ខេត្តព្រះសីហនុ ៖ នៅក្នុងសន្និសីទសារព័ត៌មានស្ដីពីការប្រកួតប្រដាល់គុនខ្មែរអន្តរជាតិនៅខេត្តព្រះសីហនុ កាលពីថ្ងៃទី២២ ខែវិច្ឆិកាឆ្នាំ២០២៥ ឯកឧត្តម វ៉ាត់ ចំរើនរដ្ឋលេខាធិការក្រសួងអប់រំ យុវជន និងកីឡា…
ខេត្តព្រះសីហនុ ៖ នៅក្នុងសន្និសីទសារព័ត៌មានស្ដីពីការប្រកួតប្រដាល់គុនខ្មែរអន្តរជាតិនៅខេត្តព្រះសីហនុ កាលពីថ្ងៃទី២២ ខែវិច្ឆិកាឆ្នាំ២០២៥ ឯកឧត្តម វ៉ាត់ ចំរើនរដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ចង់ឃើញខេត្តព្រះសីហនុក្លាយជាគោលដៅរៀបចំការប្រកួតកីឡាប្រដាល់កម្រិតពិភពលោកដូចនៅរដ្ឋឡាសវេហ្គាស សហរដ្ឋអាមេរិក នាថ្ងៃអនាគត។
ឯកឧត្តមបានបញ្ជាក់ឱ្យដឹងថា ដើម្បីប្រែក្លាយខេត្តជាប់មាត់សមុទ្រដ៏មានសក្ដានុពលមួយនេះក្លាយជាខេត្តអត្តសញ្ញាណ និងជាកន្លែងប្រកួតកីឡាប្រដាល់គុនខ្មែរដ៏ធំកម្រិតពិភពលោក ផ្សព្វ
ផ្សាយនៅលើឆាកអន្តរជាតិដូចនៅរដ្ឋឡាសវេហ្គាស យើងត្រូវរួមគ្នារៀបចំឱ្យមានការប្រកួត
យ៉ាងហោចឱ្យបានមួយឆ្នាំម្ដងចាប់ពីឆ្នាំ២០២៥នេះទៅ។
ឯកឧត្តមបានបញ្ជាក់បន្ថែមថា ព្រឹត្តិការណ៍ប្រដាល់គុនខ្មែរមិនត្រឹមបញ្ជាក់នូវអត្តសញ្ញាណដួងព្រលឹងជាតិ ល្បីសុសសាយទៅកាន់ពិភពលោកនោះទេ ពោលវាបានជួយឱ្យតម្លៃខ្លួនកីឡាករកម្ពុជាកាន់តែខ្ពស់ ហើយពិភពលោកនឹងចាប់អារម្មណ៍យកកម្ពុជាជាគោលដៅទេសចរណ៍សម្រាប់ទស្សនាការប្រកួតកីឡាប្រដាល់ និងមានកីឡាករអាជីពល្បីៗជាច្រើននាំគ្នាមកប្រកួតដណ្ដើមខ្សែក្រវាត់កម្រិតពិភពលោកនៅខេត្តព្រះសីហនុរបស់យើង។ ដូច្នេះទាល់តែគ្រប់ភាគីពាក់ព័ន្ធរួមគ្នារៀបចំផែនការឱ្យសម្រេចបានចក្ខុវិស័យមួយនេះ។
ឯកឧត្តមវ៉ាត់ ចំរើន បានសង្កត់ធ្ងន់ថា ការរៀបចំឱ្យមានការប្រកួតជើងឯកពិភពលោកនាពេលនេះ មិនមែនយើងមានមហិច្ឆិតាចង់ធ្វើការប្រកួតប្រជែងជាមួយប្រទេសណាទាំងអស់ គឺដើម្បីឱ្យកម្ពុជារឹងមាំដោយខ្លួនឯង ជួយឱ្យខ្លួនឯងមានតម្លៃ និងមានបំណងឱ្យបណ្ដាប្រទេសនៅលើឆាកអន្តរជាតិចូលរួមកាន់តែច្រើន នោះនឹងជួយឱ្យកម្ពុជាសម្រេចក្ដីសុបិនដាក់បញ្ចូលគុនខ្មែរនៅក្នុងអូឡាំពិក។
ឯកឧត្តម សាមុត សុធារិទ្ធ អភិបាលរងខេត្តព្រះសីហនុ បានលើកឡើងពីគុណតម្លៃមហាសាល និងដ៏មានសក្ដានុពលរបស់ខេត្តជាប់មាត់សមុទ្រមួយនេះថា នឹងមានលទ្ធភាពគ្រប់គ្រាន់ដើម្បីទទួលនិងធ្វើឱ្យភ្ញៀវទេសចរជាប់ចិត្តដិតអារម្មណ៍គ្រប់ៗគ្នា ។ ម្យ៉ាងទៀតរួមផ្សំជាមួយនឹងការបង្កើតឱ្យមានព្រឹត្តិការណ៍ប្រកួតកីឡាប្រដាល់កម្រិតពិភពលោកដ៏ធំបន្ថែមទៀតខេត្តព្រះសីហនុនឹងក្លាយជាតំបន់ទេសចរណ៍ឯកទៅថ្ងៃអនាគត ។ លោកក៏ចង់ឱ្យខាងគណៈកម្មាធិការជាតិអូឡាំពិកកម្ពុជា ក៏ដូចជាសហព័ន្ធកីឡាប្រដាល់គុនខ្មែរ និងគ្រប់ភាគីពាក់ព័ន្ធទាំងអស់រៀបចំឱ្យមានព្រឹត្តិការណ៍សប្បាយៗឱ្យបានច្រើនបន្ថែមទៀត។
ឯកឧត្តមខូវ ឆាយ អគ្គលេខាធិការស្ដីទីសហព័ន្ធកីឡាប្រដាល់គុនខ្មែរអន្តរជាតិបានលើកឡើងថា ការរៀបចំឱ្យមានការប្រកួតកីឡាប្រដាល់គុនខ្មែរជាលក្ខណៈអន្តរជាតិដ៏ធំនៅខេត្តព្រះសីហនុលើកទី៦នាពេលដ៏ឆាប់ខាងមុខនេះ គឺជាទំព័រប្រវត្តិសាស្ត្រថ្មីមួយដ៏អស្ចារ្យសម្រាប់កម្ពុជា ដែលបានបង្ហាញពីការពួតដៃគ្នាជាធ្លុងមួយរវាងសហព័ន្ធគុនខ្មែរទាំងពីរជំរុញការផ្សព្វផ្សាយគុនខ្មែរប្រកបដោយថាមពលឆ្ពោះទៅរកឧត្តមភាពលើឆាកអន្តរជាតិកាន់តែឆាប់រហ័ស។អគ្គលេខាធិការស្ដីទីរូបនេះបានឱ្យដឹងទៀតថាការគាំទ្ររបស់រាជរដ្ឋាភិបាល រដ្ឋបាលខេត្តព្រះសីហនុ និងវិស័យឯកជន បានដើរតួនាទីយ៉ាងសំខាន់ក្នុងការលើកស្ទួយវិស័យកីឡាប្រដាល់គុនខ្មែរ និងលើកតម្កើងអត្តសញ្ញាណជាតិលើឆាកអន្តរជាតិ។
គួររំលឹកផងដែរថា ព្រឹត្តិការណ៍ប្រកួតកីឡាប្រដាល់ជើងឯកពិភពលោកធ្វើឡើងចាប់ពីថ្ងៃទី១៧-២១ ខែធ្នូ ឆ្នាំ២០២៥ មាន៣៧ប្រទេសចូលរួមបើគិតត្រឹមថ្ងៃទី២២ ខែវិច្ឆិកា ។ ក្នុងនោះមាន២៣ប្រទេសចុះឈ្មោះរួច និង១៤ប្រទេសទៀតនឹងបញ្ជូនឈ្មោះមកនាពេលដ៏ឆាប់ខាងមុខ៕
ចែករំលែកព័តមាននេះ