Michal Kwiatkowski បាន​សម្តែង​នូវ​ក្តី​រីក​រាយ​ជា​ខ្លាំង​បន្ទាប់​ពី​រូប​គេ​បាន​យក​ឈ្នះ​ដំ​ណាក់​បើក​ឆាក​​​ប្រ​ណាំង​កង់​​កម្ម​វិធី​ Tour de Romandie ​​​​​នៅ​ទី​ក្រុង ​Ascona ប្រ​ទេស​ស្វ៊ីស​កាល​ពី​ថ្ងៃ​អង្គារ​ ទី​២៩ មេសា ។ Kwiatkowski ជិះ​កង់​ឱ្យ​ក្រុម​ Omega Pharma បាន​បញ្ចប់​ដំ​ណាក់​ដែល​មាន​ចម្ងាយ​ផ្លូវ​ ៥,៥៧​​គី​ឡូ​ម៉ែត្រ​ជុំ​វិញ​ទី​ក្រុង ​Ascona​​ ដោយ​ប្រើ​អស់ថិរវេលា​​៦​នា​ទី​និង២៣វិ​នា​ទី​នាំ​មុខ​កីឡាករ​អូ​ស្ត្រា​លី​​​ Rohan Dennis របស់​ក្រុម​ Garmin Sharp និង​កីឡាករអា​ល្លឺ​ម៉ង់​ Marcel Kittel ជិះ​ឱ្យ​ក្រុម Team Giant-Shimano ដែល​ទាំងពីរ​នាក​់​ប្រើ​ថិរវេលា​ច្រើន​ជាង​៤​​​វិ​នាទីដូច​គ្នា​ ​។​

ចំណែក​កីឡាករ​អុី​តា​លី​ Giacomo Nizzolo ជិះ​ឱ្យ​ក្រុម​ Trek Factory Racing បញ្ចប់​ការ​ប្រណាំង​ក្នុង​លំ​ដាប់​ទី​៤នាំ​ មុខ​កីឡាករ​ជើង​ខ្លាំង​របស់​អា​ល្លឺ​ម៉ង់​ Tony Martin ដែល​បញ្ចប់​ការ​ប្រ​ណាំង​ក្នុង​ចំ​ណាត់​ថ្នាក់​លេខ៥។ដោយ​ឡែក​ Christopher Froome ដែល​ជា​កីឡាករ​ការ​ពារ​ជើង​ឯក​បាន​បញ្ចប់​ការ​ប្រណាំង​ក្នុង​លំ​ដាប់​ទី​១៣ ​បន្ទាប់​ពី​ប្រើ​ថិរវេលា​ច្រើន​ជាងកីឡាករ Kwiatkowski ដល់​ទៅ​៩​វិ​នា​ទី ។​

សម្រាប់​កីឡាករ​វ័យ​ក្មេង​ Kwiatkowski នេះ​ជា​លើក​ទី​១​ ហើយ​​ដែល​រូប​គេ​បាន​យក​ឈ្នះ​ដំ​ណាក់​បើក​ឆាក​ព្រឹត្តិ​ការ​ណ៍​ប្រ​ណាំង Tour de Romandie​​​​​​ ។​ គេ​បាន​ថ្លែង​ថា ៖ «ភ្ញាក់​ផ្អើល​ខ្លាំង​ដែល​បាន​ឈ្នះ​ការ​ប្រ​ណាំង​លើក​នេះ ។ ខ្ញុំ​មាន​សុខ​ភាព​ពេញ​បរិ​បូរ​បន្ទាប់​ពី​ការ​ប្រ​ណាំង​ក្នុង​កម្ម​វិធី Ardennes Classics ។ ជ័យ​ជម្នះ​លើក​នេះ​ពិត​ជា​ពិ​សេស​ខ្លាំង​ណាស់ ។ ខ្ញុំ​គិត​ថា ខ្ញុំ​ស្គាល់​ស្ថាន​ភាព​ផ្លូវ​ប្រ​ណាំង​ក្នុង​ដំ​ណាក់​នេះ​ច្បាស់»។

សូម​បញ្ជាក់​ថា Tour de Romandie​​​​​ ឆ្នាំ ២០១៤ ​នេះ​ចែក​ចេញ​ជា​៦​ដំ​ណាក់​លើ​ចម្ងាយ​ផ្លូវ​សរុប​៧៤៧,៧៧គី​ឡូ​ម៉ែត្រ ។ ដំ​ណាក់​ទី​២​ដែល​ជា​ដំណាក់​បន្ត​ចេញ​ដំណើរ​ពី​ទី​ក្រុង Ascona ​ឆ្ពោះ​​ទៅ​កាន់​ទី​ក្រុង Sion លើ​ចម្ងាយ​ផ្លូវ២០៣​គី​ឡូ​ម៉ែត្រ ៕