ខេត្តព្រះសីហនុ ៖ ឯកឧត្តមបណ្ឌិតទេសរដ្ឋមន្ដ្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) រំពឹងប្រដាល់គុនខ្មែរ នឹងមានលទ្ធភាពអាចឈានទៅទទួលស្គាល់ពីចលនាអូឡាំពិកអន្ដរជាតិនាថ្ងៃអនាគត ក្រោយក្បាច់គុនអត្តសញ្ញាណជាតិខ្មែរនេះ…
ខេត្តព្រះសីហនុ ៖ ឯកឧត្តមបណ្ឌិតទេសរដ្ឋមន្ដ្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) រំពឹងប្រដាល់គុនខ្មែរ នឹងមានលទ្ធភាពអាចឈានទៅទទួលស្គាល់ពីចលនាអូឡាំពិកអន្ដរជាតិនាថ្ងៃអនាគត ក្រោយក្បាច់គុនអត្តសញ្ញាណជាតិខ្មែរនេះ ត្រូវបានយកចិត្តទុកដាក់ខ្ពស់ពីរាជរដ្ឋាភិបាល និងមានសន្ទុះការគាំទ្រដ៏ខ្លាំងក្លាទាំងនៅលើឆាកជាតិ និងអន្ដរជាតិ។
ការបង្ហាញសុទិដ្ឋិនិយមនេះ ធ្វើឡើងក្នុងពិធីបើកការប្រកួតកីឡាប្រដាល់គុនខ្មែរជើងឯកពិភពលោក លើកទី៦ ប្រចាំឆ្នាំ២០២៥ នៅល្ងាចថ្ងៃទី១០ កុម្ភៈ នាក្រុងព្រះសីហនុ ។ ព្រឹត្តិការណ៍នេះ ប្រព្រឹត្តទៅពីថ្ងៃទី១០-១៣ ខែកុម្ភៈ ឆ្នាំ២០២៦ ដោយមានអត្តពលិកមកពី២០ប្រទេសចូលរួម គឺមានឥណ្ឌូណេស៊ី ឡាវ ម៉ាឡេស៊ី ហ្វីលីពីន វៀតណាម អាហ្វហ្គានីស្ថាន ចិន ឥណ្ឌា អុីរ៉ង់ នេប៉ាល់ បារាំង អាល្លឺម៉ង់ អង់គ្លេស អេស្ប៉ាញ កាណាដា សហរដ្ឋអាមេរិក នូវែលហ្សេឡង់ កាមេរូន ម៉ូរីស និងម្ចាស់ផ្ទះកម្ពុជា។
ថ្លែងក្នុងពិធីបើកការប្រកួតនេះ ឯកឧត្តមបណ្ឌិតទេសរដ្ឋមន្ដ្រី ថោង ខុន បានសម្ដែងការស្វាគមន៍យ៉ាងកក់ក្ដៅចំពោះវត្តមានប្រតិភូ និងកីឡាករ-កីឡាការិនីប្រដាល់គុនខ្មែរ នៃបណ្ដាប្រទេសទាំងអស់ ដែលបានចូលរួមការប្រកួតគុនខ្មែរជើងឯកពិភពលោកឆ្នាំនេះ។ ឯកឧត្តមថា ព្រឹត្តិការណ៍នេះ មិនត្រឹមតែដើម្បីលើកស្ទួយជួយគុនខ្មែរទៅកាន់ពិភពលោកប៉ុណ្ណោះទេ ប៉ុន្តែក៏ជាការជំរុញផ្សព្វផ្សាយវិស័យទេសចរណ៍ ក្រោមប្រធានបទ “កម្ពុជាជាគោលដៅទេសចរណ៍ដែលមានសុវត្ថិភាព និងរាក់ទាក់ស្វាគមន៍” ពិសេសគឺនៅតំបន់ឆ្នេរដ៏ស្រស់ស្អាតនៃខេត្តព្រះសីហនុ ដែលត្រូវបានប្រសិទ្ធនាមថា ជាតារារៈនាទិសនិរតី និងជាសមាជិកពេញសិទ្ធក្លិបឆ្នេរសមុទ្រដែលស្អាតបំផុតលើសកលលោក។
ឯកឧត្តមបណ្ឌិតទេសរដ្ឋមន្ដ្រី បន្ដថា ប្រដាល់គុនខ្មែរមានប្រវត្តិដ៏យូរលង់ ដែលមានអាយុកាលរាប់ពាន់ឆ្នាំមកហើយ និងមានសិលាចារឹកផ្ទាល់នៅតាមជញ្ជាំងប្រាសាទបុរាណខ្មែរជាច្រើន បន្សល់ទុកដោយបុព្វបុរសដូនតាខ្មែរ ដែលជាការបង្ហាញនូវតឹកតាងយ៉ាងច្បាស់អំពីប្រវត្តិគុនខ្មែរ ហើយឯកឧត្តមសង្ឃឹមថា ក្រោយបញ្ចប់ព្រឹត្តិការណ៍ប្រកួត គណៈប្រតិភូនិងកីឡាករ-កីឡាការិនីទាំងអស់នឹងឆ្លៀតពេលវេលាដើម្បីបានធ្វើដំណើរទៅទស្សនាដោយផ្ទាល់នូវសិលាចារឹកទាំងនេះនៅខេត្តសៀមរាប។
ដោយមានការគាំទ្រយកចិត្តទុកដាក់ និងដឹកនាំផ្ទាល់ពីសម្តេចតេជោ ហ៊ុន សែន អតីតនាយករដ្ឋមន្ដ្រី និងបច្ចុប្បន្នជាប្រធានព្រឹទ្ធសភានិងបន្តវេនដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ប្រដាល់គុនខ្មែរ ត្រូវបានថែរក្សា អភិរក្ស និងអភិវឌ្ឍន៍ឈានឡើងគួរជាទីមោទនៈ រហូតមានការគាំទ្រ និងទទួលស្គាល់យ៉ាងខ្លាំងក្លាទាំងលើឆាកជាតិ និងអន្តរជាតិ ។ ក្នុងនោះ NOCC តែងតែចូលរួមអភិវឌ្ឍន៍កីឡាប្រពៃណីអត្តសញ្ញាណជាតិនេះឲ្យស្របតាមស្តង់ដានៃចលនាអូឡាំពិក រហូតបានទទួលជោគជ័យក្នុងការបញ្ចូលប្រដាល់គុនខ្មែរ និងគុនល្បុក្កតោទៅក្នុងការប្រកួតកីឡាស៊ីហ្គេម ឆ្នាំ២០២៣ នៅកម្ពុជា។
តាមរយៈនេះឯកឧត្តមបានបង្ហាញសុទិដ្ឋិនិយមយ៉ាងដូច្នេះថា «យើងខ្ញុំសង្ឃឹមយ៉ាងមុត
មាំថា ជាមួយនឹងការយកចិត្តទុកដាក់ដ៏ខ្ពង់ខ្ពស់ពីប្រមុខរាជរដ្ឋាភិបាល ក្រោមការដឹកនាំប្រកប
ដោយវីរភាពរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី និងកិច្ចសហការយ៉ាងស្អិតរមួតរវាង NOCC ក្រសួងអប់រំ យុវជន និងកីឡា សហព័ន្ធកីឡាប្រដាល់គុនខ្មែរ សហព័ន្ធប្រដាល់គុនខ្មែរអន្តរជាតិ និងបណ្តាប្រទេសសហព័ន្ធគុនខ្មែរជាសមាជិក កីឡាប្រដាល់គុនខ្មែរនឹងមានលទ្ធភាពអាចឈានទៅទទួលស្គាល់ជាផ្លូវការពីចលនាអូឡាំពិកអន្តរជាតិ នាពេលអនាគត ជាក់ជាមិនខាន»។
សូមបញ្ជាក់ថា ព្រឹត្តិការណ៍គុនខ្មែរជើងឯកពិភពលោក លើកទី៦ ដំបូងឡើយគ្រោងរៀបចំ
កាលពីថ្ងៃទី១៧-២០ ខែធ្នូ ឆ្នាំ២០២៥ ប៉ុន្ដែដោយសារបញ្ហាព្រំដែន NOCC ក៏បានសម្រេចលើកពេលមករៀបចំនៅដើមខែកុម្ភៈ ឆ្នាំ២០២៦។
ចំពោះប្រតិភូកីឡាគុនខ្មែរបណ្ដាប្រទេសចូលរួមលើកនេះ មានការកើនឡើង២ប្រទេស បើធៀបកាលពីឆ្នាំ២០២៤ ដែលមាន១៨ប្រទេសចូលរួមនៅខេត្តសៀមរាប។ រីឯវិញ្ញាសាប្រកួតសរុបមានចំនួន៥០ដែលបែងចែកការប្រកួតកម្រិតស្ម័គ្រចិត្ត ពាក់កណ្ដាលអាជីព និងកម្រិតអាជីព ៕
ចែករំលែកព័តមាននេះ