រាជធានីភ្នំពេញ ៖ រថយន្តមួយគ្រឿងម៉ាកព្រូសខណៈចេញពីចំណតក្នុងផ្សារស្ទឹងមានជ័យថ្មីហើយបើកឡើងចំណោតក៏ជ្រុលទៅបុករថយន្តស៊េរីទំនើបមួយគ្រឿងម៉ាកឡង់គ្រីស្ស័រដែលចតស្ងៀមនៅមុខផ្ទះ បណ្ដាលឲ្យរងការខូចខាតយ៉ាងដំណំ ។ ហេតុការណ៍ខាងលើនេះបានកើតឡើងកាលពីវេលាម៉ោង៧យប់ថ្ងៃទី២៧ ខែតុលា ឆ្នាំ២០១៩ តាមផ្លូវបេតុង នៅចំណុចខាងត្បូងផ្សារស្ទឹងមានជ័យថ្មី…
រាជធានីភ្នំពេញ ៖ រថយន្តមួយគ្រឿងម៉ាកព្រូសខណៈចេញពីចំណតក្នុងផ្សារស្ទឹងមានជ័យថ្មីហើយបើកឡើងចំណោតក៏ជ្រុលទៅបុករថយន្តស៊េរីទំនើបមួយគ្រឿងម៉ាកឡង់គ្រីស្ស័រដែលចតស្ងៀមនៅមុខផ្ទះ បណ្ដាលឲ្យរងការខូចខាតយ៉ាងដំណំ ។
ហេតុការណ៍ខាងលើនេះបានកើតឡើងកាលពីវេលាម៉ោង៧យប់ថ្ងៃទី២៧ ខែតុលា ឆ្នាំ២០១៩ តាមផ្លូវបេតុង នៅចំណុចខាងត្បូងផ្សារស្ទឹងមានជ័យថ្មី ស្ថិតក្នុងភូមិទ្រា សង្កាត់ស្ទឹងមានជ័យ១ ខណ្ឌមានជ័យ ។
ភាគីខាងរថយន្តមួយគ្រឿងម៉ាកព្រូស ពណ៌កាប់ស្ទាំង ពាក់ស្លាកលេខ ភ្នំពេញ ២AH- ១៦៨១ អ្នកបើកបរមិនស្គាល់អត្តសញ្ញាណ ។ ចំណែកភាគីខាងរថយន្តស៊េរីទំនើបមួយគ្រឿងទៀតម៉ាកឡង់គ្រីស្ស័រ ពណ៌ស ពាក់ស្លាកលេខ ភ្នំពេញ ២AP-៥២០២ អ្នកបើកបរមិនស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តមួយគ្រឿងម៉ាកព្រូស បើកចេញពីចំណតផ្ញើរថយន្តក្នុងផ្សារស្ទឹងមានជ័យថ្មី ជាន់ក្រោមដីឡើងមកផ្លូវលើតាមច្រកខាងត្បូង ។
តាមប្រភពដដែលបានបន្តថា ខណៈពេលរថយន្តម៉ាកព្រូសបើកឡើងចំណោត ស្រាប់តែអ្នកបើកបរជ្រុលជាន់ហ្គារបង្ខំ ទើបបណ្ដាលឲ្យរថយន្តស្ទុះទៅបុកចំពាក់កណ្តាលរថយន្តស៊េររីទំនើបមួយគ្រឿងទៀតម៉ាកឡង់គ្រីស្ស័រយ៉ាងពេញទំហឹង ខណៈម្ចាស់ចតស្ងៀមនៅមុខផ្ទះ រួចរថយន្តម៉ាកព្រូសបានរុញរថយន្តម៉ាកឡង់គ្រីស័រឡើងលើចិញ្ចើមផ្លូវ បណ្ដាលឲ្យរងការខូចខាត និងក្រពឹតទ្វារមុខចំហៀងខាងឆ្វេង និងវៀចកង់មុខចំហៀងខាងស្ដាំ ។ ចំណែករថយន្តម៉ាកព្រូសបានរងការខូចខាតក្រពឹតផ្នែកខាងមុខ តែមិនមានគ្រោះថ្នាក់ដល់មនុស្សណាម្នាក់នោះទេ ។
ក្នុងហេតុការណ៍នេះដែរ ក៍មានសមត្ថកិច្ចមូលដ្ឋានបានចុះទៅកន្លែងកើតហេតុ ដើម្បីធ្វើការវាស់វែងនិងយករថយន្តដាក់អែបខាង កុំអោយមានការកកស្ទះចរាចរណ៍ ហើយបានអោយភាគីទាំងសងខាងធ្វើការសម្របសម្រួល ។ ដោយខាងរថយន្តម៉ាកឡង់គ្រីស្ស័រ ទាមទារឲ្យខាងរថយន្តម៉ាកព្រូសយករថយន្តរបស់គាត់ទៅជួសជុលឡើងវិញ តែខាងរថយន្តម៉ាកព្រូសបានទាមទារអោយចេញថ្លៃជួសជុលម្នាក់ពាក់កណ្តាល តែខាងរថយន្តម៉ាកឡង់គ្រីស្ស័រមិនយល់ព្រមនោះទេ ។
ក្រោយពេលកើតហេតុ ដោយសារតែភាគីទាំងសងខាងធ្វើការសម្របសម្រួលមិនត្រូវគ្នា ទើបសមត្ថកិច្ចជំនាញយករថយន្តទាំង២គ្រឿងទៅរក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយនៅពេលក្រោយជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ