កំពុងតែដេកផ្ទះសុខៗស្រាប់តែមានគេមកកាប់ដល់ផ្ទះផ្អើលទាំងយប់

ថ្ងៃទី ២៣ ខែ តុលា ឆ្នាំ ២០១៩

ម៉ោង ១៦:១០

ខេត្តរតនគិរី ៖ សេចក្តីរាយការណ៍បឋមបានឲ្យដឹងថា ស្ត្រីម្នាក់ត្រូវបានជនមិនស្គាល់មុខលួចចូលផ្ទះកាប់ និងកាំបិត បណ្តាលឱ្យរងរបួសធ្ងន់ កំពុងសម្រាកព្យាបាលនៅប្រទេសវៀតណាម ដែលហេតុការណ៍នេះបានកើតឡើង នៅវេលាម៉ោង២១និង២០នាទី ថ្ងៃទី១៩ ខែតុលានេះ នៅចំណុចមុខក្រុមហ៊ុនម្សៅមី ជាទូចឌ្រេឌីង ស្ថិតនៅភូមិសោមគល់ ឃុំសោមធំស្រុកអូរយ៉ាដាវ ខេត្តរតនគិរី ។

ប្រភពពីកន្លែងកើតហេតុបានឱ្យដឹងថា ខណៈស្ត្រីរងគ្រោះកំពុងតែដេកនៅក្នុងបន្ទប់ក្នុងផ្ទះរបស់ខ្លួនតែម្នាក់ឯង ស្រាប់តែមានជនល្មើសលួចចូលមកក្នុងផ្ទះមានកាន់កាំបិតមកកាប់ចំមុខ បណ្តាលឱ្យរងរបួសយ៉ាងធ្ងន់ធ្ងរតែម្តង ។

ប្រភពបានបន្តថា ជនល្មើសមានបំណងគ្រងធ្វើអំពើមនុស្សឃាត់មកលើជនរងគ្រោះទៀតផង ។ ប្រភពបន្ត ក្នុងពេលកើតហេតុជនរងគ្រោះក៏បានប្រតាយប្រតប់គ្នា ទើបបង្កឱ្យមានការភ្ញាក់ផ្អើលដល់អ្នកជិតខាង ហើយជនល្មើសក៏រត់គេចខ្លួនបាត់ភ្លាមៗតែម្តង ។ ស្ត្រីជនរងគ្រោះឈ្មោះ ស៊ុំ សុធារ៉ា អាយុ២១ឆ្នាំ ជនជាតិខ្មែរ មានស្រុកកំណើតនៅភូមិចក ឃុំធាយស្រុកបាភ្នំ ខេត្តព្រៃវែង ប្ដីជនរងគ្រោះឈ្មោះ សេងវណ្ណះ ហៅជាងណាក់ មកស្នាក់នៅមុខក្រុមហ៊ុនម្ស៉ៅមីជាទូចឌ្រេឌីង ភូមិសោមគល់ ឃុំសោមធំ ស្រុកអូរយ៉ាដាវ ខេត្តរតនគិរី ។

ក្រោយពេលកើតហេតុកម្លាំងអធិការនគរបាលស្រុកអូរយ៉ាវបានចុះទៅដល់ផ្ទះជនរងគ្រោះមុខក្រុមហ៊ុនខាងលើធ្វើអន្តរាគមន៍ និងហៅរថយន្តសង្រោះបន្ទាន់បញ្ជូនជនរងរបួសទៅកាន់មន្ទីពេទ្យប្រទេសវៀតណាមផងដែរ ។ ហើយកម្លាំងនគរបាលស្រុកអូរយ៉ាដាវកំពុងធ្វើការស្រាវជ្រាវកំណត់រកមុខសញ្ញាបន្ត និងតាមចាប់ខ្លួនជនដៃដល់មកផ្តន្ទាទោសតាមច្បាប់ ៕ កែសម្រួលដោយ ៖ សុឃាក់