ទីក្រុងប៉េកាំង៖ ប្រទេសចិនចាប់ផ្ដើមបញ្ចេញប្រតិកម្មជាបណ្ដើរៗតបទៅនឹងអ្វីដែលលោកដូណាល់ត្រាំបញ្ជាឱ្យក្រសួងការពារជាតិអាមេរិកចាប់ផ្ដើមធ្វើតេស្តសមត្ថភាពនុយក្លេអ៊ែរជាថ្មីបន្ទាប់ពីខកខានអស់រយៈពេល៣៣ឆ្នាំមកហើយ។ ការបញ្ជាឱ្យធ្វើតេស្តនេះក៏ស្របពេលដែលសភាពការណ៍ពិភពលោកមិនទាន់ស្ងប់ស្ងាត់នៅឡើយទេ ជាពិសេសបញ្ហាអ៊ុយក្រែន។ រុស្ស៊ីថ្មីៗនេះក៏បានធ្វើតេស្តសាកល្បងមីស៊ីលបំពាក់ក្បាលគ្រាប់នុយក្លេអ៊ែរផងដែរ។
លោកត្រាំចង់សង្កត់ធ្ងន់ទៅលើការធ្វើតេស្តអាវុធនុយក្លេអ៊ែរឱ្យមានសមាមាត្រទៅនឹងប្រទេសរុស្ស៊ី និងប្រទេសចិន។ មានន័យថាបើរុស្ស៊ី និងចិនធ្វើតេស្ត ឬពង្រីកឃ្លាំងអាវុធរបស់ខ្លួនប៉ុណ្ណា អាមេរិកត្រូវតែធ្វើតេស្ត និងពង្រីកប៉ុណ្ណឹងដែរ។ នៅល្ងាចថ្ងៃព្រហស្បតិ៍ អ្នកនាំពាក្យក្រសួងការបរទេសចិន លោកគួជាឃុន (Guo Jiakun) ថ្លែងថាប្រទេសចិនសង្ឃឹមថាអាមេរិកនឹងបន្តអនុវត្តតាម «សន្ធិសញ្ញាហាមធ្វើតេស្តអាវុធនុយក្លេអ៊ែរ» និងបន្តអនុវត្តតាមការសន្យារបស់ខ្លួនដែលថានឹងព្យួរទុកការធ្វើតេស្តនុយក្លេអ៊ែរ។
ឆ្លើយតបទៅនឹងសំណួររបស់អ្នកសារព័ត៌មានពាក់ព័ន្ធនឹងបទបញ្ជារបស់លោកត្រាំឱ្យពិនិត្យមើលការធ្វើតេស្តអាវុធនុយក្លេអ៊ែរនោះ អ្នកនាំពាក្យចិនសង្ឃឹមថាអាមេរិកនឹងខិតខំរក្សាតុល្យភាព និងស្ថិរភាពនៅលើពិភពលោក។ សូមរំលឹកថាកាលយប់មិញ លោកត្រាំបានចេញសេចក្ដីប្រកាសដ៏គួរឱ្យភ្ញាក់ផ្អើលមួយនៅលើបណ្ដាញសង្គមទ្រូសសូសល (Truth Social)។ លោកសរសេររៀបរាប់ថាលោកបានណែនាំទៅមន្ទីរបញ្ចកោណ (ទីស្ដីការក្រសួងការពារជាតិអាមេរិក) ដើម្បីធ្វើតេស្តអាវុធនុយក្លេអ៊ែរស្មើគ្នានឹងប្រទេសមហាអំណាចនុយក្លេអ៊ែរដទៃទៀត។
ក្រោយកិច្ចជំនួបជាមួយថ្នាក់ដឹកនាំចិន និងនៅតាមផ្លូវធ្វើដំណើរត្រឡប់ទៅទីក្រុងវ៉ាស៊ីនតោនវិញ លោកបានថ្លែងប្រាប់អ្នកសារព័ត៌មានថាអាមេរិកចាំបាច់ត្រូវតែធ្វើតេស្តនុយក្លេអ៊ែរដើម្បីធ្វើឱ្យប្រាកដថាអាមេរិកនៅតែប្រដំប្រសងគ្នាជាមួយប្រទេសមហាអំណាចនុយក្លេអ៊ែរដទៃទៀត។ ដោយសារប្រទេសដទៃទៀតធ្វើតេស្ត (នុយក្លេអ៊ែរ) ដូច្នេះ លោកគិតថាវាជារឿងសមហេតុផលដែលអាមេរិកត្រូវធ្វើដូច្នេះដែរ។ ទីតាំងធ្វើតេស្តនុយក្លេអ៊ែរនឹងពិភាក្សាគ្នានៅពេលក្រោយទៀត។
នៅពេលអ្នកសារព័ត៌មានសួរថាតើពិភពលោកបច្ចុប្បន្នកំពុងដើរដល់ដំណាក់កាលកាន់តែគ្រោះថ្នាក់នៃការប្រឡងប្រជែងអាវុធនុយក្លេអ៊ែរ ឬយ៉ាងណា? លោកត្រាំឆ្លើយតបថាគ្មានអ្វីជាការគំរាមកំហែងចំពោះពិភពលោកទេ។ អាមេរិកមើលថែទាំឃ្លាំងអាវុធរបស់ខ្លួនបានល្អណាស់។ ក្រោយមក លោកថ្លែងថាលោកគាំទ្រការកាត់បន្ថយអាវុធនុយក្លេអ៊ែរព្រោះយើង (អាមេរិក) មានច្រើនពេកហើយ ហើយរុស្ស៊ីមានលំដាប់ទី២ ប្រទេសចិនលំដាប់ទី៣។ លោកព្យាករថាប្រទេសចិនអាចតាមទាន់អាមេរិក និងរុស្ស៊ីនៅក្នុងរយៈពេលត្រឹមតែ៤ ឬ៥ឆ្នាំទៀតប៉ុណ្ណោះ។ នេះបើយោងតាមការផ្សាយរបស់រ៉យទ័រ, ញូស្វីក (Newsweek) និងប្រភពដទៃទៀត៕
ចែករំលែកព័តមាននេះ