ទីក្រុងហាណូយ៖ ប្រទេសវៀតណាមភាគកណ្ដាលកំពុងរងគ្រោះយ៉ាងធ្ងន់ធ្ងរដោយសារទឹកជំនន់ក្រោយពេលមានភ្លៀងធ្លាក់ខ្លាំងជាច្រើនថ្ងៃជាប់គ្នា។ អាជ្ញាធរអះអាងថាគេរកឃើញសាកសពជនរងគ្រោះយ៉ាងតិចដប់នាក់។ ភ្លៀងបន្តធ្លាក់ខ្លាំងបំផុតនៅតាមបណ្ដាខេត្តជាប់នឹងមាត់សមុទ្រចាប់តាំងពីចុងសប្ដាហ៍មុនរហូតមកដល់ពេលនេះមិនទាន់រាំងទៅវិញនៅឡើយទេ។ នៅតំបន់ខ្លះត្រឹមតែរយៈពេល២៤ម៉ោងប៉ុណ្ណោះទទួលបានរបបទឹកភ្លៀង១,៧ម៉ែត្រ។
អ្នករាយការណ៍ព័ត៌មានរបស់អាអែហ្វប៉េ (AFP) ថ្លែងថាប្រជាជនរស់នៅទីក្រុងហយអាន (Hoi An) ត្រូវហ៊ុមព័ទ្ធដោយវាលទឹក។ បើចង់ធ្វើដំណើរទៅណាម្ដងៗ ពួកគេត្រូវតែជិះទូកឈើឆ្លងកាត់ទឹកលិចត្រឹមចង្កេះ។ អ្នកខ្លះប្រាប់ថាពួកគេត្រូវលើករបស់របរ និងគ្រឿងសង្ហារិមឱ្យខ្ពស់ផុតពីទឹកដែលលិចពេញទីក្រុង។ ប៉ុន្តែទឹកជំនន់ចេះតែឡើងខ្ពស់ទៅៗជាហេតុធ្វើឱ្យពួកគេលែងខ្វល់តទៅទៀត។
នៅទីបញ្ចប់ ទូទឹកកក ចង្ក្រាន្តអគ្គិសនី និងគ្រឿងសង្ហារិមត្រូវទឹកលិចសឹងតែទាំងស្រុង។ ពួកគេពុំដែលជួបប្រទះទឹកជំនន់ដ៏ខ្លាំងក្លាដល់ថ្នាក់នេះទេ។ ក្រៅពីជនរងគ្រោះដែលបានស្លាប់ដូចរៀបរាប់ខាងលើនេះ មនុស្ស៨នាក់ទៀតកំពុងបាត់ខ្លួន។ នេះបើយោងតាមសេចក្ដីប្រកាសរបស់ក្រសួងបរិស្ថាន។ ជារួម ផ្ទះរបស់អ្នកស្រុកជាង១សែន ២ម៉ឺនខ្នងនៅក្នុងខេត្តចំនួនប្រាំត្រូវលិចលង់នៅក្នុងទឹកជំនន់។ នៅកន្លែងខ្លះទឹកលិចដល់កម្ពស់បីម៉ែត្រ។
ដងផ្លូវជាច្រើនខ្សែត្រូវខូចខាតចម្ងាយរាប់គីឡូម៉ែត្រដោយសារទឹកជំនន់ ឬដោយសារដីបាក់សង្កត់លើ, ដំណាំជាង៥ពាន់ហិចតារត្រូវខូចខាត, សត្វគោ-ក្របីជាង១,៦ម៉ឺនក្បាលបានស្លាប់។ សារព័ត៌មានរបស់រដ្ឋផ្សាយថាច្រកភ្នំដែលតភ្ជាប់ពីទីក្រុងដាណាង (Danang) ឆ្ពោះទៅខេត្តក្វាងង៉ាយ (Quang Ngai) មុនដំបូងត្រូវបិទខ្ទប់ដោយសារការបាក់ដីកាលពីថ្ងៃអាទិត្យ។ ប៉ុន្តែឥឡូវនេះបានបើកដំណើរការដូចធម្មតាឡើងវិញហើយ។ នេះបើយោងតាមការផ្សាយរបស់ហ្វ្រង់២៤ (France 24) និងប្រភពដទៃទៀត៕
ចែករំលែកព័តមាននេះ