លោកតាអតីតគ្រូបង្រៀនធ្លាក់ខ្លួនពិការទទួលបានអំណោយកាកបាទក្រហម

ថ្ងៃទី ១៩ ខែ តុលា ឆ្នាំ ២០១៩

ម៉ោង ១០:០០

រាជធានីភ្នំពេញ ៖ ក្រោយកាសែត និងគេហទំព័រកោះសន្តិភាពចុះផ្សាយពីជីវិតអតីតគ្រូបង្រៀនម្នាក់ ធ្លាក់ខ្លួនពិការ និងជិះរទេះលក់សម្ភារផ្ទះបាយដ៏កម្សត់នោះ នៅល្ងាចថ្ងៃទី១៨ តុលា ក្រុមការងារសាខាកាកបាទក្រហមកម្ពុជារាជធានីភ្នំពេញ ដឹកនាំដោយលោក សោម ចន្ត្រា នាយករងសាខា តំណាងលោក ជិន ប៊ុនធឿន នាយកប្រតិបត្តិសាខា លោកស្រី កែវ និមល តំណាងលោក ថេង សុថុល ប្រធានគណៈកម្មាធិការអនុសាខាខណ្ឌចំការមន រួមជាមួយក្រុមការងារ បានចុះសាកសួរសុខទុក្ខ និងនាំយកអំណោយមនុស្សធម៌ទៅផ្តល់ជូនដល់លោកតា ឡុង សាម៉ុន អាយុ៧៥ឆ្នាំ ជាអតីតគ្រូបង្រៀន ស្ថិតនៅភូមិសំបូរ ឃុំសំបូរ ស្រុកសំបូរ ខេត្តក្រចេះ ដែលបានធ្លាក់ខ្លួនពិការប្រកបមុខរបរជិះរទេះលក់សម្ភារផ្ទះបាយ បច្ចុប្បន្ន គាត់ស្នាក់នៅក្នុងវត្តនួនមណីរាម ហៅវត្តថាន់ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។ សូមរំលឹកថា៖ អតីតគ្រូបង្រៀនដ៏កម្សត់ ជិះរទេះលក់សម្ភារផ្ទះបាយ

នាឱកាសនោះ លោកនាយករងសាខាបានមានប្រសាសន៍ ពាំនាំមកនូវការផ្តាំផ្ញើសាកសួរសុខទុក្ខប្រកបដោយក្តីអាណិតអាសូរពីលោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់លោកតា ឡុង សាម៉ុន ព្រមទាំងសូមកោតសរសេីរដល់លោក ទោះបីជាធ្លាក់ខ្លួនពិការក៏ដោយ តែលោកបានខិតខំពុះពារប្រកបមុខរបរដោយខ្លួនឯង ដេីម្បីចិញ្ចឹមជីវិត ។