រាជធានីភ្នំពេញ៖ បុរសម្នាក់បានជិះម៉ូតូ១គ្រឿងចេញពីធ្វើការទៅលេងផ្ទះគូដណ្ដឹងដោយបើកបរក្នុងល្បឿនលឿន ពុំដឹងថាភ័យព្រោះតែមានគេដេញតាមពីក្រោយ ឬបែបណានោះទេ ក៏ស្រាប់តែដួសអូសជាច្រើនម៉ែត្របោកក្បាលផ្ទប់ថ្នល់ស្លាប់បាត់បង់ជីវិតភ្លាមៗនៅនឹងកន្លែងនៅលើស្ពាន ។ បន្ទាប់មកមានជនឆ្លៀតឱកាសជិះម៉ូតូ២គ្រឿងទៅពីក្រោយ រួចលើកយកម៉ូតូជនរងគ្រោះជិះគេចខ្លួនបាត់ដោយសុវត្ថិភាព នេះបើតាមការប្រាប់ឲ្យដឹងពីនគរបាលខណ្ឌដង្កោ ដែលបានឆែកមើលកាមេរ៉ាសុវត្តិភាព ។
សពបុរសនោះត្រូវបានប្រជាពលរដ្ឋប្រទះឃើញបង្កឲ្យមានការភ្ញាក់ផ្អើលកាលពីវេលាម៉ោងជាង៥ព្រឹកថ្ងៃទី ២៣ ខែមីនា ឆ្នាំ២០២៦ នៅលើស្ពានសាក់សំពៅ មហាវិថីសុី ជីនពីង (ផ្លូវក្រវាត់ក្រុងទី៣ ) ស្ថិតនៅក្នុងភូមិគងនយ សង្កាត់គងនយ ខណ្ឌដង្កោ រាជធានីភ្នំពេញ ។
បុរសរងគ្រោះខាងលើឈ្មោះង៉ាន វាស្នា អាយុ៤៤ឆ្នាំ មុខរបរកម្មកររោងចក្រ មានទីលំនៅផ្ទះលេខ៤១៧ ភូមិជ្រៃគ្រហុឹម ឃុំកំពង់ឫស្សី ស្រុកពោធិ៍រៀង ខេត្តព្រៃវែង និងមានស្រុកកំណើតនៅឃុំប្រាសាទ ស្រុកស្អាង ខេត្តកណ្ដាល ។
នគរបាលខណ្ឌដង្កោបានប្រាប់ឲ្យដឹងថា បុរសរងគ្រោះខាងលើធ្វើការវេនយប់ ដោយនៅវេលាម៉ោង៧យប់ថ្ងៃទី២២ ខែមីនា ឆ្នាំ២០២៦ គាត់បានចូលធ្វើការនៅរោងចក្រមួយកន្លែងស្ថិតនៅម្ដុំភូមិសិត្បូ ឃុំស្វាយរលំ ស្រុកស្អាង ខេត្តកណ្ដាល ហើយបានចេញវិញនៅវេលាម៉ោង៤ជិតភ្លឺថ្ងៃទី២៣ ខែមីនា( ថ្ងៃកើតហេតុ) ។ បើតាមរូបភាពនៅក្នុងកាមេរ៉ាសុវត្ថិភាពឃើញជនរងគ្រោះជិះម៉ូតូ១គ្រឿងម៉ាកម៉ាកហុងដាឌ្រីមសេ១២៥ ស៊េរីឆ្នាំ២០២៥ ធ្វើដំណើរក្នុងទិសដៅពីត្បូងទៅជើង ក្នុងល្បឿនលឿន លុះពេលទៅដល់ត្រង់ចំណុចកើតហេតុ ក៏ដួលអូសជាច្រើនម៉ែត្រនិងបោកក្បាលផ្ទប់ថ្នល់ស្លាប់ភ្លាមៗនៅនឹងកន្លែងតែម្ដង ។
នគរបាលបានប្រាប់ឲ្យដឹងបន្តទៀតថា បន្ទាប់មកក៏ស្រាប់តែមានជនឆ្លៀតឱកាសជិះម៉ូតូ២គ្រឿងទៅពីក្រោយបានលើកយកម៉ូតូ ជនរងគ្រោះជិះគេចខ្លួនទៅបាត់ស្រមោល ដោយបន្សល់ទុកសាកសពនៅកន្លែងកើតហេតុ ។ ដោយឡែកម៉ូតូដែលជនរងគ្រោះជិះនោះគឺជាម៉ូតូរបស់ស្ត្រីជាគូដណ្ដឹងរបស់គាត់ទេមិនមែនជារបស់គាត់ឡើយ ហើយកន្លងមកបុរសរងគ្រោះរូបនោះជិះតែម៉ូតូម៉ាកស៊ុយហ្ស៊ុយគីវីវ៉ារបស់ខ្លួនប៉ុណ្ណោះ ។ ប៉ុន្តែនៅថ្ងៃកើតហេតុគាត់បានយកម៉ូតូហុងដាឌ្រីមរបស់គូដណ្ដឹងទៅជិះ ហើយក៏ជួបគ្រោះអកុសលដល់ស្លាប់ និងត្រូវបានត្រូវជនឆ្លៀតឱកាសលួចយកទៅបាត់ទៀតបែបនេះតែម្ដង ។
បើតាមសាច់ញាតិជនរងគ្រោះបាននិយាយថា នៅមុនពេលស្លាប់ក្រោយពេលចេញពីធ្វើការបុរសរងគ្រោះខាងលើបានជិះម៉ូតូហុងដាឌ្រីមសេ១២៥ នោះចេញពីកន្លែងធ្វេីការឆ្ពោះទៅផ្ទះគូដណ្ដឹងនៅឯខណ្ឌកំបូល ។ ដោយរាល់ដងនៅវេលាម៉ោងជាង៥ព្រឹកគឺទៅដល់ផ្ទះហើយ ប៉ុន្តែនៅថ្ងៃកើតហេតុម៉ោងជិត៧ព្រឹកទៅហើយនៅពុំទាន់ដល់ផ្ទះទៀត ដោយពុំដឹងថាគាត់មានរឿងអីនោះទេ ។ លុះក្រោយមកក៏ស្រាប់តែទទួលដំណឹងថា គាត់បានស្លាប់នៅលើស្ពានមហាវិថីសុី ជីនពីងបែបនេះទៅវិញ និងត្រូបាត់ម៉ូតូពីកន្លែងកេីតហេតុថែមទៀត ។
ក្រោយពីទទួលបានព័ត៌មាននេះភ្លាមកម្លាំងនគរបាលប៉ុស្តិ៍គងនយ រួមជាមួយកម្លាំងនគរបាលផ្នែកចរាចរណ៍ខណ្ដង្កោបានចុះទៅធ្វើការវាស់វែងនិងកសាងសំណុំរឿង ចំណែកនគរបាលផ្នែកព្រហ្មទណ្ឌខណ្ឌដង្កោ បានចុះទៅពិនិត្យទីតាំងកើតហេតុ និងស្រាវជ្រាវរកជនឆ្លៀតឱកាសដែលលួចយកម៉ូតូជនរងគ្រោះទៅបាត់នោះ ។ បន្ទាប់មកបានរាយការណ៍ជូននគរបាលការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ចុះទៅធ្វើកោសល្យវិច័យ រួចបានប្រគល់សពជូនក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ