ទីក្រុងវីលណឺស៖ ប្រទេសលីទុយអានីប្រកាសបិទព្រលានយន្តហោះរបស់ខ្លួននៅទីក្រុងវីលណឺស (Vilnius) ជាថ្មីម្ដងទៀតដោយសារការរំខាននៃបាឡុងហោះ។ នេះបើតាមសេចក្ដីប្រកាសរបស់ព្រលានយន្តហោះនៅលើទំព័រហ្វេសប៊ុករបស់ខ្លួន។ គិតទាំងលើកនេះទៀត លីទុយអានីបិទព្រលានយន្តហោះជាលើកទី៦នៅក្នុងខែតុលា។
លីទុយអានីអះអាងថាបាឡុងហោះទាំងនោះត្រូវបានបញ្ជូនដោយក្រុមអ្នករត់ពន្ធបារី។ លីទុយអានីក៏បានចោទប្រកាន់ប្រធានាធិបតីប្រទេសបេឡារូស លោកលូកាសឹនកូ (Lukashenko) ដែលជាសម្ព័ន្ធមិត្តរបស់លោកពូទីនផងដែរ។ លីទុយអានីថាលោកលូកាសឹនកូមិនព្រមទប់ស្កាត់បាឡុងទាំងនេះឱ្យមានប្រសិទ្ធភាព។ ព្រលានយន្តហោះខាងលើនេះសរសេររៀបរាប់ថាយោងតាមព័ត៌មានបឋម ការសម្រេចចិត្តបិទផ្លូវអាកាសនោះដោយសារបាឡុងហោះព្រោងព្រាតពេញព្រលានយន្តហោះវីលណឺស។
ការធ្វើចរាចរណ៍ហោះចេញចូលនៅព្រលានយន្តហោះនេះត្រូវផ្អាករហូតដល់ម៉ោង២១:១០ម៉ោងសាកលទើបដំណើរការឡើងវិញ។ ប្រទេសលីទុយអានីបានបិទរួចហើយនូវច្រកព្រំដែនគោករបស់ខ្លួនជាមួយប្រទេសបេឡារូស។ អ្នកដំណើរភាគច្រើនមិនអាចចេញចូលបានទេ។ រហូតដល់ថ្ងៃទី៣០ ខែវិច្ឆិកាទើបមានបទបញ្ជាជាថ្មី។ ចំណាត់ការនេះធ្វើឡើងដើម្បីឆ្លើយតបទៅនឹងការរំខានឥតឈប់ឈរពីសំណាក់ប្រទេសបេឡារូសទៅលើដែនអាកាសរបស់លីទុយអានី។
លីទុយអានីប្រកាសរក្សាសិទ្ធិបាញ់ទម្លាក់បាឡុងដែលហោះចូលដែនអាកាសរបស់ខ្លួន។ គេឃើញថាលីទុយអានីដែលជាសមាជិកអង្គការណាតូកំពុងតែប្រទាំងប្រទើសគ្នាជាមួយបេឡារូសដែលជាសម្ព័ន្ធមិត្តរបស់លោកពូទីនជាបណ្ដើរៗហើយ។ កាលពីថ្ងៃទី២៨ ខែតុលា លោកលូកាសឹនកូថ្លែងថាការដែលលីទុយអានីបិទច្រកព្រំដែនរបស់ខ្លួនជាអំពើឆបោកដ៏ចំកួត។ លោកចោទប្រកាន់ថាក្រុមបស្ចិមប្រទេសកំពុងធ្វើសង្គ្រាមកូនកាត់ (hybrid war) ប្រឆាំងនឹងបេឡារូស និងរុស្ស៊ី។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ