រាជធានីភ្នំពេញ ៖ អ្នកប្រដាល់ជើងខ្លាំងក្របីព្រៃពេជ្រ សម្បត្តិ នៅតែអាចបន្តរក្សាតំណែងជាម្ចាស់ខ្សែក្រវាត់ក្នុងប្រភេទទម្ងន់៦០គីឡូក្រាមក្រោយយកឈ្នះកីឡាករAARON CLARKE មកពីប្រទេសអៀរឡង់ដោយពិន្ទុ ក្នុងការដាក់ខ្សែក្រវាត់ឱ្យប្រកួតដណ្ដើមនៅលើសង្វៀនទូរស្សន៍ហង្សមាសកាលពីថ្ងៃទី២២ ខែវិច្ឆិកា ឆ្នាំ២០២៥។…
រាជធានីភ្នំពេញ ៖ អ្នកប្រដាល់ជើងខ្លាំងក្របីព្រៃពេជ្រ សម្បត្តិ នៅតែអាចបន្តរក្សាតំណែងជាម្ចាស់ខ្សែក្រវាត់ក្នុងប្រភេទទម្ងន់៦០គីឡូក្រាមក្រោយយកឈ្នះកីឡាករAARON CLARKE មកពីប្រទេសអៀរឡង់ដោយពិន្ទុ ក្នុងការដាក់ខ្សែក្រវាត់ឱ្យប្រកួតដណ្ដើមនៅលើសង្វៀនទូរស្សន៍ហង្សមាសកាលពីថ្ងៃទី២២ ខែវិច្ឆិកា ឆ្នាំ២០២៥។
តាមការសង្កេតការប្រកួតនាពេលនោះ អ្នកប្រដាល់មកពីប្រទេសអៀរឡង់រូបនេះធ្វើមិនបានល្អទាល់តែសោះមិនសក្តិសមជាម្ចាស់ខ្សែក្រវាត់ISKA២ស្ថាប័នប្រចាំប្រទេសអៀរឡង់ឡើយ។ ជាក់ស្ដែងការមកប៉ះពេជ្រ សម្បត្តិលើកនេះប្រកួត៥ទឹកពេញជាលក្ខណៈហ្គង់ចេញម្រាម មិនអាចធ្វើអ្វីពេជ្រ សម្បត្តិបានឡើយធ្វើឱ្យក្ដីស្រមៃរបស់គេក្នុងការដណ្ដើមយកខ្សែក្រវាត់ពីពេជ្រ សម្បត្តិ គឺមិនសមតាមបំណងនោះទេ ។ ការប្រកួតតាំងពីទឹកទី១ដល់ទឹកទី៤ទោះបីAARON CLARKព្យាយាមប្រើគ្រប់ល្បិចដើម្បីដាក់សម្ពាធលើពេជ្រ សម្បត្តិយ៉ាងណាក៏ដោយក៏ពេជ្រ សម្បត្តិ នៅតែកំដរបានគ្រប់ស្នៀត។
ជាពិសេសនៅដើមទឹកទី៥ពេជ្រ សម្បត្តិ បានបង្កើនការវាយលុកយ៉ាងសន្ធាប់ក្នុងគោលបំណងផ្ដួលគូប្រកួតឱ្យបានមុនស្នូរជួងបញ្ចប់ទឹកទី៥ ប៉ុន្តែទៅអត់រួចបានត្រឹមយកឈ្នះដោយពិន្ទុប៉ុណ្ណោះ។ ទោះបីជាយ៉ាងណា វាជារឿងល្អបំផុតដែលកីឡាករពេជ្រ សម្បត្តិ អាចការពារតំណែងម្ចាស់ខ្សែក្រវាត់មាសមិនឱ្យរបូតបាន។ ការប្រកួត៥ទឹកពេញអាជ្ញាកណ្ដាលប្រកាសឱ្យពេជ្រ សម្បត្តិឈ្នះពិន្ទុAARON CLARKដោយឯកច្ឆ័ន្ទ។ក្រោយចប់ការប្រកួត កីឡាករពេជ្រ សម្បត្តិ ទទួលស្គាល់អ្នកប្រដាល់
មកពីប្រទេសអៀរឡង់ម្នាក់នេះមានល្បិចប្រយុទ្ធល្អគួរសម។
ចំណែកគូផ្សេងទៀត កីឡាករលន បញ្ញា បានយកឈ្នះកីឡាករALEX PETROULIAS មកពីអូស្ត្រាលីដោយពិន្ទុក្នុងការប្រកួត៥ទឹកពេញ ដណ្ដើមខ្សែក្រវាត់ក្នុងប្រភេទទម្ងន់៦៧គីឡូក្រាម ។ កីឡាករALEX PETROULIASថ្វីត្បិតមានឱកាសតស៊ូប្រកួតដល់ចប់ទឹកទី៥ក៏ពិតមែន ប៉ុន្តែត្រូវលន បញ្ញា ដេញវាយស្ទើរតែមិនមានឱកាសតដៃបានជាពិសេសនៅចុងទឹកទី៥។
កីឡាករហុង សុវណ្ណចាន់សុធី ក្លាយជាម្ចាស់ពានក្នុងប្រភេទទម្ងន់៦០គីឡូក្រាមបន្ទាប់ពីយកឈ្នះពិន្ទុកីឡាករTYLER HOGANមកពីប្រទេសអង់គ្លេសក្នុងលទ្ធផល៤-១ ៕
ចែករំលែកព័តមាននេះ