រាជធានីភ្នំពេញ ៖ ទោះបីជាមានការរិះគន់រឿងយកកីឡាករបរទេសមួយចំនួនមកប្រកួតកាលពីលើកទី១ ប្រចាំខែដំបូងថា យកកីឡាករបរទេសទេសចរណ៍មកប្រកួត ក៏ព្រឹត្តិការណ៍ប្រដាល់អន្តរជាតិនៅលើសង្វៀនទូរទស្សន៍អាស៊ីអាគ្នេយ៍សម្រាប់ខែ២ បានទទួលការគាំទ្រដែរ ។ បន្ថែមពីលើផ្លែផ្កាដែលទទួលបាននេះ
រាជធានីភ្នំពេញ ៖ ទោះបីជាមានការរិះគន់រឿងយកកីឡាករបរទេសមួយចំនួនមកប្រកួតកាលពីលើកទី១ ប្រចាំខែដំបូងថា យកកីឡាករបរទេសទេសចរណ៍មកប្រកួត ក៏ព្រឹត្តិការណ៍ប្រដាល់អន្តរជាតិនៅលើសង្វៀនទូរទស្សន៍អាស៊ីអាគ្នេយ៍សម្រាប់ខែ២ បានទទួលការគាំទ្រដែរ ។ បន្ថែមពីលើផ្លែផ្កាដែលទទួលបាននេះ ទើបស្ថាប័នមួយនេះរៀបចំបើកឆាកការប្រកួតជាលក្ខណៈអន្តរជាតិថ្មីមួយទៀតនាដើមខែឧសភាខាងមុខ ដែលមានន័យថា ក្នុងមួយខែនឹងមានព្រឹត្តិការណ៍បែបនេះពីរព្រមគ្នា ។
មន្ត្រីទូរទស្សន៍អាស៊ីអាគ្នេយ៍ប្រាប់ថា ការប្រកួតមួយថ្មីដែលនឹងបើកឆាកនៅដើមខែឧសភា បុ៉ន្តែនៅមិនទាន់កំណត់ថ្ងៃនោះ មិនមែនជាការប្រកួតមួយខែម្តងដូចមុននោះទេ គឺជាការប្រកួតប្រចាំសប្តាហ៍តែម្តង ។ ទោះយ៉ាងណា នោះមិនមែនជាការប្រកួតបែបអន្តរជាតិនៅរៀងរាល់សប្តាហ៍នោះទេ ដោយការប្រកួតបែបអន្តរជាតិមួយថ្មីនោះនឹងធ្វើឱ្យមានភាពកក្រើកដូចគ្នានឹងការប្រកួតបែបអន្តរជាតិដែលបានធ្វើ២លើកកន្លងមកហើយ ។ លោកញៀន សុធី មន្ត្រីអ្នករៀបចំព្រឹត្តិការណ៍នេះបញ្ជាក់ថា ការប្រកួតមួយនេះបានរៀបរយអស់ហើយ ដ្បិតតែការប្រកាសពីកាលបរិច្ឆេទនៅមិនទាន់កំណត់ ប៉ុន្តែនោះគឺបណ្តាលមកពីសង្វៀនរបស់លោកមានបំណងទុកពេលឱ្យបានគ្រប់គ្រាន់បន្តិចដើម្បីជ្រើសរើសកីឡាករជើងខ្លាំងទាំងបរទេស និងកម្ពុជា ឱ្យមកប៉ះគ្នានៅក្នុងព្រឹត្តិការណ៍មួយថ្មីនោះបុ៉ណ្ណោះ ។
ជាការពិត ការប្រដាល់មួយថ្មីនេះគឺជាការប្រកួតវិលជុំដើម្បីដណ្តើមយកខ្សែក្រវាត់រវាងកីឡាករខ្មែរ និងខ្មែរចំនួន១២រូបនោះទេ បុ៉ន្តែមកពីខាងស្ពុនស័រទាមទារឱ្យមានការប្រកួតអន្តរជាតិយ៉ាងហោច២គូនៅក្នុងព្រឹត្តិការណ៍បើកឆាកប្រចាំសប្តាហ៍នេះ ទើបការប្រកួតដែលបានគ្រោងទុកត្រូវសម្រេចឱ្យមានការប៉ះគ្នារវាងកីឡាករកម្ពុជា និងកីឡាករបរទេសតែម្តង ។ លោកញៀន សុធី ប្រាប់ថា ការប្រដាល់នោះនឹងបើកឆាកដោយកីឡាករកម្ពុជា និងកីឡាករមកពីថៃ ដែលសុទ្ធតែជាជើងខ្លាំង បុ៉ន្តែការប្រកួតបន្ទាប់នោះគ្រាន់តែជាការប្រកួតរវាងកីឡាករខ្មែរ និងខ្មែរធម្មតាបុ៉ណ្ណោះ ដោយមិនមានបញ្ចូលកីឡាករបរទេសដូចក្នុងពេលបើកឆាកទៀតទេ លើកលែងតែមានការទទូចសុំពីខាងស្ពុនស័រនៅក្នុងជុំណាមួយដើម្បីឱ្យមានភាពទាក់ទាញនោះតែបុ៉ណ្ណោះ។
កាលពីដំបូង ការប្រកួតនេះគ្រោងបើកសន្និសីទកាសែតកាលពីថ្ងៃទី២៨ មេសា និងគ្រោងដំណើរការនៅថ្ងៃអាទិត្យ ទី៤ ឧសភា វេលាម៉ោង២និង៣០នាទីរសៀល ដោយបន្តធ្វើបែបនោះនៅរៀងរាល់ថ្ងៃអាទិត្យតែម្តង ។ បុ៉ន្តែដោយសារការប្រកួតនោះតម្រូវឱ្យមានការបើកឆាកដោយកីឡាករបរទេសវិញ ទើបពន្យារមកដល់ថ្ងៃនេះ ហើយនៅមិនទាន់កំណត់ជាថ្មី ។ លោកញៀន សុធី ប្រាប់ថា ការប្រកួតអន្តរជាតិប្រចាំសប្តាហ៍នេះនឹងអាចបើកសន្និសីទជាថ្មីនៅអំឡុងសប្តាហ៍ទី២ ខែឧសភា ហើយដំណើរការប្រកួតអាចធ្វើនៅពាក់កណ្តាលខែក្រោយតែម្តង ឬអាចពន្យារពេលដល់ដើមខែមិថុនា ។ បើទោះជាផែនការគ្រោងទុកហាក់កៀកនឹងព្រឹត្តិការណ៍ប្រដាល់អន្តរជាតិដែលបានធ្វើ បុ៉ន្តែលោកបានអះអាងថា មិនប៉ះពាល់គ្នានោះទេ ហើយក៏មានជំនឿថា នឹងទាក់ទាញខុសគ្នាយ៉ាងពិតប្រាកដ ។ លោកបញ្ជាក់ថា «បើអ្វីៗអត់មានផ្លាស់ប្តូរមានន័យថា ក្នុងខែឧសភា ក្រោយយើងនឹងមានការប្រកួតប្រដាល់អន្តរជាតិ២លើកជាប់គ្នា បុ៉ន្តែខាងស្ថានីយបានគិតគូររួចហើយថា ការប្រកួតនោះនឹងមានការទាក់ទាញដូចគ្នា បើទោះជាការរៀបចំវាហាក់ផ្ទួនៗគ្នាបន្តិចក៏ដោយ»។
តាមរយៈការប្រកាសនេះមានន័យថា ក្នុងពេលដ៏ខ្លី ស្ថានីយទូរទស្សន៍អាស៊ីអាគ្នេយ៍នឹងមានការប្រកួតអន្តរជាតិមួយថ្មីបន្ថែមពីលើការប្រកួតអន្តរជាតិក្នុងមួយខែម្តងដែលមានស្រាប់ បើទោះជាការប្រកួតនោះនឹងមានតែមួយលើកហើយបាត់ស្រមោលទៅវិញ ។ យោងតាមភាពជាក់ស្តែង ស្ថាប័នដែលមានព្រឹត្តិការណ៍ប្រដាល់អន្តរជាតិកំពុងមានការរីកចម្រើនយ៉ាងខ្លាំងនាពេលបច្ចុប្បន្ន ក្នុងនោះរួមមានស្ថានីយទូរទស្សន៍អាស៊ីអាគ្នេយ៍ បុ៉ស្តិ៍ CTN បុ៉ស្តិ៍បាយ័ន បុ៉ស្តិ៍លេខ៣ និងបុ៉ស្តិ៍អប្សរា ។ តាមរយៈការប្រកាសជាថ្មីនេះមានន័យថា សម្រាប់ខែក្រោយទំនងមានតែបុ៉ស្តិ៍អាស៊ីអាគ្នេយ៍មួយគត់ដែលមានព្រឹត្តិការណ៍ប្រដាល់អន្តរជាតិ២ព្រមគ្នាប្រជែងនឹងបុ៉ស្តិ៍បាយ័ន ដែលធ្លាប់ធ្វើកន្លងមក ៕
ចែករំលែកព័តមាននេះ