ខេត្តកំពង់ឆ្នាំង ៖ គួរឱ្យសង្វេគពេលឃើញនឹងភ្នែក ខណៈដែលខ្ទមដ៍៏រខេករខាកមានជំហរត្រេតទៅម្ខាងស្ទើរដួលដល់ដី មានជញ្ជាំងធ្លុះធ្លាយមើលពីម្ខាងឃើញដល់ម្ខាង ដំបូលប្រក់តង់កៅស៊ូ សថ្លា ជំនួសស្លឹករហែកមើលឃើញមេឃ មានមនុស្សរស់នៅនោះ គឺស្ត្រីដ៏កំសត់ទុរគត់ម្នាក់ដែលកំពុងរៀបចំបង្កាត់ភ្លើងក្នុងចង្ក្រាន…
ខេត្តកំពង់ឆ្នាំង ៖ គួរឱ្យសង្វេគពេលឃើញនឹងភ្នែក ខណៈដែលខ្ទមដ៍៏រខេករខាកមានជំហរត្រេតទៅម្ខាងស្ទើរដួលដល់ដី មានជញ្ជាំងធ្លុះធ្លាយមើលពីម្ខាងឃើញដល់ម្ខាង ដំបូលប្រក់តង់កៅស៊ូ
សថ្លា ជំនួសស្លឹករហែកមើលឃើញមេឃ មានមនុស្សរស់នៅនោះ គឺស្ត្រីដ៏កំសត់ទុរគត់ម្នាក់ដែលកំពុងរៀបចំបង្កាត់ភ្លើងក្នុងចង្ក្រាន ។
ក្នុងខ្ទមដែលស្ទើរតែគ្មានម្លប់ជ្រក ដោយពន្លឺថ្ងៃចាំងពេញក្នុងបរិវេណទីកន្លែងដំណេក ស្ត្រីទុរគតឈ្មោះម៉ៅ គឺន អាយុ៦៤ឆ្នាំ រស់នៅក្នុងភូមិថ្មី ឃុំក្រាំងលាវ ស្រុករលាប្អៀរ បានព្យាយាមរៀបរាប់ពីខ្សែជីវិតដ៏កំសត់របស់គាត់ថា កាលដើមឡើងគាត់ជាក្មេងកំព្រារស់នៅលើដីគេ ជាមួយម្តាយមីង តែក្រោយមក ម្តាយមីងបានស្លាប់ចោលរូបគាត់ក៏ចាប់ផ្តើមរស់នៅតែម្នាក់ឯងដល់បច្ចុប្បន្ន ។
ស្ត្រីទុរគត ម៉ៅ គឺន បានបន្តថា ការរស់នៅរបស់គាត់បានដោយសារអ្នកជិតខាង ហុចបាយ ហុចសម្លរ ពេលខ្លះក៏បានរបបអង្ករ មី ត្រី ខ ពីលោកមេភូមិ ដើម្បីបានរស់កំដរជីវិតចុងក្រោយរបស់គាត់ ។ចំណែកខ្ទមដ៏រខេករខាកនេះ រស់នៅបានតែពេលគ្មានភ្លៀងទេ បើមានភ្លៀងម្តងៗ គាត់រត់ទៅជ្រកនឹងផ្ទះអ្នកជិតខាងហើយ ។
មួយរយៈចុងក្រោយនេះ គាត់មានជំងឺបានទៅសម្រាកព្យាបាលមិនបាននៅផ្ទះទេ ធ្វើឱ្យផ្ទះកាន់តែទ្រុឌទ្រោមថែមទៀតពេលគាត់ត្រឡប់មកវិញ ហើយពេលនោះ តែមានគេមកថតបង្ហោះក្នុងបណ្តាញសង្គម ទើបធ្វើឱ្យមានសប្បុរសជននានា បានមកជួយឧបត្ថម និងក្រុមខ្លះទៀត បានមកជួយសាងសង់ផ្ទះជូនគាត់។ រូបគាត់មានសេចក្តីត្រេកអរខ្លាំងណាស់ នឹងរកអ្វីមកប្រៀបស្មើមិនបានទេ ហើយក៏សូមថ្លែងអំណរគុណដល់បងប្អូនសប្បុរជនទាំងអស់ ទាំងបងប្អូនជួយ ធ្វើផ្ទះ ទាំងបងប្អូនជួយជាអំណោយ និងសូមបងប្អូនទាំងអស់ជួបប្រទះតែសេចក្តីសុខ និងពុទ្ឋពរ៤ប្រការ គឺ អាយុៈ វណ្ណៈ សុខៈ និងពលៈកុំបីឃ្លាងឃ្លាតឡើយ។
បើតាមការបញ្ជាក់ពីគ្រួបង្រៀន លោក ទេព សុខុម ដែលជាសមាជិកក្រុមកង់កំពង់ឆ្នាំង បានបញ្ជាក់ថា ដោយបានដឹងពីភាពលំបាករបស់ស្ត្រី ម៉ៅ គឺន លោក សៀង ប៊ុនណាត ជាប្រធានក្រុមកង់កំពង់ឆ្នាំងបានកៀងគរ ថវិកាពីសមាជិកក្រុមកង់កំពង់ឆ្នាំង និងក្រុមកង់ លីលី បានថវិកាសរុប២លាន៦ម៉ឺន៥ពាន់រៀល មកសាងសង់ផ្ទះជួនស្ត្រីខាងលើ ដែលមានទំហំ៤គុណ៤,៣ម៉ែត្រ ធ្វើពីដែក ប្រក់និងបាំងជញ្ជាំងស័ង្កសី ។
លោកឡុង ហៀងហេង ហៅហេងកាត់កញ្ចក់ជួយផ្ទាំងទប់កំដៅក្រាលក្រោមដំបូល២៥ម៉ែត្រការ៉េ ។ ជាមួយគ្នានោះ លោក សេង វិចិត្រ អភិបាលស្រុករលាប្អៀរ បានជួយចេញថ្លៃក្រាលការ៉ូ មួយពេញ និងជួយធ្វើបង្គន់បន្ថែមមួយជូនគាត់ថែមទៀត ។
លោកគ្រូ ទេព សុខុម បានបន្ថែមថា៖ អ្វីដែលនៅខ្វះខាតសម្រាប់ស្ត្រីទុរគត់ខាងលើនេះ មានអណ្តូងទឹកស្នប់១ គ្រែតូចមួយសម្រាប់គាត់ និងអាហារហូបចុក សម្រាប់ជីវិតចុងក្រោយរបស់គាត់។ ហេតុនេះហើយ លោកក៏សូមចូលរួមជាមួយអាជ្ញាធរ ក៏ដូចជាស្ត្រីខាងលើ សូមបងប្អូនសប្បុរស ទាំងអស់មេត្តាជួយឧបត្ថមនូវក្តីទុក្ខលំបាករបស់ស្ត្រីខាងលើផងចុះ។ សូមបញ្ជាក់ថា៖ ម្ចាស់ដីដែលឱ្យស្ត្រីខាងលើរស់នៅរហូតអស់ជីវិតមានប្តីឈ្មោះសារ៉ាត់ អាយុ៤៥ឆ្នាំនិងប្រពន្ឋឈ្មោះ
សុគន្ឋា អាយុ៤៤ឆ្នាំ ៕
ចែករំលែកព័តមាននេះ