សម្តេចបវរធិបតី លើកឡើងពីបញ្ហាព្រំដែនកម្ពុជា-ថៃ និងថៃកាន់កា.ប់ទឹកដីកម្ពជាដោយខុសច្បាប់ ក្នុងកិច្ចប្រជុំកំពូលហ្វ្រង់កូហ្វូនី លើកទី២០
- ភ្នំពេញ
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា នៅក្នុងកិច្ចប្រជុំកំពូលហ្វ្រង់កូហ្វូនី លើកទី២០ ដែលកម្ពុជាម្ចាស់ផ្ទះយ៉ាងដូច្នេះថា ទោះបីជាមានបទឈប់បាញ់យ៉ាងណាក្តី កងទ័ពរាប់ពាន់នាក់នៅតែប្រឈមមុខដាក់គ្នា ដែនអធិបតេយ្យរបស់កម្ពុជាជាច្រើនកន្លែង នៅតែត្រូវបានកាន់កាប់ដោយខុសច្បាប់ពីសំណាក់កងទ័ពថៃ ។
ថ្លែងសុន្ទរកថា ក្នុងពិធីបើកកិច្ចប្រជុំកំពូលហ្វ្រង់កូហ្វូនី លើកទី២០ នាព្រឹកថ្ងៃទី១៥ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ (CCEC ) ក្នុងរាជធានីភ្នំពេញ ក្រោមមូលបទ «រួមគ្នាបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង» សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានជម្រាបជូនអង្គប្រជុំអំពីស្ថានភាពសន្តិសុខនៅតាមបណ្តោយព្រំដែនកម្ពុជា-ថៃ ដែលបានកើតមានការប៉ះទង្គិចដោយអាវុធចំនួន ២លើក កាលពីឆ្នាំ២០២៥ ដោយសម្តេចបានបញ្ជាក់ច្បាស់ៗថា កម្ពុជាមិនមែនជាអ្នកផ្ដើមបាញ់មុននោះឡើយ ។
សម្តេចធិបតីបានគូសបញ្ជាក់ថា ៖«បើទោះបីជាមានបទឈប់បាញ់ កាលពីថ្ងៃទី២៧ ខែធ្នូ ឆ្នាំ២០២៥ ក៏ដោយ ក៏ស្ថានភាពនៅតែមានភាពស្មុគស្មាញ និងផុយស្រួយនៅឡើយ ដោយកងទ័ពរាប់ពាន់នាក់នៅតែប្រឈមមុខដាក់គ្នា ដែនអធិបតេយ្យរបស់កម្ពុជាជាច្រើនកន្លែង នៅតែត្រូវបានកាន់កាប់ដោយខុសច្បាប់ពីសំណាក់កងទ័ពថៃ និងបានបង្ខំឱ្យប្រជាពលរដ្ឋកម្ពុជាប្រមាណ២០.០០០នាក់ នៅមិនទាន់អាចវិលត្រឡប់ទៅកាន់លំនៅឋានវិញបាន» ។
ជុំវិញបញ្ហាព្រំដែននេះ សម្តេចនាយករដ្ឋមន្ត្រី បានប្រកាសជំហរយ៉ាងម៉ឺងម៉ាត់របស់កម្ពុជា ដោយអំពាវនាវឱ្យមានការគោរពកិច្ចព្រមព្រៀងជាធរមានទាំងអស់ និងស្នើឱ្យចាប់ផ្តើមឡើងវិញនូវការងារវាស់វែង និងខណ្ឌសីមាព្រំ ដែនគោកដែលមានស្រាប់តាំងពីជាងមួយសតវត្សរ៍មុន ចំណែកឯនៅតំបន់សមុទ្រវិញ កម្ពុជាបានជ្រើសរើសយកផ្លូវច្បាប់តាមរយៈយន្តការផ្សះផ្សាដោយបង្ខំក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) ដែលភាគីថៃក៏បានចូលរួមក្នុងនីតិវិធីនេះផងដែរ ។
សម្តេចធិបតី ហ៊ុន ម៉ាណែត បានសង្កត់ធ្ងន់ទៅលើគោលការណ៍ច្បាប់អន្តរជាតិថា «គ្មានព្រំដែនណាមួយត្រូវបានផ្លាស់ប្តូរដោយការប្រើប្រាស់កម្លាំងអាវុធ ឬការបង្កើតអង្គហេតុសម្រេចលើទីតាំងនោះឡើយ ។ ការគោរពច្បាប់អន្តរជាតិ គឺជាការធានាបាននូវសន្តិសុខដល់គ្រប់បណ្តារដ្ឋមិនថា ជារដ្ឋធំ ឬតូចឡើយ» ។
ជាមួយគ្នានេះ សម្តេចមហាបវរធិបតី បានថ្លែងអំណរគុណចំពោះអាស៊ាន និងបណ្តាប្រទេសជាមិត្តនៃសហគមន៍អន្តរជាតិ ដែលបានគាំទ្របទឈប់បាញ់ និងដំណោះស្រាយតាមរយៈកិច្ចសន្ទនា និងច្បាប់អន្តរជាតិ ។
លើកពីនេះ សម្តេចនាយករដ្ឋមន្ត្រីបានគូសបញ្ជាក់ពីតម្លៃនៃសន្តិភាព និងការអភិវឌ្ឍរួមគ្នាថា «ការកសាងសន្តិភាព ត្រូវការពេលវេលាច្រើនជំនាន់ ប៉ុន្តែការបាត់បង់សន្តិភាព អាចកើតឡើងក្នុងរយៈពេលតែប៉ុន្មានថ្ងៃប៉ុណ្ណោះ ។ សន្តិភាពបង្កើតឱ្យមានទំនុកចិត្ត ។ ទំនុកចិត្តទាក់ទាញការវិនិយោគ ហើយវិបុលភាពរួម គឺជាកត្តាការពារសន្តិភាព»៕
ចែករំលែកព័តមាននេះ