ខេត្តបាត់ដំបង ៖ សាកសពបុរសម្នាក់ដែលត្រូវគេសម្លាប់ទាំងដៃជាប់ខ្នោះ ហើយឃាតករបានព្យាយាមដុតសាកសពកម្ទេចចោល ដែលគេសន្និដ្ឋានភាគច្រើនគឺជាជនជាតិចិននោះ ពេលនេះ ត្រូវបានកម្លាំងស្នង ការខេត្តបញ្ជូនសាកសពទៅកាកាន់នាយកដ្ឋាននគរបាលបច្ចេកទេស នៅរាជធានីភ្នំពេញហើយ កាលពីយប់ថ្ងៃទី១៧…
ខេត្តបាត់ដំបង ៖ សាកសពបុរសម្នាក់ដែលត្រូវគេសម្លាប់ទាំងដៃជាប់ខ្នោះ ហើយឃាតករបានព្យាយាមដុតសាកសពកម្ទេចចោល ដែលគេសន្និដ្ឋានភាគច្រើនគឺជាជនជាតិចិននោះ ពេលនេះ ត្រូវបានកម្លាំងស្នង ការខេត្តបញ្ជូនសាកសពទៅកាកាន់នាយកដ្ឋាននគរបាលបច្ចេកទេស នៅរាជធានីភ្នំពេញហើយ កាលពីយប់ថ្ងៃទី១៧ តុលា តាមការស្នើរបស់ស្ថានទូតចិន ។ នេះបើតាមប្រភពព័ត៌មានចុងក្រោយពីស្នងការខេត្ត។ សូមរំលឹកថា៖ ជានរណាឃោរឃៅម្ល៉េះ? ដុតមនុស្សទាំងដៃជាប់ខ្នោះ
លោកឧត្តមសេនីយ៍ត្រី ជេត វណ្ណនី ស្នងការរងខេត្ត បានឲ្យដឹងនៅព្រឹកថ្ងៃទី១៨ តុលា នេះថា សាកសពជាប់ខ្នោះដៃ ដែលត្រូវឃាតករព្រួតគ្នាសម្លាប់យ៉ាងឃោរឃៅ ហើយដឹកទៅទម្លាក់ចោលនៅក្បាលស្ពានដងទង់ នៅស្រុករតនមណ្ឌលនោះ ត្រូវបានបញ្ជូនទៅកាន់នាយកដ្ឋានបច្ចេកទេស នៅរាជធានីភ្នំពេញហើយ។ លោកស្នងការរងបានបញ្ជាក់ថា មូលហេតុដែលត្រូវបញ្ជូនសាកសពនោះទៅកាន់នាយកដ្ឋានបច្ចេកទេស ព្រោះជនរងគ្រោះត្រូវបានសង្ស័យភាគច្រើនអាចជាជនជាតិចិន ដោយមានការស្នើសុំពីស្ថានទូតចិន ។
បើតាមព័ត៌មានចុងក្រោយពីសមត្ថកិច្ចបានឲ្យដឹងថា ពេលនេះ សាកសពជនរងគ្រោះដែលគេសន្នដ្ឋានជាជនជាតិចិននោះ ត្រូវបានក្លាស្សេតម្កល់ទុកនៅក្នុងវត្តស្ទឹងមានជ័យ ក្នុងរាជធានីភ្នំពេញ ហើយនាយកដ្ឋានបច្ចេកទេសនឹងធ្វើកោសល្យវិច័យបន្ថែមទៀតឲ្យបានល្អិតល្អន់លើសាកសពនោះ។
សូមបញ្ជាក់ថា កាលពីព្រឹកថ្ងៃទី១៧ តុលា អ្នកភូមិបានប្រទះឃើញសាកសពបុរសម្នាក់ដេកស្លាប់ផ្កាប់មុខទាំងដៃជាប់ខ្នោះដៃក្រពាត់មកក្រោយ នៅក្បែរក្បាលស្ពានដងទង់ ដែលស្ថិតនៅក្នុងភូមិផ្លូវមាស ឃុំផ្លូវមាស ស្រុករតន:មណ្ឌល ។ សាកសពនោះ ត្រូវគេដាក់ខ្នោះជាប់ដៃមកក្រោយ យកថង់ប្លាស្ទិកច្រកក្បាល ហើយត្រូវក្រុមឃាតករបានព្យាយាមយកភ្លើងដុតឆេះរោលខ្លោចរាងកាយ ស្ទើរមើលមិនយល់។
បន្ទាប់ពីពិនិត្យនិងធ្វើការស្រាវជ្រាវជាបឋម សមត្ថកិច្ចបានធ្វើការសន្និដ្ឋានថា «សាកសពបុរសនោះអាចជាជនជាតិចិនច្រើនជាង ការវាយតម្លៃទៅលើជនជាតិខ្មែរ ។ នេះជាអំពើឃាតកម្ម ហើយឃាតករអាចមានបក្សពួកចាប់ពី២នាក់ឡើងទៅ ។ គេសង្ស័យក្រុមឃាតករបានសម្លាប់ជនរងគ្រោះនៅកន្លែងផ្សេង ហើយដឹកយកទៅទម្លាក់ចោលនៅក្បែរស្ពានខាងលើ» ។
ប៉ុន្តែយ៉ាងណា រហូតដល់ពេលនេះសមត្ថកិច្ចមិនទាន់អះអាងពីមូលហេតុនៃអំពើឃាតកម្មនេះ និងអំពីតម្រុយនៃក្រុមជនដៃដល់នៅឡើយទេ ។ សូម្បីតែអត្តសញ្ញាណជនរងគ្រោះ ក៏មិនទាន់ស្គាល់ជាក់លាក់ដែរ។ ព្រោះពេលនេះ កម្លាំងជំនាញកំពុងពូតដៃគ្នាតាមស្រាវជ្រាវនៅឡើយ ។
ចែករំលែកព័តមាននេះ