ខេត្តព្រះវិហារ ៖មន្ទីរវប្បធម៌និងវិចិត្រសិល្បៈខេត្តព្រះវិហារ សហការជាមួយមន្ទីរទេសចរណ៍ គ្រោងរៀបចំប្រជាជននៅក្នុងតំបន់ប្រាសាទព្រះខ័ន្ធបង្កើតឲ្យជាសហគមន៍ទេសចរណ៍មួយឡើង។
ការបង្កើតសហគមន៍ទេសចរដើម្បីបម្រើផ្នែកម្ហូបអាហារនៅទីនោះដល់ភ្ញៀវទេសចរដែលចូលទៅលេងកម្សាន្តនៅតំបន់ប្រាសាទព្រះខ័ន្ធ ព្រោះបច្ចុប្បន្នរមណីយដ្ឋានមួយនេះពុំទាន់មានការលក់ដូរម្ហូបអាហារនៅឡើយទេ ។
ថ្លែងប្រាប់អ្នកសារព័ត៌មានកាលពីពេល ថ្មីៗកន្លងមក លោកនៅ ចាន់គង់ ប្រធានមន្ទីរវប្បធម៌ និងវិចិត្រសិល្បៈខេត្តព្រះវិហារឲ្យដឹងថា បច្ចុប្បន្ននេះនៅក្នុងតំបន់រមណីយដ្ឋានវប្បធម៌ប្រវត្តិសាស្ត្រប្រាសាទព្រះខ័ន្ធកំពង់ស្វាយ ស្ថិតក្នុងភូមិតាសែង ឃុំរណសិរ្ស ស្រុកសង្គមថ្មី ខេត្តព្រះវិហារ នៅមិនទាន់មានកន្លែងសម្រាប់លក់ម្ហូបអាហារដល់ភ្ញៀវទេសចរដែលចូលទៅលេងកម្សាន្តនៅទីនោះនៅឡើយទេ ។ ភាគច្រើនភ្ញៀវទេសចរតែងតែវេចខ្ចប់ម្ហូបអាហារដោយខ្លួនឯង យកទៅទទួលទាន ។
ដូច្នេះហើយនៅពេល ឆាប់ៗខាងមុខនេះ មន្ទីរវប្បធម៌ នឹងសហការជាមួយមន្ទីរទេសចរណ៍ខេត្តព្រះវិហារ រៀបចំឲ្យប្រជាពលរដ្ឋនៅទីនោះបង្កើតជាសហគមន៍ទេសចរណ៍ សម្រាប់បម្រើម្ហូបអាហារនៅទីនោះឲ្យមានអនាម័យ និងមានគុណភាពសម្រាប់ផ្តល់នូវភាពងាយស្រួលដល់ភ្ញៀវទេសចរចូលទៅកម្សាន្តនៅទីនោះ មិនពិបាកវេចខ្ចប់អាហារទៅហូបដូចមុនទៀតឡើយ ។
លោកនៅ ចាន់គង «ការធ្វើបែបនេះមិនត្រឹមតែធ្វើឲ្យតំបន់ទេសចរណ៍មួយនេះមានការផ្តល់សេវាកម្មដូចកន្លែងទេសចរណ៍ដទៃទៀត និងបានបង្កលក្ខណៈងាយស្រួលដល់ភ្ញៀវទេសចរ ក្នុងការទទួលសេវាកម្មម្ហូបអាហារប៉ុណ្ណោះទេ ថែមទាំងបានបង្កើននូវប្រាក់ចំណូលពីការផ្តល់សេវាកម្មមួយនេះដល់ប្រជាសហគមន៍ ធ្វើឲ្យជីវភាពប្រសើរឡើងថែមមួយកម្រិតទៀត »។
លោកគង់ វិបុល ប្រធានមន្ទីរទេសចរណ៍ខេត្តព្រះវិហារ ឲ្យដឹងថា ការគ្រោងបង្កើតសហគមន៍ទេសចរណ៍នៅតំបន់ប្រាសាទព្រះខ័ន្ធកំពង់ស្វាយ នឹងចាប់ផ្តើមអនុវត្តនៅឆ្នាំ២០២០ខាងមុខដើម្បីឲ្យតំបន់នេះមានការបម្រើទេសចរណ៍ផ្នែកម្ហូបអាហារ ប្រកបដោយគុណភាព និងអនាម័យត្រឹមត្រូវ សម្រាប់ផ្តល់ជូនដល់ភ្ញៀវទេសចរជាតិ និងអន្តរជាតិ ដែលទៅលេងកម្សាន្ត ។
យោងតាមរបាយការណ៍របស់មន្ទីរទេសចរណ៍ខេត្តព្រះវិហារបានបង្ហាញថា នៅក្នុងរយៈពេល៩ខែ គិតចាប់តាំងពីខែមករា ដល់ខែកញ្ញា ឆ្នាំ២០១៩នេះ ភ្ញៀវទេសចរដែលទៅកម្សាន្ត នៅក្នុងរមណីយដ្ឋានវប្បធម៌ប្រវត្តិសាស្ត្រប្រាសាទព្រះខ័ន្ធកំពង់ស្វាយ ក្នុងនោះភ្ញៀវទេសចរជាតិមានចំនួន១២.៧៦០នាក់ កើនឡើង៤៨,៣៩% ដោយឡែកភ្ញៀវទេសចរអន្តរជាតិ មានចំនួន៤៩៩នាក់ កើនឡើង៣២,៧១% នេះបើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៨កន្លងទៅ ៕ (កែសម្រួលដោយ ៖ បុប្ផា)
ចែករំលែកព័តមាននេះ