេសផង។
លោកបានថ្លែងកោតសរសើរសមិទ្ធផលដែលអាមេរិកសម្រេចបានដូចជា៖ ការទទួលជ័យជម្នះនៅក្នុងសង្គ្រាម, ការបញ្ជូនអ្នកអវកាសទៅចុះចតនៅឋានព្រះចន្ទ, ការហោះហើរជាលើកដំបូងរបស់បងប្អូនត្រកូលរ៉ាយ (Wright brothers) និងប្រព័ន្ធរដ្ឋបាលសាធារណៈនៅអាមេរិក។ ទន្ទឹមនឹងនោះ លោកក៏បានជំរុញឱ្យសភាខង់ហ្ក្រែសប្រញាប់អនុម័តសេចក្ដីព្រាងច្បាប់ដែលនៅជាប់គាំង និងទើរត្រឹមរដ្ឋសភា និងព្រឹទ្ធសភា។ សេចក្ដីព្រាងច្បាប់នោះអំពាវនាវឱ្យដាក់កំហិតលើការបោះឆ្នោតផ្ញើតាមប្រៃសណីយ៍ និងតម្រូវឱ្យប្រជាជនបង្ហាញថាពួកគេមានសញ្ជាតិអាមេរិកពេញលេញមុននឹងអនុញ្ញាតឱ្យចុះឈ្មោះបោះឆ្នោត។
លោកត្រាំថ្លែងថាលោកបានបោសសម្អាតកម្លាំងយោធារបស់អ៊ីរ៉ង់។ លោកសូមអំពាវនាវឱ្យប្រជាជនប្រុងប្រយ័ត្នចំពោះការរីកដុះដាលនៃលទ្ធិកុម្មុយនិស្តនៅអាមេរិក។ លោកថាយើងត្រូវតែបញ្ឈប់ការគំរាមកំហែងនេះជាបន្ទាន់ដើម្បីកុំឱ្យលទ្ធិនេះចាប់បដិសន្ធិបាន។ លោកបានប្រៀបប្រដូចលទ្ធិកុម្មុយនិស្តទៅនឹងកោសិកាមហារីកដែលចេះតែរីករាលដាលជាលំដាប់ប្រសិនបើយើងមិនខិតខំកាត់ផ្ដាច់ឫសគល់របស់វាឱ្យបានទាន់ពេលវេលា។ ប្រធានាធិបតីមកពីគណបក្សសាធាណរដ្ឋនិយមរូបនេះធ្លាប់ចាត់ទុកបេក្ខជនប្រធានាធិបតីមកពីគណបក្សប្រជាធិបតេយ្យជាពួកកុម្មុយនិស្ត។ ប៉ុន្តែនៅក្នុងការថ្លែងសុន្ទរកថាកាលពីយប់មិញ លោកមិនបានរំលេចត្រង់ចំណុចនេះទេ។
មេដឹកនាំអាមេរិកជំនាន់មុនៗពុំដែលបង្ហាញខ្លួនផ្ទាល់នៅក្នុងពិធីបុណ្យឯករាជ្យជាតិថ្ងៃទី៤ ខែកក្កដាឡើយ។ ប៉ុន្តែលោកត្រាំហាក់ដូចជាចង់ច្របល់ចូលគ្នារវាងការថ្លែងសុន្ទរកថានយោបាយជាផ្លូវការ និងការឆ្លៀតបញ្ចេញទស្សនៈនយោបាយស្រដៀងនឹងការឃោសនាបោះឆ្នោត។ លើកលែងតែការថ្លែងរបស់លោកត្រាំកាលពីឆ្នាំ២០១៩មួយចេញ គ្មានប្រធានាធិបតីអាមេរិកណាម្នាក់ឡើងថ្លែងសុន្ទរកថានៅដឹម៉ល (the Mall) ទាល់តែសោះចាប់តាំងពីឆ្នាំ១៩៥១។ ភ្ញៀវដែលអញ្ជើញចូលរួមពិធីនោះត្រូវរង់ចាំរាប់ម៉ោងទម្រាំអាចចូលទៅបាន។ ម៉្យាងពួកគេត្រូវឆ្លងកាត់ការត្រួតពិនិត្យសន្តិសុខយ៉ាងតឹងរ៉ឹង និងម៉្យាងទៀត ពួកគេត្រូវស៊ូទ្រាំនឹងអាកាសធាតុក្ដៅហួតហែងខ្លាំងដល់៣៩អង្សា។ ដោយសារក្ដៅខ្លាំងដល់កម្រិតនេះ គេត្រូវលុបចោលការដើរក្បួនព្យុហយាត្រា និងការរៀបចំកម្មវិធី១ចំនួនទៀត៕ ប្រភព Reuters
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ