រថយន្តមួយគ្រឿង បើកសុខៗ ស្រាប់តែមានភ្លើងឆេះសន្ធោសន្ធៅ ផ្អើលជិតផ្សារបឹងបៃតង
- ភ្នំពេញ
រាជធានីភ្នំពេញ ៖ រថយន្តម៉ាក VOLVO -XC90 មួយគ្រឿងជិះដោយជនជាតិចិន២នាក់ប្ដីប្រពន្ធពុំដឹងថាឆ្លងចរន្ត ឬបែបណានោះទេ ខណៈពេលកំពុងបើកបរតាមផ្លូវសុខៗ ស្រាប់តែមានភ្លើងឆាបឆេះប្លុកម៉ាស៊ីសន្ធោសន្ធៅ បង្កឲ្យមានការភ្ញាក់ផ្អើលទាំងថ្ងៃ ។ ពេលនោះប្រជាពលរដ្ឋបាននាំគ្នាជួយយកបំពង់ពន្លត់អគ្គភ័យបាញ់ពន្លត់រហូតរលត់ទៅវិញ ហើយរថយន្តបានរងការខូចខាតប្រើការលែងកើត ប៉ុន្តែមិនបានបណ្ដាលឲ្យប្ដីប្រពន្ធជនជាតិចិននោះរងរបួសឡើយ ។
ហេតុការណ៍នោះបានកើតឡើងកាលពីវេលាម៉ោង៣និង១០នាទីរសៀលថ្ងៃទី១៥ ខែវិច្ឆិកា ឆ្នាំ២០២៦ នៅលើកំណាត់មហាវិថីឈ្នះឈ្នះ(ផ្លូវអូដឹមកប់ស្រូវ) ត្រង់ចំណុចជិតផ្សារបឹងបៃតង ស្ថិតនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
រថយន្តម៉ាកVOLVO -XC90 ១គ្រឿងនោះ ពណ៍សូកូឡា ពាក់ស្លាកលេខភ្នំពេញ2BH-1517 ដោយឡែកប្រពន្ធជនជាតិចិន ដែលជាអ្នកបើកបរនិងជិះរថយន្តនេះ មិនត្រូវបានស្គាល់អត្តសញ្ញាណនោះទេ ។
សាក្សីនៅទីតាំងខាងលើបាននិយាយថា នៅមុនពេលកើតហេតុ ជនជាតិចិន២នាក់ប្ដីប្រពន្ធនោះបានជិះរថយន្តនេះចេញពីរាជធានីភ្នំពេញ ឆ្ពោះទៅកាន់ខេត្តព្រះសីហនុ ដោយបានធ្វើដំណើរតាមមហាវិថីឈ្នះឈ្នះក្នុងទិសដៅពីត្បូងទៅជើង ក្នុងបំណងឡើងតាមផ្លូវល្បឿនលឿន ។ លុះពេលទៅដល់ត្រង់ចំណុចកើតហេតុ នៅសល់ចម្ងាយប្រមាណជាង១គីឡូម៉ែត្រទៀតដល់ផ្លូវល្បឿនលឿន ស្រាប់តែមានអណ្ដាតភ្លើងឆេបឆេះប្លុកម៉ាស៊ីនរថយន្ត ។ ភ្លាមៗនោះពួកគាត់ក៏បានឈប់រថយន្តរួចបើកទ្វារចុះចេញទាន់ពេល ទើបមិនបានបណ្ដាលឲ្យរងរបួសឡើយ ចំណែករថយន្ត ក៏ត្រូវភ្លើងឆេះ១កំណាត់មុខសន្ធោសន្ធៅ ។
សាក្សីដដែលបានប្រាប់ឲ្យដឹងបន្តទៀតថា ខណៈនោះបានបង្កឲ្យមានការភ្ញាក់ផ្អើលដល់ប្រជាពលរដ្ឋដែលស្ថិតនៅក្បែរនោះបាននាំគ្នាជួយយកបំពង់ពន្លត់អគ្គិភ័យទៅបាញ់ពន្លត់ រហូតរលត់ទៅវិញទាំងស្រុង ដោយពុំបានរំខានដល់រថយន្តពន្លត់អគ្គិភ័យឡើយ ។
ក្រោយពេលកើតហេតុម្ចាស់រថយន្តខាងលើបានហៅរថយន្តស្ទូច១គ្រឿងទៅដឹកយករថយន្តនេះចេញពីកន្លែងកើតហេតុ ដើម្បីយកទៅធ្វើការជួសជុលឡើងវិញ ៕
ចែករំលែកព័តមាននេះ