រាជធានីភ្នំពេញ ៖ ក្លិបអ្នកកាសែតកម្ពុជា (ក.អ.ក) បានសហការជាមួយសមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា (FASMEC) រៀបចំវេទិកាសារព័ត៌មានលើប្រធានបទ «ពង្រឹង…
រាជធានីភ្នំពេញ ៖ ក្លិបអ្នកកាសែតកម្ពុជា (ក.អ.ក) បានសហការជាមួយសមាគមមូលនិធិសម្ដេច
តេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា (FASMEC) រៀបចំវេទិកាសារព័ត៌មានលើប្រធានបទ «ពង្រឹង និងពង្រីកសមត្ថភាពផលិតក្នុងស្រុក»នៅការិយាល័យកណ្តាល FASMEC នាព្រឹកថ្ងៃទី៣១ ខែតុលា ឆ្នាំ២០២៥ ។
ពិធីបើកវេទិកាសារព័ត៌មានលើប្រធានបទ «ការជំរុញ ការផលិត និងការគាំទ្រផលិតផលខ្មែរ» នេះមានការចូលរួមពីសំណាក់ លោក ពុយ គា ប្រធានក្លិបអ្នកកាសែតកម្ពុជា និងឧកញ៉ា តែ តាំងប៉ ប្រធានក្រុមប្រឹក្សាភិបាលសមាគមមូលនិធិសម្ដេចតេជោ និងប្រធានសមាគមមូលនិធិ សម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា ។
វេទិកាមានការចូលពីអ្នកសារព័ត៌មានជាង៤០ស្ថាប័ន នៅក្នុងស្រុកធ្វើការជជែកពិភាក្សាសួរដេញដោលពាក់ព័ន្ធ និងការផលិតផលក្នុងស្រុក ដើម្បីកាត់បន្ថយការនាំចូលពីខាងក្រៅ ។
វេទិកានេះ មានគោលបំណងផ្ដល់ឱកាសដល់ថ្នាក់ដឹកនាំ FASMEC ឲ្យពង្រឹង និងពង្រីកផលិតផលក្នុងស្រុកទាំងបរិមាណ និងគុណភាព សុវត្ថិភាព ដើម្បីធ្វើយ៉ាងណាបំពេញតម្រូវការប្រើប្រាស់អំឡុងពេលពហិការមិនប្រើប្រាស់ផលិតផលប្រទេសថៃ ។ ឱកាស និងបញ្ហាប្រឈមរួមទាំងដំណោះស្រាយ និងសន្ទុះនៃការគាំទ្រផលិតផលក្នុងស្រុកក៏នឹងត្រូវបានលើកឡើងក្នុងវេទិកាសារព័ត៌មាននេះផងដែរ។
ជាមួយគ្នានេះ វេទិកាក៏មានការតាំងបង្ហាញផលិតផលក្នុងស្រុកសំខាន់ៗដែលគ្រោងនឹងដាក់តាំងក្នុងពិព័រណ៍ផលិតផលខ្មែរឆ្នាំ២០២៥ លើកទី២ ដែលនឹងត្រូវរៀបចំធ្វើឡើងនៅមជ្ឈមណ្ឌលសាលសន្និបាត និងពិព័រណ៍កោះពេជ្រ រយៈពេល៣ថ្ងៃ ចាប់ពីថ្ងៃទី៥ ដល់ថ្ងៃទី៧ ខែវិច្ឆិកា ឆ្នាំ២០២៥ ៕
ចែករំលែកព័តមាននេះ