សុខភាពឆ្អឹងមានសារសំខាន់ខ្លាំងណាស់ជួយឱ្យរាងកាយលោកអ្នកឱ្យរឹងមាំ និងរស់រវើក ។ ឆ្អឹងទន់ខ្សោយត្រូវគេហៅថាជាជងឺពុកឆ្អឹង ។ ប្រសិនបើជំងឺពុកឆ្អឹងមិនត្រូវបានរកឃើញនិងទទួលបានការព្យាបាលទេនោះ វាអាចនាំឱ្យមានការបាក់ឆ្អឹង ។ ការបាក់ឆ្អឹងកើតមានច្រើនបំផុតលើឆ្អឹងខ្នង ត្រគាក និងកដៃ ។
* រោគសញ្ញា ៖
ជាញឹកញាប់ជំងឺនេះមិនត្រូវបានគេយកចិត្តទុកដាក់ចាប់អារម្មណ៍ឡើយពីព្រោះអ្នកជំងឺមិនបានទទួលរងការឈឺចាប់ឬមានរោគសញ្ញាណាមួយឡើយពោលគឺរហូតទាល់តែដល់ដំណាក់កាលមួយដែលហួសពេលទៅហើយ ។ ជាសំណាងល្អគេអាចដឹងបានដោយការធ្វើតេស្ដដ៏សាមញ្ញមួយ ។
បុគ្គលដែលប្រឈមខ្លាំងនឹងការកើតជំងឺពុកឆ្អឹងឬឆ្អឹងខ្សោយគឺបុគ្គលទាំងឡាយណាដែលមានវ័យលើសពី៥០ឆ្នាំឡើងទៅឬអ្នកជំងឺដែលមានការឈឺចាប់មិនធ្ងន់ធ្ងរត្រង់សន្លាក់ ។ ដើម្បីស្វែងយល់ឱ្យកាន់តែច្បាស់ពីសភាពជំងឺ គេគប្បីធ្វើសេត្ដ ហើយការថតកាំរស្មីអិុចគឺជាជម្រើសតែមួយគត់ ។ ការធ្វើបែបនេះនឹងផ្ដល់នូវការវាយតម្លៃត្រឹមត្រូវអំពីភាពរឹងមាំឬដង់សីុតេរបស់ឆ្អឹង ។ ប្រសិនបើឆ្អឹងមានកម្រិតដងសីុតេទាប ពួកគេនឹងត្រូវប្រើឱសថ ។
*វិធីបង្ការ
ចំណុចសំខាន់បំផុតគឺថាគេអាចបង្ការជំងឺពុកឆ្អឹងបាន ។ ការផ្លាស់ប្ដូររបៀបរបបរស់នៅសាមញ្ញៗ អាចធ្វើឱ្យសុខភាពឆ្អឹងប្រសើរឡើង ។
១-បោះបង់ការជក់បារី ៖
-អ្នកជំងឺគួរតែឈប់ឬកាត់បន្ថយការជក់បារីបារីដ្បិតវាជាកត្ដាបង្កើនហានិភ័យកើតមានជំងឺពុកឆ្អឹង ។
២-ហាត់ប្រាណជាប្រចាំ ៖
-ការហាត់ប្រាណមានសារប្រយោជន៍ជួយឱ្យឆ្អឹងរឹងមាំ ។ សកម្មភាពនានាដូចជា ការដើរ ការជិះកង់ ឬការលើកទម្ងន់នៅក្លឹបហាត់ប្រាណ គឺសុទ្ធជាសកម្មភាពដែលប្រើប្រាស់កម្លាំងលើឆ្អឹងធ្វើឱ្យឆ្អឹងប្រែប្រួលទៅតាមនោះ ។ សកម្មភាពទាំងនេះគួរត្រូវបានធ្វើយ៉ាងហោចណាស់បីដងក្នុងមួយសប្ដាហ៍ ។
៣-ទទួលទានអាហារសម្បូរដោយកាល់ស្យូម
- ការទទួលទានជាតិកាល់ស្យូមគ្រប់គ្រាន់ ផ្ដល់សារសំខាន់ដើម្បីឱ្យឆ្អឹងរឹងមាំ ។ អាហារនានាដូចជា បន្លែបៃតង ទឹកដោះគោ ហ្វ្រូម៉ា និងទឹកដោះគោជូរ គឺសុទ្ធជាប្រភពសម្បូរដោយកាល់ស្យូមកម្រិតខ្ពស់ ។ ប្រសិនបើមនុស្សមួយចំនួនមិនអាចទទួលទានទឹកដោះគោ និងហ្វ្រូម៉ា ពួកគេអាចទទួលទានសណ្ដែកសៀងជំនួសបាន ។ ជាងនេះទៅទៀត ការទទួលទានអាហារបន្ថែមដែលមានជាតិកាល់ស្យូមនិងវីតាមីនDក៏មានប្រយោជន៍ផងដែរ ។ អាហារបំប៉នទាំងនេះមិនគួរទទួលទានក្នុងពេលបាយឡើយ ដោយសារជាតិអាសីុតអាចកាត់បន្ថយការស្រូបយកវីតាមីនពីក្រពះ ។ ជាតិកាល់ស្យូមគួរទទួលទានដោយប្រុងប្រយ័ត្ន សម្រាប់អ្នកជំងឺដែលមានជំងឺតម្រងនោមឬបេះដូង ។ ដូច្នេះវាជាការប្រសើរបំផុតដែលត្រូវទទួលការណែនាំពីវេជ្ជបណ្ឌិត ។
ប្រសិនបើអ្នកមានអាយុលើសពី៥០ឆ្នាំឬប្រសិនបើអ្នកមានការឈឺសន្លាក់អ្នកគួរទៅជួបវេជ្ជបណ្ឌិតដើម្បីវាយតម្លៃស្ថានភាពរបស់លោកអ្នក ពាក់ព័ន្ធនឹងជំងឺពុកឆ្អឹងដែលអាចកើតមាន ។ ការធ្វើតេស្ដមានភាពឆាប់រហ័ស និងសាមញ្ញ ការព្យាបាលធ្វើឡើងតាមរយៈការប្រើប្រាស់ឱសថ ។ ការធ្វើបែបនេះនឹងជួយបង្កការបាក់ឆ្អឹង និងធ្វើឱ្យអ្នកមានសុខភាពល្អ ៕
បកស្រាយដោយវេជ្ជបណ្ឌិតAndrew Quoc Dutton នាយកវេជ្ជសាស្ត្រ និងពិគ្រោះយោបល់គ្រូពេទ្យវះកាត់ឆ្អឹងក្រុមការងារជំងឺឆ្អឹង អេសអឹមជី(SMG) ប្រទេសសិង្ហបុរី
ចែករំលែកព័តមាននេះ