រាជធានីភ្នំពេញ ៖ គំនិតច្នៃប្រឌិត និងសមត្ថភាពផ្នែកបញ្ញាសិប្បនិម្មិត (AI) របស់យុវនិស្សិតកម្ពុជា ត្រូវបានបើកបង្ហាញយ៉ាងអស្ចារ្យ ក្នុងពិធីបើកការប្រកួតប្រជែងរ៉ូបូតថ្នាក់ជាតិ (ABU Robocon Cambodia 2026) លើកទី១៣ នាថ្ងៃទី៥ ខែកក្កដា ឆ្នាំ២០២៦ នេះ ។
ព្រឹត្តិការណ៍ត្រូវបានរៀបចំឡើងដើម្បីស្វែងរកក្រុមជើងឯកតំណាងឱ្យព្រះរាជាណាចក្រកម្ពុជា ទៅចូលរួមប្រកួតប្រជែងកម្រិតអន្តរជាតិ ABU Robocon 2026 នៅទីក្រុងហុងកុង នាខែសីហាខាងមុខ ដោយពិធីនេះបានធ្វើឡើងនៅសាលដំបូលទូកនៃសាកលវិទ្យាល័យភូមិន្ទភ្នំពេញ (RUPP)។
ក្នុងនោះដែរ លោក ឃឹម វុទ្ធី អគ្គនាយកទូរទស្សន៍ជាតិកម្ពុជា (ទទក) នៅថ្ងៃទី៥ ខែកក្កដា ឆ្នាំ២០២៦ បានអញ្ជើញជាអធិបតីបើកការប្រកួតប្រជែងរ៉ូបូតថ្នាក់ជាតិ (ABU Robocon Cambodia 2026) លើកទី១៣ ឆ្នាំ២០២៦។ លោក ឃឹម វុទ្ធី បានគូសបញ្ជាក់ថា ការរៀបចំព្រឹត្តិការណ៍ដ៏អស្ចារ្យនេះ នៅលើទឹកដីប្រវត្តិសាស្ត្រ «សាលដំបូលទូក» នៃសាកលវិទ្យាល័យភូមិន្ទភ្នំពេញ គឺជានិមិត្តរូប និងជាបេះដូងនៃការអប់រំកម្រិតឧត្តមសិក្សានៅកម្ពុជា ។
អគ្គនាយក ទទក បានបន្តថា ឆ្នាំ២០២៦នេះ គឺជាគម្រប់ខួបលើកទី១៣ (គិតចាប់តាំងពីឆ្នាំ២០១៤មក) ដែលទូរទស្សន៍ជាតិកម្ពុជា បានលះបង់កម្លាំងកាយចិត្ត និងធនធានដើម្បីដឹកនាំ និងរៀបចំព្រឹត្តិការណ៍ប្រកួតប្រជែងរ៉ូបូតថ្នាក់ជាតិនេះឡើង ។ ក្នុងរយៈពេលជាងមួយទសវត្សរ៍កន្លងមកនេះ យើងបានឃើញនូវការផ្លាស់ប្ដូរ និងការរីកចម្រើនយ៉ាងគួរឱ្យកត់សម្គាល់លើផ្នែកចំណេះដឹង សមត្ថភាព និងបច្ចេកវិទ្យារបស់យុវជនកម្ពុជា ។
លោក ឃឹម វុទ្ធី បានថ្លែងថា វេទិកានេះ មិនត្រឹមតែជាទីលានប្រកួតយកឈ្នះចាញ់នោះទេ ប៉ុន្តែវា គឺជាសាលារៀនជឿនលឿនមួយ ដែលផ្ដល់ឱកាសឱ្យយុវនិស្សិតមកពីបណ្ដាគ្រឹះស្ថានឧត្តមសិក្សានានា បានជួបជុំគ្នា ផ្លាស់ប្ដូរបទពិសោធន៍ និងបណ្ដុះនូវគំនិតច្នៃប្រឌិតថ្មីៗ ។
ជាពិសេស នៅក្នុងយុគសម័យបច្ចុប្បន្នដែលជា «សម័យកាលនៃបញ្ញាសិប្បនិម្មិត (AI)» ការប្រកួតប្រជែងរ៉ូបូត ឆ្នាំ២០២៦នេះ កាន់តែមានភាពពិសេស និងទំនើបជាងមុន ។
លោក ឃឹម វុទ្ធី បានបន្ថែមថា រ៉ូបូតដែលប្អូនៗយកមកប្រកួតនៅថ្ងៃនេះ មិនត្រឹមតែដំណើរការដោយប្រព័ន្ធមេកានិច ឬម៉ូទ័រធម្មតាប៉ុណ្ណោះទេ ប៉ុន្តែវាត្រូវបានបញ្ចូលនូវបច្ចេកវិទ្យា AI មុខងារគណនាក្បួនដោះស្រាយ (Algorithms) ដ៏ស្មុគស្មាញ និងប្រព័ន្ធសេនស័រវាស់ស្ទង់ទំនើប ដែលបង្ហាញឱ្យឃើញថា យុវជនកម្ពុជាមានសមត្ថភាពខ្ពស់ អាចដើរទាន់បដិវត្តកម្មឌីជីថល និងបច្ចេកវិទ្យាសកល។
លោកបញ្ជាក់ថា៖«យើងទាំងអស់គ្នានៅចងចាំបានយ៉ាងច្បាស់ថា កម្ពុជាធ្លាប់សម្រេចបាននូវជោគជ័យជាប្រវត្តិសាស្ត្រក្នុងការធ្វើជាម្ចាស់ផ្ទះនៃការប្រកួតប្រជែងរ៉ូបូតអន្តរជាតិ (ABU Robocon) ក្នុងឆ្នាំ២០២៣កន្លងទៅ ស្របពេលជាមួយគ្នានឹងភាពជោគជ័យដ៏ត្រចះត្រចង់នៃការរៀបចំព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ។ ស្មារតីនៃភាពជាម្ចាស់ និងជោគជ័យដ៏ធំធេងទាំងនោះ នៅតែជាកម្លាំងចលករជំរុញឱ្យយើងបន្តស្វែងរកភាពល្អឥតខ្ចោះនៅក្នុងឆ្នាំនេះ ។
សម្រាប់ឆ្នាំ២០២៦នេះ ទូរទស្សន៍ជាតិកម្ពុជា មានមោទនភាពយ៉ាងខ្លាំង ដោយទទួលបានការចូលរួមប្រកួតប្រជែងយ៉ាងស្វិតស្វាញពីសំណាក់សាកលវិទ្យាល័យ និងវិទ្យាស្ថានល្បីៗទាំង៥ រួមមាន ៖ ទី១. វិទ្យាស្ថានបច្ចេកវិទ្យាកម្ពុជា (ITC) មានរ៉ូបូតចំនួន២ក្រុម, ទី២. វិទ្យាស្ថានជាតិពហុបច្ចេកទេសកម្ពុជា (NPIC) មានរ៉ូបូតចំនួន២ក្រុម, ទី៣. វិទ្យាស្ថានជាតិបណ្តុះបណ្តាលបច្ចេកទេស (NTTI) មានរ៉ូបូតចំនួន១ក្រុម, ទី៤. សាកលវិទ្យាល័យជាតិគ្រប់គ្រង (NUM) មានរ៉ូបូតចំនួន២ក្រុម, និងទី៥. វិទ្យាស្ថានពហុបច្ចេកទេសព្រះកុសុមៈ (PPI) មានរ៉ូបូតចំនួន ១ក្រុម» ។
សូមជម្រាបថា ការប្រកួតនៅថ្ងៃនេះ គឺដើម្បីស្វែងរកក្រុមជើងឯកលេខ១ ប្រចាំព្រះរាជាណាចក្រកម្ពុជា ដើម្បីតំណាងឱ្យជាតិយើងទាំងមូល ធ្វើដំណើរទៅចូលរួមការប្រកួតប្រជែងកម្រិតអន្តរជាតិ ABU Robocon 2026 នៅទីក្រុងហុងកុង នាខែសីហា ឆ្នាំ២០២៦ ខាងមុខនេះ ក្រោមប្រធានបទដ៏គួរឱ្យជក់ចិត្តគឺ ក្បាច់គុណកុងហ្វូ “Kung Fu Quest” ដែលជាការរួមបញ្ចូលគ្នារវាងក្បាច់គុនបុរាណចិន និងបច្ចេកវិទ្យារ៉ូបូត AI។
លោកក៏បានថ្លែងអំណរគុណយ៉ាងជ្រាលជ្រៅបំផុតជូនចំពោះលោក នេត្រ ភក្ត្រា រដ្ឋមន្ត្រីក្រសួងព័ត៌មាន ដែលជានិច្ចកាលតែងតែយកចិត្តទុកដាក់ខ្ពស់ផ្តល់ការគាំទ្រ និងចង្អុលបង្ហាញផ្លូវដល់អគ្គនាយកដ្ឋានទូរទស្សន៍ជាតិកម្ពុជា ដើម្បីអភិវឌ្ឍវិស័យផ្សព្វផ្សាយ និងបច្ចេកវិទ្យាទំនើប ។ ព្រឹត្តិការណ៍នេះពិតជាបានរួមចំណែកយ៉ាងសំខាន់ ក្នុងការលើកកម្ពស់វិស័យបច្ចេកវិទ្យា និងនវានុវត្តន៍នៅកម្ពុជា ស្របតាមចក្ខុវិស័យរបស់រាជរដ្ឋាភិបាលក្នុងការកសាងសេដ្ឋកិច្ចឌីជីថល៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ