ខេត្តប៉ៃលិន ៖ ប្រទះឃើញសពបុរសម្នាក់ ត្រូវបានគេស្គាល់ថា ជាអ្នករត់ម៉ូតូឌុប ដើម្បីចិញ្ចឹមកូនតូចៗ ដោយត្រូវម៉ូតូសង្កត់ពីលើជាប់រើអត់រួច បណ្តាលឱ្យស្លាប់ ខណៈដែលគេសង្ស័យថា ផឹកស្រវឹងជោកជាំរហូតដល់ធ្លាក់ភ្នែក…
ខេត្តប៉ៃលិន ៖ ប្រទះឃើញសពបុរសម្នាក់ ត្រូវបានគេស្គាល់ថា ជាអ្នករត់ម៉ូតូឌុប ដើម្បីចិញ្ចឹមកូនតូចៗ ដោយត្រូវម៉ូតូសង្កត់ពីលើជាប់រើអត់រួច បណ្តាលឱ្យស្លាប់ ខណៈដែលគេសង្ស័យថា ផឹកស្រវឹងជោកជាំរហូតដល់ធ្លាក់ភ្នែក លុះជិះម៉ូតូពេលយប់ម្នាក់ឯងមើលផ្លូវលែងឃើញ ក៏ជ្រុលចង្កូតធ្លាក់ចូលក្នុងប្រឡាយក្បែរគល់ស្ពានមួយកន្លែង រហូតដល់ពេលព្រឹក បង្កឱ្យមានការភ្នាក់ផ្អើលតែម្តង ។
ហេតុការណ៍ប្រទះឃើញសពបុរសជាអ្នករត់ម៉ូតូឌុបដេកស្លាប់ត្រូវម៉ូតូសង្កត់លើនេះ បានកើតឡើងនៅវេលាម៉ោង៧ និង៣០នាទីព្រឹកថ្ងៃទី២៦ ខែមីនា ឆ្នាំ២០២៦ ស្ថិតនៅក្នុងភូមិទឹកថ្លា សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីសាក្សីនៅកន្លែងកើតហេតុ បានឱ្យដឹងថា ៖ ជនរងគ្រោះ មានឈ្មោះ មួង អាង ភេទប្រុស អាយុ៤៥ឆ្នាំ ជាអ្នករត់ម៉ូតូឌុប ដោយបើកបរម៉ូតូម៉ាកឌ្រីមពណ៌ខ្មៅ ស៊េរីឆ្នាំ២០១២ ពាក់ស្លាកលេខ ប៉ៃលិន 1A-8007 មានកូននៅក្នុងបន្ទុកចំនួន៧នាក់ ប្រុស២នាក់ ស្រី៥នាក់ រស់នៅក្នុងភូមិកើតហេតុខាងលើ ។ ប្រភពបន្តទៀតថា មុនពេលកើតហេតុ គេឃើញជនរងគ្រោះខាងលើ បានជួបជុំផឹកស៊ីជាមួយមិត្តភក្តិ៦ទៅ៨នាក់ នៅក្បែរកន្លែងខ្លួនឈរជើងចាំរត់ម៉ូតូឌុបក្នុងក្រុងប៉ៃលិន ដោយនាំគ្នាផឹកស៊ីតាំងពីល្ងាចរហូតដល់ម៉ោង១១យប់ថ្ងៃដដែល ក៏បែកគ្នាទៅផ្ទះរៀងៗខ្លួន។
ប្រភពដដែលបានបញ្ជាក់ទៀតថា រហូតដល់យប់ជ្រៅអ្នកផ្ទះរង់ចាំជនរងគ្រោះមិនឃើញត្រឡប់មកវិញដូចសព្វមួយដង ក៏ទាក់ទងរកគ្រប់ច្រកល្ហក តែគ្មាននរណាដឹងដំណឹងនោះឡើយ។ ស្រាប់តែក្រោយមកមានប្រជាពលរដ្ឋបើកបររថយន្តនៅតាមលំផ្លូវខាងលើ ក៏ប្រទះឃើញជនរងគ្រោះដេកស្លាប់ដោយម៉ូតូសង្កត់លើបង្កឱ្យមានការភ្នាក់ផ្អើល ។
ចំណែកកូនតូចៗ អាយុប្រហែល៤ទៅ៥ឆ្នាំ ពេលមកឃើញសពឪពុករបស់ខ្លួននាំគ្នាស្រែកទ្រហោយំ គួរឱ្យអាណិតអាសូរដល់ពួកគេ ដោយបន្ទុកនេះ បានធ្លាក់ទៅលើជីដូនវ័យចំណាស់ម្នាក់ចាំមើលថែពួកគេបន្តពីឪពុក ខណៈដែលម្តាយចាកចេញទៅធ្វើការងារនៅខេត្តផ្សេង ។
ពាក់ព័ន្ធទៅនឹងបញ្ហានេះ ក្រោយមកក្រុមនគរបាល និងគ្រូពេទ្យ បានចុះទៅត្រួតពិនិត្យនិងធ្វើកោសល្យវិច្ច័យ ដោយសន្និដ្ឋានថា ជនរងគ្រោះ បានស្លាប់ដោយសារតែដួលម៉ូតូដោយខ្លួនឯង ហើយត្រូវម៉ូតូសង្កត់ពីលើស្លាប់ ហើយសង្ស័យថា ស្រវឹងស្រាខ្លាំងពេកមិនអាចរើចេញពីម៉ូតូរួច។ ក្រោយមកសពជនរងគ្រោះ ត្រូវបានគេប្រគល់ជូនសាច់ញាតិឱ្យយកទៅធ្វើបុណ្យតាមប្រពៃណី ៕
ចែករំលែកព័តមាននេះ