រាជធានីភ្នំពេញ ៖ កាលពីថ្ងៃទី២៨ មេសា កន្លងទៅ នៅមុខស្ថានីយទូរទស្សន៍ស៊ីធីអិន តាមបណ្តោយផ្លូវជាតិលេខ៥ បានរៀបចំកម្មវិធីមូលនិធិប្រមូលថវិកាជួយដល់កុមារតូចៗកំពុងសម្រាកព្យាបាលក្នុងមន្ទីរពេទ្យគន្ធបុប្ផា ដែលកំពុងជួបបញ្ហាកង្វះខាតថវិកា ។ នាឱកាសស្វែងរកជំនួយនោះ គេឃើញមានតារាបង្ហាញម៉ូដផបម៉ូដែលជាច្រើនដួង និងក្រុមកំប្លែងស៊ីធីអិន បានមកជួបជុំគ្នាសហការធ្វើពិធីឃោសនាប្រមូលប្រាក់ពីបងប្អូនតាមដងផ្លូវ ដោយបានទទួលនូវភាពជោគជ័យគាំទ្រពីទស្សនិកជនជាច្រើននៅពេលឆ្លងកាត់តំបន់នោះ ។
យុទ្ធនាការឃោសនានោះ មានឈ្មោះថា «ក្តីសង្ឃឹម» ធ្វើឱ្យបងប្អូនកាន់តែយល់ដឹងពីកិច្ចការជួយរំលែកទុក្ខលំបាកដល់មន្ទីរពេទ្យគន្ធបុប្ផា ដែលខ្វះខាតថវិកាជាច្រើន ដើម្បីជួយដល់កុមារជាច្រើននាក់កំពុងសម្រាកព្យាបាលក្នុងមន្ទីរពេទ្យសព្វថ្ងៃ ។ គិតមកទល់ពេលនេះ ថវិកាដែលប្រមូលបានពីទឹកចិត្តចែករំលែករបស់ប្រជាជាតិខ្មែរឈាមខ្មែរ ជួយគ្នាមានចំនួនប្រមាណជា៦ម៉ឺនដុល្លារហើយ ដោយរួមបញ្ចូលទាំងអ្នកបរិច្ចាគតាមមធ្យោបាយផ្សេងៗទៀត ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ