ទីក្រុងវ៉ាស៊ីនតោន ៖ លោកប្រធានាធិបតី ដូណាល់ ត្រាំ (Donald Trump) កាលពីថ្ងៃទី២៨ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) បានប្រកាសថា សហរដ្ឋអាមេរិកសម្រេចបានកិច្ចព្រមព្រៀងគ្រប់គ្រងប្រេងបម្រុងជាង ៦៥ពាន់លានបារ៉ែលរបស់ប្រទេសវ៉េណេស៊ុយអេឡា ដោយលោកបានប្រសិទ្ធនាមថា «កិច្ចព្រមព្រៀងប្រេងដ៏ធំបំផុតនៅក្នុងប្រវត្តិសាស្ត្រពិភពលោក»។ នេះបើតាមប្រភពពី BBC បានចេញផ្សាយនៅថ្ងៃទី៣០ ខែសីហា ឆ្នាំ២០២៦។
ប្រធានាធិបតីទី ៤៧ របស់សហរដ្ឋអាមេរិក វ័យ៨០ឆ្នាំរូបនេះ បានបញ្ជាក់ក្នុងសារបង្ហោះលើបណ្តាញសង្គមថា កិច្ចព្រមព្រៀងនេះ នឹងធ្វើឱ្យទុនបម្រុងប្រេងរបស់សហរដ្ឋអាមេរិកកើនឡើងជាងទ្វេដង និងជួយបញ្ចុះតម្លៃប្រេងសាំងយ៉ាងច្រើនសម្រាប់ពលរដ្ឋអាមេរិកទាំងអស់ផងដែរ។ ជាមួយគ្នានោះ ប្រធានាធិបតីបណ្តោះអាសន្នរបស់វ៉េណេស៊ុយអេឡា លោកស្រី ដែលស៊ី រ៉ូឌ្រីហ្គេស (Delcy Rodríguez) បានសរសើរថា កិច្ចព្រមព្រៀងមួយដែលនឹងជួយដល់ការងើបឡើងវិញនូវសេដ្ឋកិច្ចរបស់ប្រទេសវ៉េណេស៊ុយអេឡា។
ថ្មីៗនេះ លោកប្រធានាធិបតី ត្រាំ កំពុងស្ថិតក្រោមសម្ពាធក្នុងស្រុកលើការទប់ស្កាត់តម្លៃប្រេងឥន្ធនៈ ដែលបានហក់ឡើងខ្ពស់ដោយសារតែសង្គ្រាមជាមួយអ៊ីរ៉ង់។ ទោះយ៉ាងណា លោកបានប្តេជ្ញារុករកប្រេងបម្រុងរបស់វ៉េណេស៊ុយអេឡា ដែលប្រទេសមានប្រេងបម្រុងច្រើនបំផុតនៅលើពិភពលោក បន្ទាប់ពីសហរដ្ឋអាមេរិកបានចាប់ខ្លួនអតីតប្រធានាធិបតី លោក នីកូឡាស ម៉ាឌូរ៉ូ (Nicolás Maduro) កាលពីខែមករាកន្លងទៅ ក្រោមហេតុផលនាំខ្លួនមកកាត់ទោសនៅទីក្រុងញូវយ៉កពីបទចោទប្រកាន់ពីបទជួញដូរគ្រឿងញៀន។
លោកស្រី រ៉ូឌ្រីហ្គេស បានបញ្ជាក់ក្នុងសេចក្តីថ្លែងការណ៍មួយថា កិច្ចព្រមព្រៀងនេះ តម្រូវឱ្យមានការអភិវឌ្ឍទីតាំងប្រេងយុទ្ធសាស្ត្រចំនួន ១៧ ដែលត្រូវបានបញ្ជាក់ថាមានប្រេងបម្រុងចំនួន ៦៥ ពាន់លានបារ៉ែល ជាមួយការវិនិយោគលើសពី ១០០ ពាន់លានដុល្លារអាមេរិក និងចំណូលពន្ធជាង ២០៩ ពាន់លានដុល្លារអាមេរិកសម្រាប់វ៉េណេស៊ុយអេឡាផងដែរ។ ការវិនិយោគទាំងនេះ នឹងមិនត្រឹមតែរួមចំណែកដល់ការងើបឡើងវិញ ក៏ដូចជាការធ្វើទំនើបកម្មឧស្សាហកម្មប្រេងវ៉េណេស៊ុយអេឡាប៉ុណ្ណោះទេ ប៉ុន្តែថែមទាំងជំរុញដល់កំណើនសេដ្ឋកិច្ចជាតិ សន្តិសុខថាមពល និងតុល្យភាពកាន់តែប្រសើរឡើងនៅក្នុងទីផ្សារអន្តរជាតិផងដែរ ដោយលោកស្រីបន្ថែមថា កិច្ចព្រមព្រៀងនេះ នឹងមានឥទ្ធិពលយ៉ាងខ្លាំងលើការរស់ឡើងវិញនៃប្រទេសវ៉េណេស៊ុយអេឡា។
យ៉ាងណាមិញ ដើម្បីឱ្យកិច្ចព្រមព្រៀងនេះដំណើរការទៅបាន លុះត្រាតែត្រូវឆ្លងច្បាប់ និងរដ្ឋធម្មនុញ្ញរបស់វ៉េណេស៊ុយអេឡាសិន។ គេក៏នៅមិនទាន់ច្បាស់នៅឡើយទេថា តើកិច្ចព្រមព្រៀងនេះ អាចនឹងប្រឈមមុខនឹងការតវ៉ាផ្នែកច្បាប់ និងរដ្ឋធម្មនុញ្ញក្នុងប្រទេសអាមេរិកខាងត្បូងមួយនេះដែរឬទេ?
ចែករំលែកព័តមាននេះ