រាជធានីភ្នំពេញ ៖ សហព័ន្ធកីឡាបាល់ទាត់ កម្ពុជា(FFC) បានប្រកាសបញ្ជីឈ្មោះកីឡាករអាយុក្រោម២២ឆ្នាំទាំង២៣នាក់ជាផ្លូវការហើយ ដើម្បីត្រៀមទៅចូលរួមការប្រកួតកីឡាស៊ីហ្គេម លើកទី៣៣ នៅថៃ នាខែធ្នូ ខាងមុខនេះ។…
រាជធានីភ្នំពេញ ៖ សហព័ន្ធកីឡាបាល់ទាត់ កម្ពុជា(FFC) បានប្រកាសបញ្ជីឈ្មោះកីឡាករអាយុក្រោម២២ឆ្នាំទាំង២៣នាក់ជាផ្លូវការហើយ ដើម្បីត្រៀមទៅចូលរួមការប្រកួតកីឡាស៊ីហ្គេម លើកទី៣៣ នៅថៃ នាខែធ្នូ ខាងមុខនេះ។
សម្រាប់បញ្ជីឈ្មោះកីឡាករទាំង២៣នាក់ គឺពុំមានឈ្មោះកីឡាករក្រុមព្រះខ័នរាជស្វាយរៀងសូម្បីម្នាក់ ។ មិនមានឈ្មោះបើតាមប្រភពព័ត៌មានថា ដោយសារពួកគេជាប់ភារកិច្ចជួយក្លិបក្នុងពានរង្វាន់ក្លិបអាស៊ាន ASEAN Club Championship Shopee Cup។ ទោះបីយ៉ាងណា សម្រាប់សមាសភាពកីឡាករទាំង២៣នាក់ដែលលោកគ្រូបង្វឹក Koji Gyotoku បានកោះហៅ គឺសុទ្ធតែជាកីឡាករដែលមានសក្តានុពលរបស់កម្ពុជាទាំងអស់។ ជាក់ស្ដែង សូម្បីកីឡាករឈឿន ដាវីន ដែលស្ថិតក្នុងថ្នាលយុវជនរបស់ក្រុម York United FC និងកីឡាករ លឹម លោកាថុងរបស់ក្រុម Auckland United នៅប្រទេសនូវែលសេឡង់ ក៏មានឈ្មោះចូលក្នុងក្រុមU22 កម្ពុជា ផងដែរ។
ក្នុងការចាប់ពូលប្រកួតសម្រាប់វិញ្ញាសាបាល់ទាត់បុរស ក្រុមU22 កម្ពុជាស្ថិតនៅពូលA ជាមួយក្រុមU22 ថៃ(ម្ចាស់ផ្ទះ)និងក្រុមU22 ទីម័រឡេស្តេ។ ចំណែកវិញ្ញាសាបាល់ទាត់នារី ក្រុមកម្ពុជាក៏ស្ថិតនៅពូលAជាមួយក្រុមថៃ សិង្ហបុរី និងឥណ្ឌូណេសុី។
គួរឱ្យដឹងផងដែរថា ក្រោយមានមន្ទិលពីការទៅ ឬមិនទៅចូលរួមប្រកួតកីឡាសុីហ្គេមរបស់ក្រុមអត្តពលិកកម្ពុជា ក្នុងពេលជម្លោះព្រំដែនកម្ពុជា-ថៃមិនទាន់ដោះស្រាយបាននៅឡើយ មកដល់ពេលនេះក្ដីមន្ទិលនោះត្រូវបានបញ្ចប់ហើយ ។ នោះគឺក្រុមអត្តពលិកចំនួន២១ប្រភេទកីឡារបស់កម្ពុជានឹងទៅចូលរួមប្រកួតកីឡាសុីហ្គេមលើកទី៣៣ ឆ្នាំ២០២៥ នៅប្រទេសថៃ ដែលនឹងប្រព្រឹត្តទៅពីថ្ងៃទី ៣ ដល់ថ្ងៃទី២០ ខែធ្នូ ខណៈពិធីបើកជាផ្លូវការនឹងធ្វើឡើងនៅថ្ងៃទី ៩ ខែធ្នូ ។ ក្នុងការទៅចូលរួមព្រឹត្តិការណ៍កីឡាដ៏ធំប្រចាំតំបន់ស៊ីអាគ្នេយ៍នេះកម្ពុជានឹងបញ្ជូនប្រតិភូ គ្រូបង្វឹក និងកីឡាករ កីឡាការិនី សរុបចំនួន ៣៣៣នាក់។
សម្រាប់ប្រភេទកីឡាទាំង២១ ដែលកម្ពុជា នឹងបញ្ជូនទៅនោះមាន អត្តពលកម្ម ហែលទឹក ជិះសេះ គុនដាវ កាយសម្ព័ន្ធ យូដូ តេក្វាន់ដូ WT ទ្រីយ៉ាត្លុង បាល់ទះ បាល់ទាត់ ចំបាប់ បញ្ចស៊ីឡាត់ ឃីកបុកស៊ីង ប៉េតង់ សីដក់ ម៉ូតូទឹក ការ៉ាតេ ជឺជីតស៊ូ វូស៊ូ បាល់ទាត់លើតុ និងកីឡាអេឡិចត្រូនិក ៕
ចែករំលែកព័តមាននេះ