រាជធានីភ្នំពេញ ៖ កម្លាំងប៉ុស្តិ៍នគរបាលរដ្ឋបាលស្រះចក សហការជាមួយកម្លាំងអធិការដ្ឋាននគរបាលខណ្ឌដូនពេញ បានបើកប្រតិបត្តិការបង្ក្រាប និងឃាត់ខ្លួនជនសង្ស័យម្នាក់ ភ្លាមៗក្រោយធ្វើសកម្មភាពលួចម៉ូតូពីនិស្សិតម្នាក់ ។ នេះបើយោងតាមការប្រកាសនាយប់ថ្ងៃទី០៥ ខែកក្កដា ឆ្នាំ២០២៦ នេះ ដោយក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ។
ហេតុការណ៍នេះបានកើតឡើងកាលពីវេលាម៉ោង០៥:៣០ នាទីល្ងាច ថ្ងៃទី០៥ ខែកក្កដា ឆ្នាំ២០២៦ នៅចំណុចលើសួនច្បារមុខក្រុមប្រឹក្សាអភិវឌ្ឍន៍កម្ពុជា (CDC) តាមបណ្តោយផ្លូវព្រះស៊ីសុវត្ថិ ភូមិ១១ សង្កាត់ស្រះចក ខណ្ឌដូនពេញ។
ចំពោះជនបង្កឡើងដោយជនសង្ស័យឈ្មោះ កៅ សុវណ្ណារិទ្ធ ហៅម៉ៅ ភេទប្រុស អាយុ៣៨ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ បានធ្វើសកម្មភាពលួចយកម៉ូតូរបស់ជនរងគ្រោះឈ្មោះ រ័ត្ន លីជីវ ភេទប្រុស អាយុ២៥ឆ្នាំ ជនជាតិខ្មែរ មុខរបរនិស្សិត ស្នាក់នៅផ្ទះជួល៣៥ ផ្លូវK៥ ភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ បានសម្រេចហើយបម្រុងជិះម៉ូតូគេចខ្លួន ។
ភ្លាមនោះជនរងគ្រោះភ្ញាក់ដឹងទាន់ឃើញក៏ស្រែកឆោឡោចោរៗផ្អើលដេញ ស្របពេលនោះកម្លាំងជំនាញខណ្ឌ និងប៉ុស្តិ៍ល្បាតក្នុងមូលដ្ឋានទៅដល់អន្តរាគមន៍ឃាត់ខ្លួនជនសង្ស័យ រួមនឹងវត្ថុតាងម៉ូតូ នាំប៉ុស្តិ៍នគរបាលរដ្ឋបាលស្រះចកធ្វើការសាកសួរ។
បច្ចុប្បន្នជនសង្ស័យខាងលើ កម្លាំងជំនាញខណ្ឌ ប៉ុស្តិ៍ កំពុងអនុវត្តតាមនីតិវិធី។ដោយឡែកម៉ូតូជនរងគ្រោះសមត្ថកិច្ចបានប្រគល់ជូនទៅម្ចាស់វិញ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ