តួ​ក​គី​យល់ព្រម​ផ្អាក​​ប្រតិបត្តិការ​យោធា​តាម​សំណើ​អា​មេ​រិ​ក


ប្រទេស​តួ​ក​គី​-​ស៊ី​រី ៖ តួ​ក​គី​កាលពី​ថ្ងៃ​ទី​១៧​តុលា​ព្រម​ទទួលយក ការ​ផ្អាក​វាយលុក​នៅ​ភាគ​ឦសាន​ស៊ី​រី​ហើយនឹង​បញ្ឈប់​ជា​ស្ថាពរ​ការ​វាយលុក ប្រសិនបើ​កងកម្លាំង​ឃើ​ត​ព្រម​ដកថយ​អំឡុង​ពេល​៥​ថ្ងៃ​។ កិច្ចព្រមព្រៀង​នោះ​ទទួល​បាន​ក្រោយ​ការ​ចរចា​គ្នា​នៅ​ទីក្រុង​អង់កា​រ៉ា រវាង​ប្រធានា​ធិបតី​តួ​ក​គី​លោក​រី​ស៊ី​ប​តៃ​យី​ប​អ័​រ​ដូ​ហ្គា​ន​និង​អនុ​ប្រធានាធិបតី​អា​មេ​រិ​ក លោក​MIKE PENCE​។

ក្រោយ​ការ​ចរចា​គ្នា​ជាង​៤​ម៉ោង​ជាមួយ​ប្រធានាធិបតី​តួ​ក​គី លោក​MIKE PENCE​ថ្លែង​ទៅ​កាន់​សារព័ត៌មាន​ថា ដើម្បី​អាច​ឲ្យ​កងកម្លាំង​ឃើ​ត​ដកថយ​ក្នុង​រយៈពេល​១២០​ម៉ោង រាល់​ប្រតិបត្តិការ​យោធា ក្នុង​ក្រប​ខណ្ឌ​នៃប្រតិបត្តិ​ការ​របស់​តួ​ក​គី​ឈ្មោះ​ប្រភព​នៃ​សន្តិភាព​នឹង​ត្រូវ​ផ្អាក ហើយ​ប្រតិបត្តិការ​នឹង​បញ្ឈប់​ទាំងស្រុង បើ​ដរាបណា​ការ​ដកថយ​នៃ​កងកម្លាំង​ឃើ​ត​ត្រូវ​បាន​បង្ហើយ​។

យោង​តាម​កិច្ចព្រមព្រៀង​ប្រកាស​ដោយ​លោក​MIKE PENCE កងកម្លាំង​ឃើ​ត​នឹង​ត្រូវ​ដក​ចេញពី​តំបន់​មួយ​មាន​ជម្រៅ​៣២​គីឡូម៉ែត្រ​ពី​ព្រំដែន​តួ​ក​គី ដោយ​ប្រែក្លាយ​តំបន់​នោះ​ទៅ​ជា​តំបន់​សន្តិសុខ ដែល​នោះ​ជា​បំណង​របស់​តួ​ក​គី​ចាប់តាំងពី​ច្រើន​ខែ​មក​ហើយ​។

កងកម្លាំង​ឃើ​ត​អះអាង​ថា​ត្រៀមខ្លួន​គោរព​បទ​ឈប់​បាញ់​គ្នា​ជាមួយ​តួ​ក​គី​។ ចំណែក​តួ​ក​គី​វិញ​សន្យា​ចំពោះ​អា​មេ​រិ​កថា តំបន់​សន្តិសុខ​នោះ​នឹង​បណ្ដោះអាសន្ន​ហើយនឹង​មិន​បង្ក​ឲ្យ​មានការ​ភៀសខ្លួន​ច្រើន​របស់​ប្រជាជន​ឡើយ​។ នេះ​ជា​ការ​អះអាង​កាលពី​យប់​ថ្ងៃ​ទី​១៧​តុលា របស់​តំណាង​ពិសេស​អា​មេ​រិ​ក​សម្រាប់​ស៊ីរី លោក​JAMES JEFFREY​ក្នុង​យន្តហោះ​របស់​រដ្ឋមន្ត្រី​ការ​បរទេស​អា​មេ​រិ​ក លោក​MIKE POMPEO​។

មានឈ្មោះ​ថា​ប្រភព​នៃ​សន្តិភាព ការ​វាយលុក​របស់​តួ​ក​គី​ប្រឆាំង​កងកម្លាំង​ឃើ​ត​ក្រុម​YPG នៅ​ភាគ​ឦសាន​ស៊ី​រី​ដែល​បើក​ធ្វើ​ពី​ថ្ងៃ​ទី​៩​តុលា​មក នាំ​ឲ្យ​មានការ​បរិហារ​យ៉ាង​ខ្លាំង​របស់​អន្តរជាតិ មក​ពី​តួនាទី​សំខាន់​របស់​កងកម្លាំង​ឃើ​ត ក្នុង​ការ​តស៊ូ​ប្រឆាំង​ពួក​ជី​ហា​ដ​ក្រុម​រដ្ឋ​អ៊ិ​ស្លា​ម​។ ប៉ុន្តែ​ក្រុង​អង់កា​រ៉ា​ចាត់​ទុក​ពួក​នោះ​ថា​ជា​ពួក​ភេរវ​ករ មក​ពី​ពួក​គេ​មាន​ទំនាក់ទំនង​ជាមួយ​គណបក្ស​ឃើ​ត​ឌី​ស្ថាន​PKK​តួ​ក​គី ដែល​ធ្វើសង្គ្រាម​ទ័ពព្រៃ​បង្ហូរឈាម​នៅ​តួ​ក​គី​ចាប់តាំងពី​ឆ្នាំ​១៩៨៤​មក​។

រដ្ឋមន្ត្រី​ការ​បរទេស​តួ​ក​គី​លោក​MEVLUT CAVUSOGLU​អះអាង​ថា កិច្ចព្រមព្រៀង​នេះ​ដែល​ជា​កម្មវត្ថុ​នៃ​សេចក្ដីថ្លែងការណ៍​រួម​មួ​​យ រវាង​តូ​ក​គី​និង​អា​មេ​រិ​ក​ស្ដី​ពី​ភាគ​ឦសាន​ស៊ី​រី​ហើយ​ត្រូវ​ចេញ​ផ្សាយ​នា​ពេល​យប់​។ លោក​ថា​យើង​ផ្អាក​ប្រតិបត្តិការ​តែ​យើង​មិន​ទាន់​បញ្ឈប់​វា​ទេ​។ យើង​អាច​បញ្ឈប់​ប្រតិបត្តិការ​តែ​នៅ​ពេល​កងកម្លាំង​ឃើ​ត​នឹង​ដកថយ​ទាំងស្រុង​ពី​តំបន់​។ លោក​បដិសេធ​មិន​និយាយ​ពី​បទ​ឈប់​បាញ់​គ្នា​មួយ​ឡើយ​៕ (​កែសម្រួល​ដោយ ៖ បុប្ផា​)

Facebook Google Twitter Email

ព័ត៌មាន​អន្តរជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ