ល្បិចថ្មីបោ.កលុយតាមរូបភាព «បន្លំខ្លួនជាបុគ្គលិកធនាគារ» កំពុងរាតត្បាត ស្វែងយល់ជាបន្ទាន់មុនហួសពេល
- ភ្នំពេញ
រាជធានីភ្នំពេញ ៖ សូមប្រុងប្រយ័ត្នតាមប្រព័ន្ធបច្ចេកវិទ្យា ក្រោមរូបភាព «ការឆបោក បន្លំខ្លួន ជាបុគ្គលិកធនាគារ» ។ នេះបើយោងតាមផេក នាយកដ្ឋានប្រឆាំងបទល្មើសបច្ចេកវិទ្យាបានប្រកាសនាព្រឹកថ្ងៃទី០៦ ខែកក្កដានេះ ។
នាយកដ្ឋានប្រឆាំងបទល្មើសបច្ចេកវិទ្យា សង្កេតឃើញមាន ករណីជនអនាមិកជាច្រើន បានបន្លំខ្លួនជាបុគ្គលិកធនាគារ បានទាក់ទងមកលោក-អ្នក តាមរយៈទូរស័ព្ទ ហើយក៏បានប្រាប់ថា ពួកគេជាបុគ្គលិកធនាគារ និងបានប្រាប់ថា គណនីធនាគាររបស់លោក-អ្នក ត្រូវបានខូចហើយ ដែលតម្រូវឱ្យលោក-អ្នកផ្ទេរប្រាក់ចេញសិន ដើម្បីជួសជុលគណនីធនាគាររបស់លោក-អ្នក ។
នាយកដ្ឋានប្រឆាំងបទល្មើសបច្ចេកវិទ្យា បានបន្តថា ក្រោយជួសជុលរួចពួកគេនឹងផ្ទេរប្រាក់ជូនលោក-អ្នកវិញ ក្នុងថ្ងៃទីខែឆ្នាំដដែល ។ ក្រោយមកជនអនាមិកបានតម្រូវឱ្យលោក-អ្នក ភ្ជាប់លេខតេលេក្រាម(Telegram) ដើម្បីងាយស្រួលជជែកគ្នា និងបញ្ជុះបញ្ចូល ឱ្យលោក-អ្នកផ្ទេរប្រាក់ទៅគណនីធនាគាររបស់ជនអនាមិកនោះ តាមរយៈQR Code និងបន្តឱ្យលោក-អ្នក ផ្ទេរប្រាក់បន្ថែមទៀត ដោយជនអនាមិកនោះមិនបានផ្ទេរប្រាក់ទៅឱ្យលោក-អ្នកត្រឡប់មកវិញនោះទេ ។
នាយកដ្ឋានប្រឆាំងបទល្មើសបច្ចេកវិទ្យា សូមក្រើនរំលឹកដល់សាធារណជន សូមមេត្តាពិនិត្យ ពិចារណាអោយបានហ្មត់ចត់ មុនសម្រេចចិត្តក្នុងការវេរលុយ ជាពិសេសសូមពិនិត្យថាតើគណនីធនាគាររបស់ លោក-អ្នកមានបញ្ហាទេ ប្រសិនបើគណនីធនាគាររបស់លោក-អ្នកមានបញ្ហាត្រូវទៅធនាគារដើម្បីដោះស្រាយបញ្ហាគណនីធនាគាររបស់លោក-អ្នកផ្ទាល់ ជៀសវាងទទួលនូវហានិភ័យនានានៅពេលក្រោយ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ