ទីក្រុងហ្សាការតា ៖ ប្រទេសឥណ្ឌូណេស៊ីបានដើរបញ្ច្រាសទិសពីគណៈកម្មាធិការអូឡាំពិកអន្តរជាតិ ហៅកាត់ថា IOC ដោយកាលពីថ្ងៃទី២៣ ខែតុលា កន្លងទៅ ប្រទេសនេះ បានបន្តរក្សាជំហរ…
ទីក្រុងហ្សាការតា ៖ ប្រទេសឥណ្ឌូណេស៊ីបានដើរបញ្ច្រាសទិសពីគណៈកម្មាធិការអូឡាំពិកអន្តរជាតិ ហៅកាត់ថា IOC ដោយកាលពីថ្ងៃទី២៣ ខែតុលា កន្លងទៅ ប្រទេសនេះ បានបន្តរក្សាជំហរ និងការប្តេជ្ញាចិត្តរបស់ខ្លួន បន្ទាប់ពី IOC បានជំរុញឱ្យសហព័ន្ធកីឡាអន្តរជាតិទាំងអស់ កុំរៀបចំព្រឹត្តិការណ៍កីឡានៅឥណ្ឌូណេស៊ី បន្ទាប់ពីឥណ្ឌូណេស៊ីបានហាមឃាត់ក្រុមកីឡាកាយសម្ព័ន្ធអ៊ីស្រាអែលចូលទឹកដីរបស់ខ្លួន។
ក្រុមប្រឹក្សាប្រតិបត្តិរបស់ IOC កាលពីថ្ងៃទី២២ ខែតុលា បានប្រកាសថា ខ្លួននឹងផ្តល់អនុសាសន៍ដល់សហព័ន្ធកីឡាអន្តរជាតិទាំងអស់ កុំឱ្យរៀបចំព្រឹត្តិការណ៍កីឡាណាមួយ ឬកិច្ចប្រជុំនៅក្នុងប្រទេសឥណ្ឌូណេស៊ី រហូតដល់ប្រទេសអាស៊ីអាគ្នេយ៍មួយនេះ ផ្តល់ការធានាលើការផ្តល់ទិដ្ឋាការដល់អ្នកចូលរួមទាំងអស់សម្រាប់ការប្រកួតក្នុងទឹកដីខ្លួន។ ក្រុមប្រឹក្សាប្រតិបត្តិបានបញ្ជាក់ថា ខ្លួនក៏បានបញ្ចប់រាល់ការសន្ទនាជាមួយឥណ្ឌូណេស៊ី ស្តីពីការរៀបចំព្រឹត្តិការណ៍កីឡាអូឡាំពិកនាពេលអនាគតនៅទីនោះផងដែរ។
រឿងដ៏ចម្រូងចម្រាសនេះ បានកើតឡើងបន្ទាប់ពីប្រទេសឥណ្ឌូណេស៊ីបានបដិសេធផ្តល់ទិដ្ឋាការសម្រាប់ក្រុមកីឡាអ៊ីស្រាអែល ដើម្បីចូលរួមការប្រកួតជើងឯកកាយសម្ព័ន្ធពិភពលោកឆ្នាំ ២០២៥ (Gymnastics World Championships) ដែលកំពុងដំណើរការនៅទីក្រុងហ្សាការតា ចាប់ពីថ្ងៃទី១៩ ដល់ថ្ងៃទី២៥ ខែតុលា ដោយលើកឡើងពីការគាំទ្រសម្រាប់ប៉ាឡេស្ទីន។
ជាលទ្ធផល សហព័ន្ធកីឡាកាយសម្ព័ន្ធរបស់អ៊ីស្រាអែលបានប្តឹងឧទ្ធរណ៍ប្រឆាំងនឹងការសម្រេចចិត្តពីរដ្ឋាភិបាលឥណ្ឌូណេស៊ីទៅតុលាការអាជ្ញាកណ្តាលកីឡា (CAS) ដោយទាមទារឱ្យមានការធានានូវវត្តមានអត្តពលិករបស់ពួកគេ ឬបង្ខំឱ្យមានការផ្លាស់ប្តូរ ឬលុបចោលព្រឹត្តិការណ៍នេះ។ ទោះយ៉ាងណាក៏ដោយ CAS បានច្រានចោលការអំពាវនាវនេះ ដែលមានន័យថា អត្តពលិកអ៊ីស្រាអែលមិនអាចចូលរួមប្រកួតនៅឥណ្ឌូណេស៊ី ដែលជាប្រទេសមានប្រជាជនកាន់សាសនាអ៊ីស្លាមច្រើនជាងគេបំផុតលើពិភពលោកមួយនេះ។
ក្រុមប្រឹក្សាប្រតិបត្តិរបស់ IOC កាលពីថ្ងៃទី២៣ តុលា បានរំលឹកជំហររបស់ខ្លួនថា «រាល់អត្តពលិក ក្រុម និងមន្ត្រីកីឡាដែលមានសិទ្ធិទាំងអស់ ត្រូវតែអាចចូលរួមក្នុងការប្រកួតកីឡាអន្តរជាតិ និងព្រឹត្តិការណ៍នានា ដោយមិនមានការរើសអើងពីប្រទេសម្ចាស់ផ្ទះ»។
យ៉ាងណាមិញ នៅក្នុងការបង្ហាញអំពីការរក្សាជំហររបស់ខ្លួននោះ រដ្ឋមន្ត្រីក្រសួងកីឡា និងយុវជនឥណ្ឌូណេស៊ី លោក Erick Thohir កាលពីថ្ងៃទី២៣ ខែតុលា បានបញ្ជាក់ថា ឥណ្ឌូណេស៊ីបានដឹងថា ការហាមឃាត់ជនជាតិអ៊ីស្រាអែល នឹងនាំមកនូវផលវិបាក។
លោកបានសរសេរលើបណ្តាញសង្គម X ថា «ឥណ្ឌូណេស៊ីនឹងបន្តដើរតួយ៉ាងសកម្មក្នុងព្រឹត្តិការណ៍កីឡាផ្សេងៗ នៅកម្រិតអាស៊ីអាគ្នេយ៍ អាស៊ី និងពិភពលោក។ យើងប្រកាន់ខ្ជាប់នូវគោលការណ៍រក្សាសន្តិសុខ សណ្តាប់ធ្នាប់ និងផលប្រយោជន៍សាធារណៈ រាល់ព្រឹត្តិការណ៍អន្តរជាតិដែលរៀបចំឡើង។ ផ្អែកលើមូលដ្ឋាននោះ ឥណ្ឌូណេស៊ីបានចាត់វិធានការបញ្ចៀសការមកដល់របស់គណៈប្រតិភូអ៊ីស្រាអែលក្នុងព្រឹត្តិការណ៍ Gymnastics World Championships»។
សម្រាប់គណៈកម្មាធិការជាតិអូឡាំពិកឥណ្ឌូណេស៊ីបានបដិសេធមិនធ្វើអត្ថាធិប្បាយលើចំណាត់ការរបស់ IOC ដោយសារតែខ្លួនបានបញ្ជាក់ថា ការពិភាក្សាកំពុងតែបន្ត។
គួររំលឹកថា កាលពីខែកក្កដា ឆ្នាំ២០២៣ កន្លងទៅ ឥណ្ឌូណេស៊ី បានដកខ្លួនចេញពីការធ្វើម្ចាស់ផ្ទះព្រឹត្តិការណ៍កីឡាឆ្នេរខ្សាច់ពិភពលោក (World Beach Games) ដោយសាររឿងចម្រូងចម្រាសជុំវិញការចូលរួមរបស់អ៊ីស្រាអែល។ កាលពីខែមីនា ឆ្នាំដដែលនោះ ឥណ្ឌូណេស៊ីក៏បានបាត់បង់សិទ្ធិធ្វើម្ចាស់ផ្ទះការប្រកួតបាល់ទាត់ពិភពលោកយុវជនអាយុក្រោម២០ឆ្នាំ (FIFA Under-20 World Cup) បន្ទាប់ពីមន្ត្រីពីររូបបានជំទាស់នឹងការចូលរួមរបស់អ៊ីស្រាអែល ខណៈដែលបញ្ហាទាំងពីរនេះ បានកើតឡើងមុនពេលសង្គ្រាមរវាងអ៊ីស្រាអែល និងក្រុមប្រដាប់អាវុធហាម៉ាស់ (Hamas) បានផ្ទុះឡើងនៅឯតំបន់ហ្កាហ្សា (Gaza)៕ ប្រភព ៖ AFP
ចែករំលែកព័តមាននេះ