ទីក្រុងកៀវ៖ កាលពីយប់មិញ និងព្រឹកមិញ រុស្ស៊ីវាយប្រហារអ៊ុយក្រែនជាថ្មីដោយប្រើប្រាស់ដ្រូន និងមីស៊ីល។ គោលដៅធំរបស់រុស្ស៊ីគឺទីតាំងផលិតថាមពល។ ហេតុនេះ កាលពីយប់មិញអ៊ុយក្រែនដាច់ភ្លើងសឹងពេញផ្ទៃប្រទេស។ អាជ្ញាធរអ៊ុយក្រែនអះអាងថាមនុស្សយ៉ាងតិចបីនាក់ស្លាប់នៅក្នុងការវាយប្រហារនោះ។ នាយករដ្ឋមន្ត្រីអ៊ុយក្រែន…
ទីក្រុងកៀវ៖ កាលពីយប់មិញ និងព្រឹកមិញ រុស្ស៊ីវាយប្រហារអ៊ុយក្រែនជាថ្មីដោយប្រើប្រាស់ដ្រូន និងមីស៊ីល។ គោលដៅធំរបស់រុស្ស៊ីគឺទីតាំងផលិតថាមពល។ ហេតុនេះ កាលពីយប់មិញអ៊ុយក្រែនដាច់ភ្លើងសឹងពេញផ្ទៃប្រទេស។ អាជ្ញាធរអ៊ុយក្រែនអះអាងថាមនុស្សយ៉ាងតិចបីនាក់ស្លាប់នៅក្នុងការវាយប្រហារនោះ។ នាយករដ្ឋមន្ត្រីអ៊ុយក្រែន លោកស្រីយូលីយ៉ា ស្វ៊ីរីដឹនកូ (Yulia Svyrydenko) ថ្លែងថារុស្ស៊ីវាយប្រហារជនស៊ីវិល និងទីតាំងផលិតថាមពលមុនពេលរដូវរងាចូលមកដល់។
លោកស្រីថ្លែងបន្តទៀតថាគោលដៅធំរបស់ពួកគេគឺធ្វើឱ្យអ៊ុយក្រែនរស់នៅក្នុងសភាពងងឹត។ គោលបំណងរបស់យើងគឺរក្សាពន្លឺជានិច្ច។ លោកស្រីបង្ហោះសារនៅលើតេឡេក្រាមថាដើម្បីទប់ទល់នឹងការវាយប្រហារនេះ អ៊ុយក្រែនត្រូវការប្រព័ន្ធការពារដែនអាកាសបន្ថែមទៀត, ត្រូវការឱ្យដាក់ទណ្ឌកម្មបន្ថែមទៀតទៅលើរុស្ស៊ី និងដាក់សម្ពាធជាអតិបរមាទៅលើពួកឈ្លានពាន។
មន្ត្រីថ្នាក់មូលដ្ឋានថ្លែងថាបុរស២នាក់ស្លាប់នៅទីក្រុងហ្សាប៉ូរីហ្សៀដែលជាទីក្រុងឧស្សាហកម្មស្ថិតនៅភាគឦសាន។ ជនរងគ្រោះទីបីជាកុមារីវ័យ៧ឆ្នាំរស់នៅតំបន់វីននីស្ទីយ៉ា (Vinnystia) ស្លាប់ក្រោយពេលបញ្ជូនទៅដល់មន្ទីរពេទ្យដោយសារមុខរបួសធ្ងន់ធ្ងរពេក។ ក្រសួងការពារជាតិរុស្ស៊ីទទួលស្គាល់ថាយោធារបស់ខ្លួនពិតជាវាយប្រហារមែន ប៉ុន្តែវាយប្រហារទីតាំងយោធារបស់អ៊ុយក្រែន។ រុស្ស៊ីថាអ៊ុយក្រែនក៏វាយប្រហារជាហូរហែផងដែរទៅលើទីតាំងស្តុកទុកប្រេងរបស់រុស្ស៊ី។
ប្រធានាធិបតីអ៊ុយក្រែន លោកហ្សេឡិនស្គី ថ្លែងថារុស្ស៊ីបញ្ជូនដ្រូន៦៥០គ្រឿង និងមីស៊ីល៥០គ្រាប់វាយប្រហារទីតាំងជាច្រើនកន្លែងនៅទូទាំងផ្ទៃប្រទេស។ ទោះបីយោធាអ៊ុយក្រែនអាចបាញ់ទម្លាក់ដ្រូន និងមីស៊ីលភាគច្រើន ប៉ុន្តែទីតាំងជាច្រើនកន្លែងនៅតែរងការវាយប្រហារ។ កងទ័ពអាកាសអ៊ុយក្រែនអះអាងថាពួកគេបាញ់ទម្លាក់ដ្រូន៥៩២គ្រឿង និងមីស៊ីល៣១គ្រាប់៕
ចែករំលែកព័តមាននេះ