ខេត្តបន្ទាយមានជ័យ ៖ មន្ត្រីយោធាចូលនិវត្តន៍ម្នាក់ ដែលត្រូវម៉ូតូទឹកបុកបណ្តាលឱ្យរបួស និងលិចបាត់ក្នុងទឹកស្ទឹងត្រូវបានរកឃើញហើយ ជាមួយស្លាកស្នាមបាក់ដៃទាំងសងខាង និងបែកក្បាល នៅវេលាម៉ោង១២និង៤៨នាទី ថ្ងៃ២១ តុលា នៅស្ទឹងព្រះពន្លា ស្ថិតភូមិបី សង្កាត់ព្រះពន្លា ក្រុងសិរីសោភ័ណ ។
ជនរងគ្រោះដែលស្លាប់មានឈ្មោះ ឡាំង សាវិន ភេទប្រុស អាយុ៥២ឆ្នាំ(ជាមន្ត្រីយោធាចូលនិវត្តន៍)រស់នៅភូមិបី សង្កាត់ព្រះពន្លា ក្រុងសិរីសោភ័ណ ។ លោកវរសេនីយ៍ឯក ស៊ី ឌី អធិការនគរបាលក្រុងសិរីសោភ័ណបានប្រាប់ថា ពេលគ្រោះថ្នាក់កើតឡើង គឺជនរងគ្រោះបានអុំទូកចុះទៅមើលមង ដែលត្រូវកាណូតទាក់ដាច់ និងដោះត្រីជាប់មងនៅមាត់ស្ទឹងផ្នែកត្រើយខាងកើត ។
ស្រាប់តែឈ្មោះ លី ចន្តា ភេទប្រុស អាយុ៣៦ឆ្នាំ(មុខរបរជាងផ្សារដែក)រស់នៅភូមិ១សង្កាត់ព្រះពន្លា ក្រុងសិរីសោភ័ណ បានជិះម៉ូតូទឹកម្នាក់ឯងតាមដងស្ទឹងព្រះពន្លាដោយល្បឿនលឿន ក្នុងទឹសដៅពីកើតទៅត្បូង បានបុកជនរងគ្រោះហើយម៉ូតូទឹកហោះ បណ្តាលឱ្យអ្នកបង្កធ្លាក់ពីម៉ូតូទឹក ។ ចំណែកជនរងគ្រោះបានលិចចូលក្នុងទឹកបាត់នៅម៉ោង៦ល្ងាច ថ្ងៃទី២០ តុលា ។
លោកបានបញ្ជាក់ថា ក្រោយពេលម៉ូតូទឹកបុកជនរងគ្រោះលិចចូលក្នុងស្ទឹង ហើយអ្នកដែលឃើញបានស្រែកឆោឡោ រីឯជនបង្កបានជិះម៉ូតូទឹកបកទៅក្រោយវិញ តែកម្លាំងនគរបាលបានឃាត់ខ្លួននៅវេលាម៉ោង៧យប់ ថ្ងៃដដែល ។
លោកវរសេនីយ៍ឯក ស៊ី ឌី បានបញ្ជាក់ថា ក្រោយពេលឃាត់ខ្លួនឈ្មោះ លី ចន្តា បាននិយាយថា គឺនៅពេលគ្រោះថ្នាក់កើតឡើងនៅវេលាថ្ងៃត្រង់ ដែលជិះម៉ូតូទឹកលេងតាមដងស្ទឹង នៅពេលបើកបរដោយមើលមិនឃើញជនរងគ្រោះដែលកំពុងដោះត្រីជាប់មង ហើយមេឃងងឹតមើលមិនឃើញ ទើបបណ្តាលឱ្យបុកបង្កគ្រោះថ្នាក់បែបនេះ ។
ប្រតិបត្តិការសឹករងខេត្ត និងកម្លាំងកងរាជអាវុធហត្ថបានចុះទៅជួយរាវរកព្រោងព្រាតតែរកមិនឃើញ រហូតដល់វេលាម៉ោង៦ល្ងាច ថ្ងៃទី២១ តុលា សពជនរងគ្រោះបានអណ្តែតឡើងនៅមាត់ស្ទឹងខាងកើត ក៏បានស្រង់ឡើងគោកធ្វើការពិនិត្យ ឃើញជនរងគ្រោះបាក់ដៃសងខាង និងបែកក្បាល ។ ក្រោយពេលមន្ត្រីជំនាញពិនិត្យហើយ ប្រគល់ជូនគ្រួសារជនរងគ្រោះ ទទួលយកទៅធ្វើបុណ្យតាមប្រពៃណី ។
ដោយឡែក ជនបង្កត្រូវបានកម្លាំងនគរបាលជំនាញធ្វើការសាកសួរ ហើយត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី២២ តុលា ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ