ទីក្រុងប៉េកាំង ៖ បើយោងតាមការស្ទង់មតិផ្លូវការមួយបានបង្ហាញនៅថ្ងៃទី៣១ ខែតុលា ឆ្នាំ២០២៥ និងត្រូវបានចេញផ្សាយដោយទីភ្នាក់ងារសារព័ត៌មាន Reuters បានឱ្យដឹងថា សកម្មភាពរោងចក្រនៅចិនបានធ្លាក់ចុះអស់រយៈពេល ៧…
ទីក្រុងប៉េកាំង ៖ បើយោងតាមការស្ទង់មតិផ្លូវការមួយបានបង្ហាញនៅថ្ងៃទី៣១ ខែតុលា ឆ្នាំ២០២៥ និងត្រូវបានចេញផ្សាយដោយទីភ្នាក់ងារសារព័ត៌មាន Reuters បានឱ្យដឹងថា សកម្មភាពរោងចក្រនៅចិនបានធ្លាក់ចុះអស់រយៈពេល ៧ ខែជាប់គ្នា នៅក្នុងខែតុលា ដោយរក្សាការអំពាវនាវឱ្យមានការជំរុញបន្ថែមទៀត ដើម្បីបង្កើនតម្រូវការក្នុងស្រុក។
ការស្ទង់មតិរបស់ការិយាល័យស្ថិតិជាតិរបស់ប្រទេសចិន បានបង្ហាញថា សន្ទស្សន៍អ្នកគ្រប់គ្រងការបញ្ជាទិញផ្លូវការ (PMI) បានធ្លាក់ចុះមកត្រឹម ៤៩ពិន្ទុក្នុងខែតុលា ពី ៤៩,៨ពិន្ទុក្នុងខែកញ្ញា ដែលជាកម្រិតទាបបំផុតក្នុងរយៈពេល ៦ខែ។ រីឯសន្ទស្សន៍អ្នកគ្រប់គ្រងការបញ្ជាទិញមិនមែនផលិតកម្ម (PMI) ដែលរួមមាន សេវាកម្ម និងសំណង់ បានកើន ៥០,១ពិន្ទុក្នុងខែតុលា ពី ៥០ពិន្ទុក្នុងខែកញ្ញា។
លោក Zhang Zhiwei ប្រធានសេដ្ឋវិទូនៅក្រុមហ៊ុនគ្រប់គ្រងមូលនិធិ Pinpoint Asset Management ដែលមានមូលដ្ឋាននៅទីក្រុងសៀងហៃ បានថ្លែងថា «សន្ទុះសេដ្ឋកិច្ចចិនបានចុះខ្សោយចាប់តាំងពីពាក់កណ្តាលឆ្នាំនេះ។ ការធ្លាក់ចុះនៃវិស័យអចលនទ្រព្យនៅតែបន្តដាក់សម្ពាធលើតម្រូវការក្នុងស្រុក»។
ការធ្លាក់ចុះដ៏យូរអង្វែងនេះកើតឡើង ខណៈដែលបណ្តាក្រុមហ៊ុនផលិតកំពុងតស៊ូដើម្បីងើបឡើងវិញក្នុងរយៈពេលប៉ុន្មានឆ្នាំ ចាប់តាំងពីការាតត្បាតនៃជំងឺកូវីដ-១៩ និងសង្គ្រាមពាណិជ្ជកម្មមានតម្លៃថ្លៃមហាសាលជាមួយប្រធានាធិបតីអាមេរិក លោក ដូណាល់ ត្រាំ (Donald Trump) ដែលបង្ខំឱ្យបណ្តាម្ចាស់រោងចក្រចិនបោះបង់ទីផ្សារអ្នកប្រើប្រាស់កំពូលរបស់ពិភពលោក។ បណ្តាក្រុមហ៊ុនផលិតក៏កំពុងជួបការលំបាកនៅក្នុងទីផ្សារថ្មីផងដែរ ដោយអ្នកនាំចេញកំពុងលក់ខាតបង់កាន់តែខ្លាំងឡើងនៅអឺរ៉ុប អាមេរិកឡាទីន មជ្ឈិមបូព៌ា និងអាហ្វ្រិក។
កំណើនសេដ្ឋកិច្ចរបស់ប្រទេសចិនបានធ្លាក់ចុះមកត្រឹម ៤,៨% នៅក្នុងត្រីមាសទី ៣ នៃឆ្នាំនេះ ដែលជាល្បឿនយឺតបំផុតរបស់ខ្លួនក្នុងរយៈពេល១ឆ្នាំ។ ទោះយ៉ាងក៏ដោយ សេដ្ឋកិច្ចរបស់ប្រទេសសេដ្ឋកិច្ចធំទីពីរពិភពលោកមួយនេះ នៅតែស្ថិតលើផ្លូវត្រូវដើម្បីសម្រេចគោលដៅរបស់ខ្លួនប្រហែល ៥%។
គណបក្សកុម្មុយនិស្តដែលកំពុងតែកាន់អំណាចបានសន្យាបន្ទាប់ពីកិច្ចប្រជុំបិទទ្វាររយៈពេល ៤ ថ្ងៃ កាលពីសប្តាហ៍មុនថា នឹងជំរុញការប្រើប្រាស់ក្នុងស្រុក ដោយគូសបញ្ជាក់ពីគោលបំណងសេដ្ឋកិច្ច និងគោលនយោបាយសម្រាប់រយៈពេល ៥ ឆ្នាំខាងមុខ រួមទាំងសង្កត់ធ្ងន់លើកិច្ចខិតខំប្រឹងប្រែង ដើម្បីពង្រឹងប្រព័ន្ធឧស្សាហកម្មដ៏ធំទូលាយរបស់ខ្លួន៕ ប្រភព ៖ Reuters
ចែករំលែកព័តមាននេះ