ប្រទេសនេប៉ាល់ ៖ ផ្ទះពណ៌បៃតងពីរជាន់១ខ្នងដ៏ល្បីល្បាញ នៅក្នុងប្រទេសនេប៉ាល់បានក្លាយជានិមិត្តរូបនៃការរស់រានមានជីវិតដ៏គួរឱ្យភ្ញាក់ផ្អើលបំផុត បន្ទាប់ពីវាបានឈរយ៉ាងរឹងមាំមិនរលំទៅណា អំឡុងពេលស្ថិតនៅចំណុចកណ្តាលនៃគ្រោះមហន្តរាយទឹកជំនន់ភ្លាមៗ កាលពីថ្ងៃទី២៦ ខែសីហា ឆ្នាំ២០២៦ កន្លងទៅ។
ផ្ទះ១ខ្នង បានបន្តឈរយ៉ាងរឹងមាំចំកណ្តាលគ្រោះទឹកជំនន់ដ៏បំផ្លិចបំផ្លាញនៅក្នុងប្រទេសនេប៉ាល់ បើទោះបីជាកម្លាំងទឹកកំពុងហូរគំហកបានលិចលង់តំបន់នោះ និងហូរកាត់ផ្តាច់ និងបំផ្លាញស្ពាន សំណងអគារជាច្រើនជុំវិញនោះយ៉ាងណាក៏ដោយ។ វីដេអូដ៏រន្ធត់ ដែលបានផ្សព្វផ្សាយពាសពេញបណ្តាញសង្គម បង្ហាញពីសមាជិកគ្រួសារយ៉ាងហោចណាស់៣នាក់ កំពុងឈរលើយ៉រខាងមុខ ដើម្បីរងចាំការជួយសង្គ្រោះ ខណៈពេលដែលកម្លាំងទឹកជំនន់ លាយឡំដោយភក់ ដុំថ្ម និងកម្ទេចកម្ទីដ៏ច្រើនផ្សេងទៀត បានបោកបក់យ៉ាងខ្លាំងក្លា។ ទោះយ៉ាងណាក៏ដោយ វីដេអូបន្ទាប់មកទៀតក៏បានបញ្ជាក់ដែរថា អ្នកនៅក្នុងផ្ទះទាំងអស់បានរស់រានមានជីវិត និងត្រូវបានជួយសង្គ្រោះដោយសុវត្ថិភាពផងដែរ។
ការបាក់ផ្ទាំងទឹកកកបានបណ្តាញឱ្យដុំទឹកកក ថ្ម ភក់ និងទឹក ហូរយ៉ាងគំហុកតាមទន្លេ Bhote Koshi នៅតំបន់ព្រំដែនរវាងប្រទេសនេប៉ាល់ និងតំបន់ទីបេរបស់ចិន ប៉ុន្តែផ្ទះពណ៌បៃតង១ខ្នងនោះ បែរជាទប់ទល់នឹងសម្ពាធកម្លាំងទឹក ការប៉ះទង្គិចពីកម្ទេចកម្ទី និងកម្លាំងហូរច្រោះនៃគ្រឹះសំណង់។
បើទោះបីជាមិនទាន់មានការត្រួតពិនិត្យរចនាសម្ព័ន្ធដោយផ្ទាល់ជាផ្លូវការណាមួយ ដើម្បីបញ្ជាក់ច្បាស់ថា ហេតុអ្វីសំណងផ្ទះនោះ អាចបន្តឈរយ៉ាងរឹងមាំតទល់នឹងកម្លាំងទឹកក៏ដោយ ក៏អ្នកជំនាញមួយចំនួនបានលើកឡើងថា សសរ និងធ្នឹមបេតុងអាម៉េ ដើរតួយ៉ាងសំខាន់ជួយរក្សាបន្ទុកសំណង់ឱ្យជាប់យ៉ាងរឹងមាំ។ ជើងតាងជ្រៅ ឬគ្រឹះបោះណែនទៅក្នុងផ្ទាំងថ្ម អាចជួយទប់ទល់នឹងការដួលរលំ និងការច្រោះដី ស្របពេលទិសដៅសង់ផ្ទះទៀតសោត អាចជួយបំបែកចរន្តទឹក កាត់បន្ថយសម្ពាធផ្ទាល់មកលើជញ្ជាំង និងជួយបង្វែរខ្សែទឹកដែលហូរខ្លាំងបំផុត ខណៈកម្ទេចកម្ទីជាច្រើនបានហូរផុតសំណងផ្ទះនោះ។
ជាការកត់សម្គាល់ បណ្តាអគារនៅក្បែរនោះបានដួលរលំ បន្ទាប់ពីគ្រឹះមិនរឹងមាំដែលបានបាត់បង់ដីទ្រទ្រង់។ ជារួមការសាងសង់ដ៏រឹងមាំ ទិសដៅលំហូរទឹកអំណោយផល គួបផ្សំនឹងសំណាងផងនោះ ទំនងជាបានរួមបញ្ចូលគ្នាជួយឱ្យផ្ទះពណ៌បៃតង១ខ្នងនោះមិនរលំទៅណា ដើម្បីរក្សាជីវិតម្ចាស់របស់វាពីគ្រោះមហន្តរាយទឹកជំនន់ ។
គួរបញ្ជាក់ថា យោងតាមប្រភពពីសារព័ត៌មាន Reuters គិតត្រឹមព្រឹកថ្ងៃទី៣០ ខែសីហា ឆ្នាំ២០២៦ ចំនួនអ្នកស្លាប់នៅក្នុងប្រទេសនេប៉ាល់ និងតំបន់ទីបេរបស់ចិន ដោយសារគ្រោះមហន្តរាយទឹកជំនន់បានកើនឡើងដល់ ៧៥០ នាក់ ហើយមនុស្សចំនួន ៣ ០៤៤ នាក់ទៀតកំពុងបាត់ខ្លួន ខណៈដែលក្រុមអ្នកជួយសង្គ្រោះបានផ្លាស់ទីទៅកាន់ទីទួលខ្ពស់ ដោយសារតែទឹកភ្លៀងបានធ្វើឱ្យកម្រិតទឹកទន្លេកើនឡើងខ្លាំង៕ ដកស្រង់ ៖ NDTV និង DNA India News
ចែករំលែកព័តមាននេះ