ADផ្ទាំងផ្សព្វផ្សាយពាណិជ្ជកម្ម

Picture

អាជ្ញាធរ​ខេត្តស្ទឹងត្រែង ​ចុះ​ណែនាំ​ទីតាំង​ជួសជុល​ម៉ូតូ​ចំនួន ៣ កន្លែង ឱ្យ​បញ្ឈប់​ការ​កែ​ច្នៃ​បំពង់​ស៊ី​ម៉ាំង​បង្ក​សំឡេង​រំខាន

15 ម៉ោង មុន
  • ស្ទឹងត្រែង

ខេត្តស្ទឹងត្រែង​៖ អាជ្ញាធរ​ខេត្តស្ទឹងត្រែង បាន​ចុះ​ត្រួតពិនិត្យ និង​ធ្វើការ​ណែនាំ​ដល់ទី​តាំង​ជួសជុល​ម៉ូតូ​ចំនួន ៣ កន្លែង ដែល​ពាក់ព័ន្ធ​នឹង​ការ​កែ​ច្នៃ​បំពង់​ស៊ី​ម៉ាំង​ឱ្យ​បង្ក​សំឡេង​ខ្លាំង​ៗ ប៉ះពាល់​ដល់​សណ្តាប់ធ្នាប់​សា​ធារណៈ ។

ប្រតិបត្តិការ​នេះ​ធ្វើ​ឡើង​នៅ​ថ្ងៃ​ទី​១៥ ខែវិច្ឆិកា ឆ្នាំ​២០២៦ ក្រោម​ការ​ដឹកនាំ​របស់​រដ្ឋបាល​ខេត្តស្ទឹងត្រែង​សហការ​ជាមួយ​អាជ្ញាធរ​ក្រុង និង​សង្កាត់ ដោយ​បាន​ចុះ​ពិនិត្យ​ទីតាំង​ជួសជុល​ម៉ូតូ​ចំនួន ៣ កន្លែង ស្ថិត​នៅ​ភូមិ​អូរ​ឫស្សី ក្រុង​ស្ទឹង​ត្រែង ដែល​ត្រូវ​បាន​កំណត់​ថា មាន​សកម្មភាព​កែ​ច្នៃ​បំពង់​ស៊ី​ម៉ាំង​ម៉ូតូ​ឱ្យ​មាន​សំឡេង​ខ្លាំង​ខុស​ពី​លក្ខណៈ​បច្ចេកទេស​។

ក្នុង​ឱកាស​ចុះ​ពិនិត្យ​នេះ អាជ្ញាធរ​បាន​ធ្វើការ​អប់រំ និង​ណែនាំ​ដល់​ម្ចាស់​ទីតាំង​ជួសជុល​ម៉ូតូ​ទាំងនោះ ឱ្យ​ចូលរួម​សហការ​ជាមួយ​អាជ្ញាធរ ដោយ​បញ្ឈប់​សកម្មភាព​កែ​ច្នៃ​បំពង់​ស៊ី​ម៉ាំង​ដែល​បង្ក​សំឡេង​រំខាន និង​គោរព​តាម​លក្ខណៈ​បច្ចេកទេស ដើម្បី​រួមចំណែក​ថែរក្សា​សន្តិសុខ សណ្តាប់ធ្នាប់ និង​បរិយាកាស​រស់នៅ​ប្រកបដោយ​ភាព​សុខសាន្ត​ជូន​ប្រជាពលរដ្ឋ​។

ជាមួយ​គ្នា​នេះ អាជ្ញាធរ​បាន​ព្រមាន​ថា ក្នុង​ករណី​ម្ចាស់​ទីតាំង​ណា​មិន​អនុវត្ត​តាម​ការ​ណែនាំ ឬ​នៅ​តែ​បន្តសកម្មភាព​កែ​ច្នៃ​បំពង់​ស៊ី​ម៉ាំង​បង្ក​សំឡេង​រំខាន​ដដែល អាជ្ញាធរ​នឹង​ពិនិត្យ​លទ្ធភាព​ចាត់វិធានការ​តាម​ផ្លូវច្បាប់ ស្រប​តាម​បទ​ប្បញ្ញត្តិ​ជា​ធរមាន​។

ការ​ចុះ​ណែនាំ​នេះ ធ្វើ​ឡើង​បន្ទាប់​ពី​កាលពី​យប់​ថ្ងៃ​ទី​១៣ ខែវិច្ឆិកា ឆ្នាំ​២០២៦ កម្លាំង​នគរបាល​នៃ​អធិកា​ដ្ឋា​ន​នគរបាល​ក្រុង​ស្ទឹង​ត្រែង បាន​ចុះ​អន្តរាគមន៍​ឃាតខ្លួន​យុវជន​ចំនួន ៦ នាក់ ក្រោយ​រក​ឃើញ​ថា ពួក​គេ​បាន​ជិះ​ម៉ូតូ​ជា​ក្រុម និង​ប្រើប្រាស់​បំពង់​ស៊ី​ម៉ាំង​កែ​ច្នៃ​ដែល​មាន​សំឡេង​ខ្លាំង បង្ក​ការ​រំខាន​ដល់​ប្រជាពលរដ្ឋ​តាម​ដងផ្លូវ​ក្នុង​ក្រុង​។

យោង​តាម​ការ​បញ្ជាក់​របស់​អភិបាលក្រុង​ស្ទឹង​ត្រែង យុវជន​ទាំង ៦ នាក់ មាន​លំនៅ​ឋាន​នៅ​ភូមិ​ត្បូង​ខ្លា ឃុំ​អូរ​ម្រះ ស្រុក​សៀម​បូក ខេត្តស្ទឹងត្រែង​។ ក្រោយ​ពី​ទទួល​បានការ​អប់រំ និង​អនុវត្ត​វិធានការ​រដ្ឋបាល​រួច ពួក​គេ​នឹង​ត្រូវ​បាន​អនុញ្ញាត​ឱ្យ​ត្រឡប់​ទៅ​លំនៅ​ឋាន​វិញ ដោយ​មាន​លក្ខខណ្ឌ​ត្រូវ​ដោះ​បំពង់​ស៊ី​ម៉ាំង​ដែល​បាន​កែ​ច្នៃ​ចេញ និង​ប្តូរ​មក​ប្រើប្រាស់​បំពង់​ស៊ី​ម៉ាំង​ដើម​តាម​លក្ខណៈ​បច្ចេកទេស​វិញ ព្រមទាំង​មាន​អាណាព្យាបាល​ចូលរួម​ធានា និង​ទទួលខុសត្រូវ​ក្នុង​ការ​អប់រំ​កូនចៅ​ផង​ដែរ​។

សកម្មភាព​ទាំងនេះ​បង្ហាញ​ពី​ការ​យកចិត្តទុកដាក់​របស់​អាជ្ញាធរ​មូលដ្ឋាន ក្នុង​ការ​ឆ្លើយ​តប​ទៅ​នឹង​កង្វល់​របស់​ប្រជាពលរដ្ឋ និង​ពង្រឹង​ការ​អនុវត្ត​វិធានការ​ថែរក្សា​សន្តិសុខ សណ្តាប់ធ្នាប់​សាធារណៈ ជា​ពិសេស​ការ​ទប់ស្កាត់​សកម្មភាព​កែ​ច្នៃ និង​ប្រើប្រាស់​បំពង់​ស៊ី​ម៉ាំង​ម៉ូតូ​ដែល​បង្ក​សំឡេង​រំខាន​ដល់​ការ​រស់នៅ​ប្រចាំ​ថ្ងៃ​។

អាជ្ញាធរ​បាន​អំពាវនាវ​ដល់​ម្ចាស់​យានដ្ឋាន​ជួសជុល​ម៉ូតូ អ្នក​ប្រើប្រាស់​ម៉ូតូ និង​អាណាព្យាបាល​យុវជនទាំងអស់ ឱ្យ​ចូលរួម​គោរព​ច្បាប់ ចៀសវាង​ការ​កែ​ច្នៃ​យានយន្ត​ខុស​លក្ខណៈ​បច្ចេកទេស និង​រួម​គ្នា​ថែរក្សា​សណ្តាប់ធ្នាប់​សាធារណៈ ដើម្បី​ធានា​បាន​នូវ​សុខ​សន្តិភាព និង​សេចក្តីសុខ​សាន្ត​ក្នុង​សហគមន៍​ ៕​