ខេត្តស្ទឹងត្រែង ៖ ក្នុងកិច្ចខិតខំប្រឹងប្រែងដើម្បីអភិរក្សធនធានធម្មជាតិ និងការពារសត្វព្រៃ ដែលកំពុងរងការគំរាមកំហែង មន្ត្រីឧទ្យានុរក្ស នៃមន្ទីរបរិស្ថានខេត្តស្ទឹងត្រែង បានសហការជាមួយអង្គការដៃគូ ចុះសិក្សាស្រាវជ្រាវ និងទទួលបានលទ្ធផលគួរឱ្យកត់សម្គាល់ពីវត្តមានជីវៈចម្រុះនៅក្នុងដែនជម្រកសត្វព្រៃព្រៃឡង់…
ខេត្តស្ទឹងត្រែង ៖ ក្នុងកិច្ចខិតខំប្រឹងប្រែងដើម្បីអភិរក្សធនធានធម្មជាតិ និងការពារសត្វព្រៃ ដែលកំពុងរងការគំរាមកំហែង មន្ត្រីឧទ្យានុរក្ស នៃមន្ទីរបរិស្ថានខេត្តស្ទឹងត្រែង បានសហការជាមួយអង្គការដៃគូ ចុះសិក្សាស្រាវជ្រាវ និងទទួលបានលទ្ធផលគួរឱ្យកត់សម្គាល់ពីវត្តមានជីវៈចម្រុះនៅក្នុងដែនជម្រកសត្វព្រៃព្រៃឡង់ ។
បើតាមលោក ទូច វិចិត្រ នាយកដែនជម្រកសត្វព្រៃព្រៃឡង់ អោយដឹងថា ចាប់ពីថ្ងៃទី២១ ដល់ថ្ងៃទី២៦ ខែមីនា ឆ្នាំ២០២៦ ក្រុមការងារចម្រុះ រួមមាន ៖ លោក ស្រី រតនា, លោក អ៊ិន ម៉ាឡៃយ៉ា និងលោក នូភិត ញាំម៉ាឡា ដែលជាមន្ត្រីឧទ្យានុរក្ស ប្រចាំដែនជម្រកសត្វព្រៃព្រៃឡង់ នៃមន្ទីរបរិស្ថានខេត្តស្ទឹងត្រែង បានសហការយ៉ាងជិតស្និទ្ធជាមួយអង្គការសម្ព័ន្ធសត្វព្រៃ (WEA) ក្នុងបេសកកម្មចុះសិក្សាស្រាវជ្រាវជីវៈចម្រុះ ។
លោកថា គោលបំណងសំខាន់ នៃបេសកកម្មនេះ គឺការដាក់ម៉ាស៊ីនថតកាមេរ៉ាស្វ័យប្រវត្តិ (Camera Traps) ដើម្បីតាមដានចលនាសត្វព្រៃ។ ការត្រួតពិនិត្យ និងវាយតម្លៃទីតាំង ដែលបានដាំស្តារព្រៃឈើឡើងវិញ ក្នុងភូមិសាស្ត្រខេត្តស្ទឹងត្រែង ។
តាមរយៈទិន្នន័យ ដែលទទួលបានពីម៉ាស៊ីនថតកាមេរ៉ាស្វ័យប្រវត្តិ ក្រុមការងារបានរកឃើញវត្តមានសត្វព្រៃកម្រ និងជិតផុតពូជជាច្រើនប្រភេទ ដែលកំពុងរស់នៅយ៉ាងមានសុវត្ថិភាពក្នុងតំបន់ការពារនេះ។ សត្វដែលត្រូវបានកត់ត្រារួមមាន ៖ ដំរីព្រៃ និងទន្សោង ស្តេចកូលីត និងមាន់ព្រៃ ខ្លាឃ្មុំ និងឆ្មាដាវ ជ្រូកព្រៃ និងក្តាន់ញ៉ែញ ពង្រូល (សត្វកម្របំផុត) ប្រម៉ា និងទោច ស្វាព្រាម និងស្វាក្តាម ។ វត្តមានសត្វព្រៃចម្រុះប្រភេទទាំងនេះ គឺជាសូចនាករយ៉ាងសំខាន់ ដែលបង្ហាញពីសុខភាព នៃប្រព័ន្ធអេកូឡូស៊ីនៅក្នុងដែនជម្រកសត្វព្រៃព្រៃឡង់។ ជាមួយគ្នានេះ ក្រុមមន្ត្រីឧទ្យានុរក្សក៏បានបន្តយកចិត្តទុកដាក់ខ្ពស់លើការងារដាំស្តារព្រៃឈើដើម្បី ពង្រីកជម្រកសុវត្ថិភាព និងប្រភពចំណីសម្រាប់សត្វព្រៃទាំងអស់នោះផងដែរ ៕
ចែករំលែកព័តមាននេះ