ព្រះមហាក្សត្រ ៖ សេចក្តីថ្លែងការណ៍ទីក្រុងភ្នំពេញនាំឱ្យមានការពង្រឹងសន្តិភាព ការបង្រួបបង្រួមជាតិ និងនាំយកស្នាមញញឹមខ្មែរទៅកាន់ពិភពលោក
- ភ្នំពេញ
រាជធានីភ្នំពេញ ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឫទ័យក្រើនរម្លឹកដល់អង្គប្រជុំអំពីតម្លៃមិនអាចកាត់ថ្លៃបាននៃសន្តិភាព ការអភិវឌ្ឍដោយផ្អែកលើការបង្រួបបង្រួមជាតិ និងស្មារតីអហិង្សា ដោយយកឈ្នះសេចក្តីស្អប់ដោយសេចក្តីស្រឡាញ់ ។
ព្រះករុណាជាអម្ចាស់ជីវិតលើត្បូង បានមានព្រះរាជបន្ទូលក្នុងពិធីបើកកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ នាព្រឹកថ្ងៃទី១៥ ខែវិច្ឆិកា ឆ្នាំ២០២៦ ដោយព្រះអង្គបានទតឃើញថា «ប្រវត្តិសាស្ត្ររបស់យើងបានបង្រៀនយើងថា វិបុលភាពមិនអាចស្ថិតស្ថេរបានឡើយ ប្រសិនបើគ្មានសន្តិភាព ។ សម្រាប់យើង ការរួមគ្នាបន្តកសាងសន្តិភាព មានន័យថា ការផ្តល់ជូនមនុស្សជំនាន់ក្រោយនូវអ្វីដែលប្រជាជនរបស់យើងបច្ចុប្បន្នពុំមានយូរមកហើយ ។ ដែលនោះ គឺជាអត្ថន័យនៃការរស់ឡើងវិញរបស់ជាតិយើង» ។ ព្រះអង្គបានសង្ឃឹមយ៉ាងមុតមាំថាសេច ក្តីថ្លែងការណ៍ទីក្រុងភ្នំពេញ សេចក្តីសម្រេច និងសេចក្តីអំពាវនាវដែលនឹងដាក់ឈ្មោះតាមរាជធានីនៃប្រទេសកម្ពុជានេះ នឹងត្រូវយកទៅប្រែក្លាយជាការប្តេជ្ញាចិត្តជាក់ស្តែង និងសកម្មភាពដែលមាននិរន្តរភាព ដោយត្រូវផ្តល់តួនាទីពេញលេញដល់ស្ត្រី និងយុវជនក្នុងការសម្រេចចិត្ត និងកសាងសន្តិភាព ដែលជាលក្ខខណ្ឌដ៏សំខាន់ដើម្បីធានាឱ្យសន្តិភាពមានភាពរឹងមាំ និងយូរអង្វែង ។
ទាក់ទងនឹងអត្តសញ្ញាណ និងប្រវត្តិសាស្ត្ររបស់ប្រជាជាតិកម្ពុជា ព្រះមហាក្សត្របានមានព្រះរាជបន្ទូលរៀបរាប់អំពី «ស្នាមញញឹមខ្មែរ» ដែលឆ្លុះបញ្ចាំងទាំងនៅលើព្រះភក្ត្រថ្មនៃប្រាសាទបាយ័ន និងតាមបណ្តាទីផ្សារ វត្តអារាម និងសាលារៀន ដែលធ្លាប់បានបាត់បង់ក្នុងសម័យសោកនាដកម្ម មុននឹងវិលត្រឡប់មកវិញតាមរយៈការជ្រើសរើសយកផ្លូវនៃការបង្រួបបង្រួមជាតិ ។
ជាមួយគ្នានោះដែរ ព្រះអង្គបានសង្កត់ធ្ងន់លើស្មារតីអភ័យទោស និងពុទ្ធឱវាទដ៏មានតម្លៃថា «ប្រជាជនរបស់យើងខ្ញុំយល់ច្បាស់ណាស់ថា ការកសាងប្រទេសឡើងវិញ មិនអាចផ្អែកលើការសងសឹកនោះទេ ហើយពុទ្ធឱវាទដែលដិតជាប់ប្រជាជនទាំងអស់ គឺតែងតែក្រើនរម្លឹកអំពីបញ្ហានេះជានិច្ចដោយសេចក្តីស្អប់មិនអាចរំលាយដោយសេចក្តីស្អប់បានឡើយ គឺមានតែសេចក្តីស្រឡាញ់តែប៉ុណ្ណោះ ទើបអាចរំលាយសេចក្តីស្អប់បាន» ។ ព្រះករុណា ព្រះបាទសម្តេចព្រះបរមនាថនរោត្តម សីហមុនី បានមានព្រះរាជបន្ទូលអញ្ជើញគណៈប្រតិភូអន្តរជាតិទាំងអស់នាំយករសជាតិនៃសន្តិភាព និងមិត្តភាពនេះត្រឡប់ទៅកាន់ប្រទេសៀងៗខ្លួនវិញថា «ខ្ញុំសូមឯកឧត្តម លោកជំទាវ អស់លោក លោកស្រី នាំយកទៅជាមួយនូវស្នាមញញឹមនេះពីទីក្រុងភ្នំពេញ ។ នៅកម្ពុជា រៀងរាល់ពេលព្រឹក សន្តិភាពចាប់ផ្តើមពីស្នាមញញឹមដែលមនុស្សម្នាក់ផ្ដល់ទៅមនុស្សម្នាក់ និងការលើកដៃសំពះគ្នា ។ ហើយព្រឹកមិញនេះ យើងខ្ញុំក៏បានលើកដៃសំពះទៅកាន់ឯកឧត្តម លោកជំទាវ អស់លោក លោកស្រីផងដែរ»។
ព្រះមហាក្សត្រក៏បានសម្តែងនូវព្រះរាជសព្ទសាធុការពរជ័យឱ្យកិច្ចពិភាក្សា និងការបំពេញការងាររបស់គណៈប្រតិភូទាំងអស់ ទទួលបានជោគជ័យពេញលេញ ដោយក្តីសង្ឃឹមយ៉ាងមុតមាំថា កិច្ចប្រជុំកំពូលនៅរាជធានីភ្នំពេញនេះ នឹងបន្សល់ទុកនូវស្នាមប្រវត្តិសាស្ត្រដ៏យូរអង្វែងនៅក្នុងគ្រួសារហ្វ្រង់កូហ្វូនីទាំងមូល ៕
ចែករំលែកព័តមាននេះ