ទីក្រុងប៉ារីស ៖ យោងតាមទីភ្នាក់ងារថាមពលអន្តរជាតិ (IEA) កាលពីថ្ងៃទី១៣ វិច្ឆិកា បានប្រកាសថា ទីផ្សារប្រេងឆៅពិភពលោក នឹងវិលត្រឡប់ទៅរកស្ថានភាពការផ្គត់ផ្គង់លើសតម្រូវការវិញ នៅក្នុងត្រីមាសទី៤ នៃឆ្នាំនេះ ដោយសារការនាំចេញពីតំបន់មជ្ឈិមបូព៌ាស្ទុះងើបឡើងវិញ បើទោះបីជាមានការវាយប្រហារបន្តបន្ទាប់លើការដឹកជញ្ជូនយ៉ាងណាក៏ដោយ។ នេះបើតាមការចេញផ្សាយពី Reuters ។
ទីភ្នាក់ងារមានមូលដ្ឋាននៅទីក្រុងប៉ារីសខាងលើបានឱ្យដឹងនៅក្នុងរបាយការណ៍ប្រចាំខែថា ការផ្គត់ផ្គង់ប្រេងនឹងមានជាមធ្យម ១០៥ លានបារ៉ែលក្នុង១ថ្ងៃ នៅក្នុងត្រីមាសទី ៤ ដែលខ្ពស់ជាងតម្រូវការនៃការព្យាករប្រមាណ ១,៧ លានបារ៉ែលក្នុង១ថ្ងៃ ដែលផ្ទុយពីការព្យាករណ៍ពីមុនរបស់ខ្លួនដែលថា នឹងមានឱនភាពការផ្គត់ផ្គង់នៅក្នុងត្រីមាសទី ៤ នៃឆ្នាំនេះ។ ទីភ្នាក់ងារនេះ បានលើកឡើងក្នុងរបាយការណ៍ថា ទីផ្សារប្រេងកំពុងតែបង្ហាញសញ្ញាបណ្តោះអាសន្ននៃការមានតុល្យភាពឡើងវិញ ដោយការផ្គត់ផ្គង់ជាសកលមានលើសពីតម្រូវការជាលើកដំបូង ចាប់តាំងពីការផ្ទុះឡើងនៃសង្គ្រាមនៅអ៊ីរ៉ង់។
តម្លៃប្រេងឆៅបានធ្លាក់ចុះ ក្រោយរបាយការណ៍នេះ ត្រូវបានចេញផ្សាយ ដោយប្រេងឆៅប្រភេទ Brent នៅក្នុងការជួញដូរចុងក្រោយនៃថ្ងៃទី១៣ ខែវិច្ឆិកា បានធ្លាក់ចុះ ០,១% មកនៅត្រឹម ៩៥,៧១ ដុល្លារអាមេរិកក្នុង១បារ៉ែល។
ជាមួយគ្នានោះដែរ IEA ក៏បានផ្តល់ព័ត៌មានលម្អិតបន្ថែមអំពីបរិមាណនៅសល់ ដែលនឹងបានមកពីការបញ្ចេញពីស្តុកប្រេងបម្រុងបន្ទាន់របស់សមាជិកខ្លួន ដែលបានសន្យាកាលពីមីនាកន្លងទៅ ដោយថា ប្រេងចំនួន ៧១ លានបារ៉ែល នឹងត្រូវបានផ្តល់ជូននៅត្រឹមចុងខែកុម្ភៈ ឆ្នាំ២០២៧ រួមទាំងប្រេងម៉ាស៊ូត ១៥ លានបារ៉ែល ដើម្បីជួយបន្ធូរបន្ថយភាពតានតឹងទីផ្សារសកល។
របាយការណ៍នេះបង្ហាញថា ការនាំចេញប្រេងពីតំបន់ឈូងសមុទ្របានស្ទុះងើបឡើងវិញជាពិសេសដោយសារការជំរុញពីប្រទេសអារ៉ាប៊ីសាអូឌីត និងអ៊ីរ៉ាក់ បើទោះជាកប៉ាល់ដឹកជញ្ជូនមួយចំនួន ត្រូវប្រើប្រាស់វិធីសាស្ត្រឆ្លងកាត់ដោយបិទប្រព័ន្ធតាមដាន ឆ្លងកាត់តាមច្រកសមុទ្រហ័រមូស (Hormuz) ដើម្បីគេចចេញពីការវាយប្រហារយ៉ាងណាក៏ដោយ។
លើសពីនេះ ក្រុម OPEC+ ដែលរួមមានអង្គការនៃប្រទេសនាំចេញប្រេង (OPEC) និងសម្ព័ន្ធមិត្ត ដូចជាប្រទេសរុស្ស៊ីជាដើម បានផលិតប្រេងចំនួន ៤១,២៣លានបារ៉ែលក្នុង១ថ្ងៃ កាលពីខែតុលាកន្លងទៅ ដែលជាការកើនឡើងប្រហែល ២,០៤លានបារ៉ែលក្នុង១ថ្ងៃ បើធៀបនឹងខែកញ្ញា ឬស្មើនឹង ៩៧% នៃបរិមាណ កាលពីខែកុម្ភៈ មុនពេលផ្ទុះសង្គ្រាមនៅអឺរ៉ុង។
សម្រាប់ឆ្នាំ ២០២៧ IEA មើលឃើញថា ទីផ្សារប្រេងអាចនឹងជួបស្ថានភាពលើសតម្រូវការកាន់តែខ្លាំងថែមទៀត ប្រហែល ៣,៨ លានបារែលក្នុង១ថ្ងៃ ដោយបានធ្លាក់ចុះបន្តិចពីការព្យាកររបស់ខ្លួនចំនួន ៣,៩៤ លានបារ៉ែលក្នុង១ថ្ងៃ កាលពីខែមុន៕
ចែករំលែកព័តមាននេះ