ខេត្តកំពង់ឆ្នាំង ៖ ភ្លៀងមួយមេនិងខ្យល់កន្ត្រាក់បានធ្វើឱ្យផ្ទះប្រជាពលរដ្ឋចំនួន១២ខ្នង ក្នុងស្រុកចំនួន០៣នៃខេត្តកំពង់ឆ្នាំង ប៉ើងដំបូលនិងរលំបាក់និងបណ្តាលឱ្យប្រជាពលរដ្ឋចំនួន០៧នាក់រងរបួសធ្ងន់-ស្រាល ព្រមទាំងសត្វគោបានងាប់អស់០៦ក្បាល ។ គ្រោះថ្នាក់ធម្មជាតិនេះបានកើតឡើង កាលពីវេលាម៉ោង៦និង៣០នាទីល្ងាច
ថ្ងៃទី២៨ មេសា ។
យោងតាមរបាយការណ៍សមត្ថកិច្ចឱ្យដឹងថា ស្រុក៣ដែលរងផលប៉ះពាល់នោះគឺស្រុកកំពង់លែង ខូចផ្ទះ៣ខ្នង ស្រុកបរិបូរណ៍ខូចផ្ទះ០២ខ្នង និងស្រុកសាមគ្គីមានជ័យរងផលប៉ះពាល់ធ្ងន់ជាងគេ គឺរលំនិងប៉ើងដំបូលផ្ទះអស់ចំនួន០៧ខ្នង មនុស្សរងរបួសចំនួន៧នាក់ ងាប់សត្វគោចំនួន០៦ក្បាលនិងខូចខាតម៉ូតូ០២គ្រឿង ។
ប្រភពពីសមត្ថកិច្ចឱ្យដឹងថា ភ្លៀងនិងខ្យល់កន្ត្រាក់បានបក់បោកមកប៉ះចំស្រុក៣ខាងលើ ក្នុងនោះស្រុកសាមគ្គីមានជ័យរងផលប៉ះពាល់ឃុំ២ គឺឃុំខ្នារឆ្មា និងឃុំត្បែងខ្ពស់រងការខូចខាតធ្ងន់ធ្ងរជាងគេ ។ នៅមុនពេលកើតហេតុខ្យល់បានបោកបក់យ៉ាងខ្លាំងធ្វើឱ្យបាក់ដើមឈើនៅក្នុងភូមិដើមត្នោតដួលរាយប៉ាយពាសពេញផ្លូវ និងវាលស្រែ ។ នៅក្នុងហេតុការណ៏នោះផងដែរប្រជាពលរដ្ឋ៣នាក់ត្រូវបានផ្ទះរលំសង្កត់លើ បណ្តាលឱ្យរងរបួស់ធ្ងន់ និង៤នាក់ផ្សេងទៀតរងរបួសស្រាល។
ចែករំលែកព័តមាននេះ