បើកការប្រកួតកីឡាប្រណាំងទូក ជ្រើសរើសជើងឯកថ្នាក់ជាតិ ពានរង្វាន់ឯកឧត្តមអភិសន្តិបណ្ឌិត ស សុខា លើកទី២ ឆ្នាំ២០២៥
- ស្វាយរៀង
ខេត្តស្វាយរៀង ៖ រសៀលថ្ងៃទី៧ ខែកុម្ភៈ ឆ្នាំ២០២៦ ឯកឧត្តម សរ សិទ្ធិ រដ្ឋលេខាធិការ ទទួលការងារអគ្គលេខាធិការដ្ឋាន…
ខេត្តស្វាយរៀង ៖ រសៀលថ្ងៃទី៧ ខែកុម្ភៈ ឆ្នាំ២០២៦ ឯកឧត្តម សរ សិទ្ធិ រដ្ឋលេខាធិការ ទទួលការងារអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ និងជាអនុប្រធានទី២ សហព័ន្ធ តំណាងដ៏ខ្ពង់ខ្ពស់ឯកឧត្តម អភិសន្តិបណ្ឌិតស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអុីងកម្ពុជា បានអញ្ជើញជាអធិបតីក្នុងពិធីបើកការប្រកួតកីឡាទូកង ទូកនាគ ទូកផ្កាចារ ទូកកានូ-កាយ៉ាក់ និងទូករ៉ូអុីង ជ្រើសរើសជើងឯកថ្នាក់ជាតិ “ពានរង្វាន់ឯកឧត្តមអភិសន្តិបណ្ឌិត ស សុខា”លើកទី២ ឆ្នាំ២០២៥ ដែលបានប្រព្រឹត្តទៅនៅទន្លេវ៉ៃគោ ក្រុងស្វាយរៀង ខេត្តស្វាយរៀង។
ថ្លែងក្នុងនាមតំណាងឯកឧត្តមអភិសន្តិបណ្ឌិតស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហា
ផ្ទៃ និងជាប្រធានសហព័ន្ធកីឡាទូកកានូ និងរ៉ូអុីងកម្ពុជា ឯកឧត្តម សរ សិទ្ធិ មានក្តីសោមនស្សរីករាយយ៉ាងក្រៃលែង ដែលបានមកចូលរួមជាអធិបតីក្នុងពិធីបើកការប្រកួតកីឡាទូកង ទូកនាគ ទូកផ្កាចារ ទូកកានូ ទូកកាយ៉ាក់ និងទូករ៉ូអុីងជ្រើសរើសជើងឯកថ្នាក់ជាតិពានរង្វាន់ ឯកឧត្តមអភិសន្តិបណ្ឌិត ស សុខា លើកទី២ ប្រចាំឆ្នាំ២០២៥ ដែលត្រូវលើកមកធ្វើនៅដើមឆ្នាំ២០២៦នេះ ជាមួយឯកឧត្តម លោកជំទាវ លោក លោកស្រី និងបងប្អូនទាំងអស់នៅទីនេះ ។
ឯកឧត្តមប្រធានគណៈអធិបតី មានប្រសាសន៍បន្ថែមទៀតថា សហព័ន្ធកីឡាទូកកានូ និងរ៉ូអុីង
កម្ពុជា រៀបចំព្រឹត្តិការណ៍ប្រកួតកីឡាប្រណាំងទូកជ្រើសរើសជើងឯកថ្នាក់ជាតិពានរង្វាន់ឯក
ឧត្តមអភិសន្តិបណ្ឌិត ស សុខា លើកទី២ ប្រចាំឆ្នាំ២០២៥ នេះឡើងក្នុងគោលបំណងសម្រួចទិសដៅបច្ចេកទេសក្នុងការជ្រើសរើសអត្តពលិកឆ្នើម មកធ្វើការប្រមូលផ្តុំហ្វឹកហាត់ក្នុងក្រុមជម្រើសជាតិកីឡាទូកប្រចាំឆ្នាំ២០២៦ ដើម្បីត្រៀមចូលរួមក្នុងព្រឹត្តិការណ៍ប្រកួតជាលក្ខណៈអន្តរជាតិនានា ជាពិសេសត្រៀមខ្លួនចូលរួមការប្រកួតកីឡាអាស៊ីហ្គេមឆ្នាំ២០២៦ ដែលប្រទេសជប៉ុនធ្វើជាម្ចាស់ផ្ទះ។
ឯកឧត្តមបានសង្កត់ធ្ងន់ទៀតថា ជាការពិតព្រឹត្តិការណ៍កីឡាមិនមែនមានត្រឹមតែការប្រកួតមួយមុខប៉ុណ្ណោះទេ ប៉ុន្តែជាការផ្តល់ឱកាសក្នុងការទំនាក់ទំនង ការផ្លាស់ប្តូរបទពិសោធន៍ ក៏ដូចជាការផ្សព្វផ្សាយអំពីទេសចរណ៍ វប្បធម៌ សង្គម សេដ្ឋកិច្ច និងកេរ្តិ៍ឈ្មោះប្រទេសជាតិយើង ក្នុងការពង្រឹងចំណងសាមគ្គីភាព មិត្តភាព រវាងប្រតិភូកីឡា មកពីគ្រប់បណ្តាប្រទេស ឬក៏បណ្តាក្រសួងស្ថាប័ន រាជធានី-ខេត្ត ដែលបានអញ្ជើញមកចូលរួមការប្រកួតផងដែរ ។
ឯកឧត្តមសរ សិទ្ធិ បានអំពាវនាវឱ្យមានចលនាចូលរួមឧបត្ថម្ភគាំទ្រដល់ប្រភេទកីឡាប្រណាំងទូកដែលជាកេរមរតកវប្បធម៌ខ្មែរ និងជាកីឡាប្រពៃណី ក្នុងគោលដៅអភិរក្ស និងអភិវឌ្ឍ ដើម្បីឱ្យប្រភេទកីឡាមួយនេះ មានការរីកចម្រើនបន្ថែមទៀត ។ បន្ថែមលើសនេះ ឯកឧត្តមរដ្ឋលេខាធិការបានអំពាវនាវដល់បងប្អូនប្រជាពលរដ្ឋជាពិសេសយុវជនទាំងអស់ចូលរួមលេងកីឡាដើម្បីសុខភាព ជួយលើកកម្ពស់ សុខុមាលភាព និងជៀសឆ្ងាយពីគ្រឿងញៀន និងសូមស្នើដល់គណៈកម្មការរៀបចំការប្រកួតគ្រប់ផ្នែកទាំងអស់ សូមអនុវត្តការងារប្រកបដោយតម្លាភាព ឈរលើក្រមសីលធម៌ វិជ្ជាជីវៈ និងមានភាពយុត្តិធម៌។
សូមជម្រាបជូនថា ព្រឹត្តិការណ៍ប្រកួតកីឡាទូកង ទូកនាគ ទូកផ្កាចារ ទូកកានូ-កាយ៉ាក់ និងទូករ៉ូអុីងជ្រើសរើសជើងឯកថ្នាក់ជាតិពានរង្វាន់ ឯកឧត្តមអភិសន្តិបណ្ឌិត ស សុខា លើកទី២ ឆ្នាំ២០២៥ ប្រព្រឹត្តទៅចាប់ពីថ្ងៃទី៦ ដល់ថ្ងៃទី៨ ខែកុម្ភៈ ឆ្នាំ២០២៦ នៅទន្លវ៉ៃគោ ក្រុងស្វាយរៀង ខេត្តស្វាយរៀង ។ ព្រឹត្តិការណ៍នេះ មានប្រតិភូ គ្រូបង្វឹក គ្រូជំនួយ និងកីឡាករ-កីឡាការិនីទូក ចូលរួមសរុបចំនួន៨១៩រូប មកពីក្រសួង និងសមាគមកីឡាទូកចំនួន២២ រាជធានី-ខេត្ត។
សហព័ន្ធកីឡាទូកកានូ និងរ៉ូអុីងកម្ពុជាបានដាក់វិញ្ញាសាសរុបចំនួន៨ប្រភេទទៅក្នុងការ
ប្រកួតនេះ មានជាអាទិ៍៖
-ទូក ង ផ្នែកបុរស ២២នាក់ ចម្ងាយ៨០០ម៉ែត្រ
-ទូកនាគផ្នែកបុរស ១២នាក់ ចម្ងាយ៨០០ម៉ែត្រ
-ទូកនាគផ្នែកបុរស ១២នាក់ ចម្ងាយ ២០០ម៉ែត្រ
-ទូកផ្កាចារ ផ្នែកនារី ៥នាក់ ចម្ងាយ ២០០ម៉ែត្រ
-ទូកផ្កាចារផ្នែកបុរស៥នាក់ ចម្ងាយ២០០ម៉ែត្រ
-វិញ្ញាសាទូកកានូផ្នែកបុរស ចម្ងាយ២០០ម៉ែត្រ
-ទូករ៉ូអុីងផ្នែកបុរសចម្ងាយ៨០០ម៉ែត្រ និង
-ទូកកាយ៉ាក់ចម្ងាយ២០០ម៉ែត្រ ៕
ចែករំលែកព័តមាននេះ