រាជធានីភ្នំពេញ ៖ ព្រឹត្តិការណ៍ប្រកួតកីឡាការ៉ាតេជ្រើសរើសជើងឯកថ្នាក់ជាតិឆ្នាំ២០២៥ បានបិទបញ្ចប់ជាស្ថាពរហើយកាលពីល្ងាចថ្ងៃទី៨ ខែកុម្ភៈ ឆ្នាំ២០២៦ នៅសាលដំបូលទូកក្នុងសាកលវិទ្យាល័យភូមិន្ទភ្នំពេញ។ឯកឧត្តមអគ្គបណ្ឌិតសភាចារ្យអូន ព័ន្ធមុនីរ័ត្នប្រធានសហព័ន្ធកីឡាការ៉ាតេកម្ពុជា បានដាក់ចេញគោលការណ៍គន្លឹះចំនួន៣ដើម្បីជួយឱ្យវិស័យកីឡាការ៉ាតេនៅកម្ពុជារីកលូតលាស់។
ឯកឧត្តមសាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ឯកឧត្តមអគ្គបណ្ឌិតសភាចារ្យ អូនព័ន្ធ មុនីរ័ត្ន ដែលបានអញ្ជើញជាអធិបតីក្នុងពិធីបិទការប្រកួតនោះ បានវាយតម្លៃខ្ពស់ចំពោះលទ្ធផលនៃការខិតខំប្រឹងប្រែងរៀបចំការប្រកួតរបស់គណៈកម្មការពាក់ព័ន្ធទាំងអស់។
ឯកឧត្តមបន្តថា ការរៀបចំឱ្យមានព្រឹត្តិការណ៍ប្រកួតនេះ ជាផ្នែកមួយនៃគោលការណ៍ទាំង៥សម្រាប់កំណត់ទិសដៅអនាគតនៃការអភិវឌ្ឍកីឡាការ៉ាតេនៅកម្ពុជា ដែលកើតចេញពីការយកចិត្តទុកដាក់ខ្ពស់ ឯកភាព សាមគ្គីភាពផ្ទៃក្នុង ការចូលរួមប្រកបដោយឆន្ទៈនិងស្មារតីបុរេសកម្មពីគ្រប់ភាគីពាក់ព័ន្ធទាំងអស់។ អ្វីដែលសំខាន់ជាងនេះទៅទៀតនោះ ប្រមុខរាជរដ្ឋាភិបាលតែងតែយកចិត្តទុកដាក់ក្នុងការធ្វើកំណែទម្រង់វិស័យអប់រំកាយនិងកីឡាតាមរយៈក្រសួងអប់រំយុវជន និងកីឡា ឱ្យស្របតាមគោលនយោបាយកំណែទម្រង់វិស័យអប់រំ ក្នុងគោលដៅអប់រំកាយនិងកីឡាក្លាយជាកម្មវត្ថុ នៃការកសាងជីវិត និងសុខុមាលភាពសង្គម ព្រមទាំងបង្កើតគុណភាព នៃគុណផលកីឡាឈានទៅប្រកួតប្រជែងស្វែងរកឧត្តមភាពកីឡាលើឆាកអន្តរជាតិ ព្រមទាំងរក្សាឱ្យបាននូវ កីឡាគ្មានគ្រឿងញៀន គ្មានផ្សែងបារី កីឡាបៃតង កីឡាស្អាតស្អំ និងកីឡាគ្មានសារធាតុដូពីង(Doping) ។
ឆ្លៀតក្នុងឱកាសនោះផងដែរ ឯកឧត្តម សាមឺឌី ស៊ីវឌ្ឍនា បានណែនាំនូវគោលការណ៍គន្លឹះចំនួន៣របស់ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី អូន ព័ន្ធមុនីរ័ត្ន ដែលបានដាក់ចេញក្នុងអាណត្តិទី១០ ឆ្នាំ២០២៤-២០២៨រួមមាន៖
ទី១-ការលើកកម្ពស់ចលនាការ៉ាតេដើម្បីទាំងអស់គ្នា
ទី២-ការអភិវឌ្ឍបច្ចេកទេសជំនាញដល់គ្រប់ក្លិប សម្រាប់គ្រូបង្វឹកជំនាញ និងអាជ្ញាកណ្ដាលឬចៅក្រម និងទី៣-ជំរុញចលនាឱ្យមន្ទីរសេដ្ឋកិច្ច និងហិរញ្ញ
វត្ថុរាជធានី-ខេត្ត ទ្រទ្រង់ក្លិបការ៉ាតេក្នុងដែនសមត្ថកិច្ចរបស់ខ្លួន។
ដើម្បីចូលរួមអភិវឌ្ឍការរីកលូតលាស់នៃវិស័យកីឡាការ៉ាតេនៅកម្ពុជា ឯកឧត្តមបានផ្ដល់នូវមតិមួយចំនួនដូចខាងក្រោម
១-បន្តបណ្ដុះបណ្ដាលអាជ្ញាកណ្ដាល ចៅក្រមបន្ថែមប្រកបដោយគុណវឌ្ឍិ ឆ្ពោះទៅរកចក្ខុវិស័យឆ្នាំ២០៣០ និងឆ្នាំ២០៥០។
២-ពង្រឹងសមត្ថភាពគ្រូបង្វឹកជំនាញ ដើម្បីបណ្ដុះបណ្ដាលកីឡាការ៉ាតេជំនាញកម្រិតខ្ពស់។
៣-ត្រូវការអ្នកជំនាញរៀបចំអាហារូបត្ថម្ភសម្រាប់កីឡាករ កីឡាការិនីការ៉ាតេ។
៤-ជំរុញការបណ្ដុះបណ្ដាលគ្រូបង្វឹក គ្រូជំនួយ ប្រធានក្លិប កីឡាករ កីឡាការិនី និងអាជ្ញាកណ្ដាលចៅក្រម ស្វែងយល់និងជៀសវាងដាច់ខាតការប្រើប្រាស់សារធាតុដូពីង។
៥-គ្រប់និកាយនីមួយៗត្រូវពង្រឹងបច្ចេកទេសការ៉ាតេ តាមរយៈការធ្វើកិច្ចសហប្រតិបត្តិការជាមួយសហព័ន្ធកីឡាការ៉ាតេបរទេស ៕
ចែករំលែកព័តមាននេះ