បុរសម្នាក់ផ្លោះរបងចូលទៅវា.យ និងទាញកាំបិ.តផ្គា.ក់គំរា.មដល់ជីវិតយុវជនម្នាក់ ចោទថាលួ.ចលុយខ្លួន
- កំពង់ស្ពឺ
ខេត្តកំពង់ស្ពឺ ៖ បុរសម្នាក់ត្រូវបាននគរបាលស្រុកសំរោងទងធ្វើការឃាត់ខ្លួនក្រោយពីធ្វើសកម្មភាព វាយ និង យកកាំបិតផ្គាក់គំរាមកាប់សម្លាប់ទៅលើយុវជនម្នាក់ទៀតដែល រស់នៅក្នុងភូមិជាមួយគ្នា ចោទថាលួចលុយខ្លួន សង្ស័យគ្រឿងញៀនធ្វើទុក្ខរើឡើង ហើយទប់អារម្មណ៍មិនជាប់។
ករណីហិង្សាដោយចេតនា ទាញកាំបិតគំរាមកាប់សម្លាប់លើយុវជនម្នាក់ត្រូវបានកម្លាំងនគរបាលឃាត់ខ្លួន បានកើតឡើងកាលពីវេលាម៉ោង១១ព្រឹកថ្ងៃទី៥ ខែកក្កដា ឆ្នាំ២០២៦ នៅក្នុងភូមិត្រពាំងជ្រៅ ឃុំកាហែង ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយដឹងថានៅមុនពេលឃាត់ខ្លួនបុរសសង្ស័យខាងលើ គឺនៅវេលា ម៉ោង៨និង២០នាទីព្រឹកថ្ងៃទី៥ ខែកក្កដា ឆ្នាំ២០២៦ មានឈ្មោះ ស៊ឺន លាងហេង ភេទប្រុស អាយុ១៨ឆ្នាំ រស់នៅក្នុងភូមិត្រពាំងជ្រៅ ឃុំកាហែង ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្តឹងទៅលើឈ្មោះ វ៉ង់ វុធ ភេទប្រុស អាយុ៤០ឆ្នាំ រស់នៅក្នុងភូមិជាមួយគ្នា។ យុវជនខាងលើបានរៀបរាប់ថា កាលពីវេលាម៉ោង៨និង១០នាទីថ្ងៃទី៥ ខែកក្កដា រូបគេកំពុងរុះរើខ្ទមមុខផ្ទះ ពេលនោះស្រាប់តែ ឈ្មោះ វុធ បានផ្លោះរបង ហើយបានចោទប្រកាន់ថាខ្លួនលួចលុយ និងបានវាយរូបខ្លួនមួយដៃរួច ហើយបាន ជនដៃដល់បានដើរទៅយកកាំបិតផ្គាក់ពីផ្ទះមករកកាប់និងគំរាមកាប់សំលាប់ រូបខ្លួន( ឈ្មោះ លាង ហេង) ដោយកើតចិត្តខឹង រូបគេក៏បានយកចបកាប់បំរ៉ុងវាយតប ទៅលើឈ្មោះ វុធវិញដែរ ប៉ុន្តែត្រូវបានអ្នកជិតខាងជួយឃាត់។ ទើបសម្រេចចិត្តទៅដាក់ពាក្យបណ្តឹងឱ្យសមត្ថកិច្ចជួយអន្តរាគមន៍ និងរកយុត្តិធម៌ឱ្យ។
នគរបាលស្រុកសំរោងទងបានបន្តឲ្យដឹងទៀតថាក្រោយពីទទួលបានពាក្យបណ្ដឹងយុវជនរងគ្រោះខាងលើរួចមកនៅវេលាម៉ោង១១ព្រឹក ថ្ងៃទី៥ ខែកក្កដា ឆ្នាំ២០២៦ កម្លាំងព្រហ្មទណ្ឌស្រុក សហការជាមួយកម្លាំងប៉ុស្ដិ៍នគរបាលរដ្ឋបាលឃុំកាហែង បានចុះទៅឃាត់ឈ្មោះ វ៉ង់ វុធ មកសាកសួរ។ ជនសង្ស័យបានឆ្លើយសារភាពថាខ្លួនពិតជាបានវាយ និងកាន់កំបិតផ្គាក់គំរាមសម្លាប់យុវជនរងគ្រោះខាងលើពិតប្រាកដមែន។ ក្រោយឃាត់ខ្លួនបុរសជាជនសង្ស័យនគរបាលដកហូតបាន÷ម្សៅក្រាមពណ៌សសង្ស័យជាគ្រឿងញៀនចំនួន ២កញ្ចប់តូចនៅជាប់នឹងខ្លួន និង កាំបិតផ្គាក់ចំនួន១ផងដែរ។
នគរបាលស្រុកសំរោងទងបានបញ្ជាក់ដឹងថា ក្រោយឃាត់ខ្លួនជនសង្ស័យរួមជាមួយនឹងវត្ថុតាង នគរបាលបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ