ខេត្តមណ្ឌលគិរី ៖ ក្រៅពីបំពេញតួនាទីភារកិច្ចស្នូលរបស់ខ្លួនប្រចាំថ្ងៃ កម្លាំងអាវុធហត្ថខេត្តមណ្ឌលគិរី បានឆ្លៀតពេល ដើម្បីចូលរួមជួយសម្រាលបន្ទុកដល់មន្ទីរពេទ្យដែលមានតម្រូវការឈាមចាំបាច់សម្រាប់សង្គ្រោះបន្ទាន់ដល់ជនរងគ្រោះ និងអ្នកជំងឺនានា លោកឧត្តមសេនីយ៍ត្រី ហែម បូណារ៉ែល…
ខេត្តមណ្ឌលគិរី ៖ ក្រៅពីបំពេញតួនាទីភារកិច្ចស្នូលរបស់ខ្លួនប្រចាំថ្ងៃ កម្លាំងអាវុធហត្ថខេត្តមណ្ឌលគិរី បានឆ្លៀតពេល ដើម្បីចូលរួមជួយសម្រាលបន្ទុកដល់មន្ទីរពេទ្យដែលមានតម្រូវការឈាមចាំបាច់សម្រាប់សង្គ្រោះបន្ទាន់ដល់ជនរងគ្រោះ និងអ្នកជំងឺនានា លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី នៅព្រឹកថ្ងៃទី១៣ ខែកុម្ភៈ ឆ្នាំ២០២៥ បានដឹកនាំកម្លាំងក្រោមឱវាទបរិច្ចាគឈាមនៅមន្ទីរពេទ្យបង្អែកខេត្តមណ្ឌលគិរី ។
លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរីមានប្រសាសន៍ថា ដោយគោរពតាមអនុសាសន៍ដ៏ខ្ពង់ខ្ពស់របស់នាយឧត្តមសេនីយ៍ សៅ សុខា មេបញ្ជាការរងកងយុទ្ឋពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសតែងផ្តាំផ្ញើរថា កម្លាំងអាវុធហត្ថមិនត្រឹមតែមានតួនាទីរក្សាការពារសន្តិសុខសណ្តាប់ធ្នាប់ក្នុងសង្គមនោះទេ កិច្ចការងារមនុស្សធម៌ ការងារសង្គម ក៏ជាភារកិច្ចដ៏សំខាន់របស់មន្ត្រីកម្លាំងអនុវត្តផងដែរ ។
ជាក់ស្តែង នាពេលនេះយោធិនអាវុធហត្ថចំនួន៤១នាក់ បានស្ម័គ្រចិត្តចូលរួមក្នុងយុទ្ឋនាការបរិច្ចាគឈាមជូនមន្ត្រីពេទ្យបង្អែកខេត្តមណ្ឌលគិរី ចំថ្ងៃទី១៤ កុម្ភៈ ដែលជាទិវានៃសេចក្តីស្រឡាញ់ និងបានសបញ្ជាក់ពីស្មារតីទទួលខុសត្រូវមួយផ្នែក ក្នុងនាមអ្នកការពារ បង្ការ និងសង្គ្រោះ ដែលកម្លាំងអាវុធហត្ថទាំងអស់បានចំនាយទាំងកម្លាំងកាយចិត្តជូនដល់ជាតិមាតុភូមិនិងប្រជាពលរដ្ឋរបស់ខ្លួន ។
លោកវេជ្ជបណ្ឌិត ប៊ុន សួ ប្រធានមន្ទីរសុខាភិបាលខេត្តមណ្ឌលគិរី និងលោកវេជ្ជបណ្ឌិត ទុយ ស្រស់ ប្រធានមន្ទីរពេទ្យបង្អែកខេត្តមណ្ឌលគិរីបានថ្លែងអំណរគុណជាអនេកដល់លោកមេបញ្ជាការកងរាជអាវុធហត្ថខេត្ត ដែលបានដឹកនាំកម្លាំងក្រោមឱវ៉ាទចូលរួមបរិច្ចាគឈាមជូនដល់មន្ទីរពេទ្យ ដើម្បីទុកជួយសង្គ្រោះបន្ទាន់ដល់អ្នកជំងឺ ឬជនរងគ្រោះក្នុងហេតុការនានា ខណៈដែលបច្ចុប្បន្ននេះមន្ទីរពេទ្យបង្អែកខេត្តមណ្ឌលគិរី មានតម្រូវការឈាមច្រើនដើម្បីជួយដល់អ្នកជំងឺ។
លោកវេជ្ជបណ្ឌិតមានប្រសាសន៍បន្តថា គ្រាប់ឈាមនៅក្នុងរាងកាយរបស់មនុស្សយើង មានអាយុត្រឹមតែ ១២០ថ្ងៃប៉ុណ្ណោះ ហើយបើយើងបានបរិច្ចាគផ្តល់ឈាមចាស់ នឹងផ្លាស់មកកោសិកាគ្រាប់ឈាមថ្មីមកវិញ ជាពិសេស គឺធ្វើឲ្យយើងមានអារម្មណ៍ល្អសប្បាយចិត្ត ពេលបានបរិច្ចាគឈាមជួយសង្គ្រោះអ្នកជំងឺ ហើយវាក៏ជាអំពើល្អមួយក្នុងសង្គមផងដែរ។
ក្នុងនាមមន្ទីរសុខាភិបាលខេត្តមណ្ឌលគិរី និងមន្ទីរពេទ្យបង្អែកខេត្ត លោកវេជ្ជបណ្ឌិត សូមអំពាវនាវ បន្ថែមដល់ប្រជាពលរដ្ឋ ក៏ដូចជាសប្បុរសជន ជួយបរិច្ចាគឈាម ដើម្បីបង្ហាញពីក្តីស្រលាញ់ និងការធ្វើអំពើល្អនៅក្នុងសង្គម ក្នុងនាមជាពលរដ្ឋកម្ពុជា ជាពិសេស បានសង្គ្រោះមនុស្សដែលទន្ទឹងរង់ចាំការឧបត្ថម្ភឈាម ដើម្បីសង្គ្រោះជីវិតផងដែរ៕
ចែករំលែកព័តមាននេះ