ព្រះមហាក្សត្រយាងអញ្ជើញចូលរួមព្រះរាជពិធីសោយរាជ្យសម្បត្តិផ្លូវការព្រះចៅអធិរាជថ្មីរបស់ជប៉ុន

ថ្ងៃទី ២១ ខែ តុលា ឆ្នាំ ២០១៩

ម៉ោង ១៣:៥៨

រាជធានីភ្នំពេញ ៖ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាព្រះអង្គទ្រង់យាងទៅកាន់ប្រទេសជប៉ុន ដើម្បីចូលរួមពិធីរាជាភិសេកព្រះចៅអធិរាជថ្មីរបស់ជប៉ុន គឺព្រះចៅ Naruhito ។

ការអញ្ជើញយាងរបស់ព្រះមហាក្សត្រគេសង្កេតឃើញមានការអញ្ជើញថ្វាយព្រះរាជដំណើរព្រះមហាក្សត្រយាងទៅប្រទេសជប៉ុននៅព្រឹកទី២១ ខែតុលានេះ មានវត្តមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេច សេនាវិបុល ភក្តីសាយឈុំប្រធានព្រឹទ្ធសភា សម្តេចពញ្ញាចក្រី ហេង សំរិន ប្រធានរដ្ឋសភា ព្រះរាជវង្សានុវង្សនិងថ្នាក់ដឹកនាំក្រសួងស្ថាប័នជាច្រើនរូបទៀត ។

ព្រះរាជពិធីសោយរាជ្យសម្បត្តិផ្លូវការរបស់ព្រះចៅ អធិរាជថ្មីរបស់ជប៉ុននឹងធ្វើឡើងតាមប្រពៃណីជប៉ុន នៅថ្ងៃទី២២ ខែតុលាខាងមុខនេះ ។

សូមព្រះអង្គទ្រង់ប្រកបដោយព្រះពលានុភាពខ្លាំងក្លា ព្រះបញ្ញាញាណវាងវៃ ព្រះរាជសុខភាព ល្អបរិបូណ៌ ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំដល់ប្រជានុរាស្ត្រគ្រប់រូប រស់នៅក្នុងសុខសន្តិភាពតរៀងទៅ ។ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់បំផុតសព្វព្រះរាជហឫទ័យស្តេចយាងតាមព្រះរាជទីនាំងយន្តហោះពិសេសចាកចេញពីព្រះរាជាណាចក្រកម្ពុជា ដើម្បីបំពេញព្រះរាជកិច្ចក្នុងប្រទេសជប៉ុន ពីថ្ងៃទី២១ ដល់២៤ ខែតុលា ឆ្នាំ២០១៩ ៕