ខេត្តកំពង់ស្ពឺ ៖ បុរសជាកម្មករសំណង់ម្នាក់បានរងរបួសធ្ងន់ធ្ងរ ហើយបានស្លាប់ក្រោយពេលដឹកបញ្ជូនយកទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺ ក្នុងខណៈពេលដែលជនរងគ្រោះកំពុងធ្វើការងារត្រូវបានដងសន្ទូចរបស់រថយន្តស្ទូចបាក់សង្កត់ពីលើ នៅក្នុងការដ្ឋានរោងចក្រកំពុងសាងសង់មួយកន្លែងបង្កឱ្យមានការភ្ញាក់ផ្អើល ។
ករណីខាងលើនេះបានកើតឡើងកាលពីវេលាម៉ោង៧និង១០នាទីព្រឹកថ្ងៃទី៣០ ខែតុលា ឆ្នាំ២០២៥ នៅចំណុចក្នុងការដ្ឋានសាងសងរោងចក្រមួយកន្លែង ស្ថិតនៅក្នុងភូមិយស់ជោ ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ។
សមត្ថកិច្ចស្រុកសំរោងទងបាននិយាយឱ្យដឹងថា រថយន្តស្ទូចម៉ាកហ៊ីយ៉ាន់ដាយ ពណ៌ស ទម្ងន់ ៧តោន ពាក់ស្លាកលេខកំពង់ចាម 3B.6667 អ្នកបើករថយន្តឈ្មោះសឿង សុខទី ភេទប្រុស អាយុ២៤ឆ្នាំ រស់នៅក្នុងភូមិស្រែផ្សរ ឃុំក្រាំងអំពិល ស្រុកសំរោងទង ខេត្តកំពង់ស្ពឺ ។ ចំណែកកម្មករសំណង់រងគ្រោះឈ្មោះមឿង សុខប៊ិច ភេទប្រុស អាយុ៤៦ឆ្នាំ រស់នៅក្នុងភូមិដំណាក់អំពិល ឃុំស្ដើងជ័យ ស្រុកជើងព្រៃ ខេត្តកំពង់ចាម ។
សមត្ថកិច្ចស្រុកសំរោងទងបាននិយាយឱ្យដឹងថា មានករណីរថយន្តស្ទូចមួយគ្រឿងបានបាក់ដងសន្ទូចសង្កត់លើកម្មករសំណង់ម្នាក់ បណ្ដាលឱ្យរងរបួសធ្ងន់ធ្ងរ ត្រូវបានខាងក្រុមហ៊ុនដឹកជនរងគ្រោះយកទៅសង្គ្រោះនៅឯមន្ទីរពេទ្យបង្អែកខេត្តកំពង់ស្ពឺដែរ ប៉ុន្តែពេលដឹកបញ្ជូនទៅដល់មន្ទីរពេទ្យខេត្តកំពង់ស្ពឺជនរងគ្រោះបានដាច់ខ្យល់ស្លាប់ទៅហើយ។
ក្រោយពេលកើតហេតុ សពជនរងគ្រោះខាងលើត្រូវបានតម្កល់ទុកនៅមន្ទីរពេទ្យបង្អែកខេត្តកំពង់ស្ពឺ រង់ចាំជំនាញធ្វើការពិនិត្យ និងប្រគល់ជូនសាច់ញាតិមកទទួលយកទៅធ្វើបុណ្យ ។
សមត្ថកិច្ចស្រុកសំរោងទងបានបញ្ជាក់ថា÷ ករណីខាងលើជំនាញបានធ្វើការសហការជាមួយការិយាលយ័បច្ចេកទេសនិងវិទ្យាសាស្ត្រខេត្តកំពង់ស្ពឺធ្វើការពិនិត្យ កោសល្យវិច្ច័យនិងកសាងសំណុំរឿងនិងធ្វើការដោះស្រាយតាមផ្លូវច្បាប់៕
ចែករំលែកព័តមាននេះ