រាជធានីភ្នំពេញ ៖ លោកប៉ាន សូរស័ក្ដិប្រធានសហព័ន្ធកីឡាទោចក្រយានកម្ពុជា បានលើកឡើងថា បើចង់ឱ្យវិស័យកីឡាទោចក្រយាននៅកម្ពុជាមានការរីកចម្រើន ត្រូវអនុវត្តគោលការណ៍ទាំង៥ឱ្យបានខ្ជាប់ខ្ជួន ។ លោកមានប្រសាសន៍បែបនេះនៅក្នុងពិធីបិទការប្រកួតជ្រើសរើសជើងឯកថ្នាក់ជាតិកីឡាប្រណាំងទោចក្រយាននៅពហុកីឡដ្ឋានជាតិមរតកតេជោកាលពីព្រឹកថ្ងៃទី៨ ខែកុម្ភៈ…
រាជធានីភ្នំពេញ ៖ លោកប៉ាន សូរស័ក្ដិប្រធានសហព័ន្ធកីឡាទោចក្រយានកម្ពុជា បានលើកឡើងថា បើចង់ឱ្យវិស័យកីឡាទោចក្រយាននៅកម្ពុជាមានការរីកចម្រើន ត្រូវអនុវត្តគោលការណ៍ទាំង៥ឱ្យបានខ្ជាប់ខ្ជួន ។ លោកមានប្រសាសន៍បែបនេះនៅក្នុងពិធីបិទការប្រកួតជ្រើសរើសជើងឯកថ្នាក់ជាតិកីឡាប្រណាំងទោចក្រយាននៅពហុកីឡដ្ឋានជាតិមរតកតេជោកាលពីព្រឹកថ្ងៃទី៨ ខែកុម្ភៈ ឆ្នាំ២០២៦។
លោកប៉ាន សូរស័ក្តិ បានបន្តថា ការប្រកួតរយៈពេល២ថ្ងៃមកនេះគឺជាការផ្ដល់ឱកាសដល់កីឡាករ កីឡាការិនី បានបញ្ចេញនូវទេពកោសល្យក៏ដូចជាការវាស់ស្ទង់សមត្ថភាពបច្ចេកទេសរបស់ពួកគេដែលខិតខំហ្វឹកហាត់កន្លងមក។ ចំពោះជ័យលាភីដែលពួកគេដណ្ដើមបាននាពេលនេះគឺជាការខិតខំប្រឹងប្រែងហ្វឹកហាត់ ព្យាយាមយកចិត្តទុកដាក់ក្នុងការគោរពវិន័យ និងគោរពតាមបទបញ្ជារបស់សហព័ន្ធនៅក្នុងការប្រកួតនេះ។
លោកបានសង្កត់ធ្ងន់ថា ដើម្បីឱ្យវិស័យកីឡាទោចក្រយានកម្ពុជា មានការរីកចម្រើនទាំងបរិមាណនិងគុណភាពសម្រាប់ចូលរួមក្នុងព្រឹត្តិការណ៍កីឡាស៊ីហ្គេមលើកទី៣៤ ឆ្នាំ២០២៧ នៅប្រទេសម៉ាឡេសុី និងការប្រកួតកីឡាយុវជនអាស៊ីឆ្នាំ២០៣១ដែលកម្ពុជាទទួលធ្វើជាម្ចាស់ផ្ទះនិងការប្រកួតនៅលើឆាកអន្តរជាតិផ្សេងៗទៀតក្នុងនាមប្រធានសហព័ន្ធលោកសូមផ្ដល់នូវអនុសាសន៍ចំនួន៥ចំណុចដូចខាងក្រោម៖
ទី១-ត្រូវខិតខំបណ្ដុះបណ្ដាលថ្នាក់ថ្នាល បង្កើនបរិមាណកីឡាករ កីឡាការិនីតាមក្លិប សមាគម រាជធានី-ខេត្ត ឱ្យបានទូលំទូលាយ មានធនធានមនុស្ស សម្ភារគ្រប់គ្រាន់ងាយស្រួលក្នុងការហ្វឹកហាត់ និងមានការប្រកួតគ្រប់កម្រិតទាំងថ្នាក់ភូមិភាគនិងថ្នាក់ជាតិ។
ទី២-ត្រូវពង្រឹងសមត្ថភាពគ្រូបង្វឹក កីឡាករ កីឡាការិនី ឱ្យកាន់តែល្អប្រសើរទាំងបរិមាណទាំងគុណភាព ដើម្បីធ្វើជាម្ចាស់រៀបចំការប្រកួតកម្រិតថ្នាក់ជាតិនិងថ្នាក់អន្តរជាតិ។
ទី៣-ត្រូវជំរុញឱ្យមានការហ្វឹកហ្វឺនជាប្រចាំនិងការប្រកួតឱ្យបានច្រើននៅតាមបណ្ដាក្លិប សមាគមនៅទូទាំងប្រទេស។
ទី៤-ត្រូវពង្រឹងរចនាសម្ព័ន្ធគ្រប់គ្រងផ្ទៃក្នុងរបស់សហព័ន្ធ មានទំនាក់ទំនងល្អរវាងក្លិប សមាគមនៅទូទាំងប្រទេស
និងទី៥-ត្រូវប្រឹងប្រែងស្វែងរកដៃគូអភិវឌ្ឍន៍បន្ថែមទៀត ដើម្បីបង្កើតព្រឹត្តិការណ៍ប្រកួតឱ្យបានច្រើនក្នុង១ឆ្នាំៗតាមតែអាចធ្វើទៅបាន ៕
ចែករំលែកព័តមាននេះ